އަފްޣާނިސްތާނުގައި ވެރިކަންކުރާ ތާލިބާނުން, އިންސާނީ ހައްގުތަކާމެދު ގެންގުޅޭ އުސޫލުތަކުގެ ސަބަބުން ހޯމަ ދުވަހު ބޭއްވި އދ.ގެ ބައްދަލުވުމެއްގައި އެ ޖަމާއަތަށް ފާޑުކިޔުން އަމާޒުވެއްޖެއެވެ.
އެ ބައްދަލުވުމުގައި ވޮޝިންޓަނުން ވަނީ ތާލިބާނުން އަންހެނުންނާއި އަންހެން ކުދިންގެ އިންސާނީ ހައްގުތައް ނިޒާމީ ގޮތެއްގައި މަހުރޫމުކޮށްފައިވާ ކަމަށް ތުހުމަތުކޮށްފައެވެ.
ނަމަވެސް އެ ބައްދަލުވުމަށް ތާލިބާން ސަރުކާރުން ހާޒިރުވެފައެއްނުވެއެވެ. ތާލިބާނުންނަކީ އދ.އިން ބަލައިގަންނަ ސަރުކާރެއް ނޫނެވެ. އެ ބައްދަލުވުމުގައި އަފްޣާނިސްތާނު ތަމުސީލުކުރަނީ އެމެރިކާއިން އެ ގައުމަށް ކަނޑައަޅާފައި ހުންނަ ސަފީރެކެވެ.
އިންސާނީ ހައްގުތަކުން ނިޒާމީ ގޮތެއްގައި މަހުރޫމު ކުރަމުންދާ އަންހެނުންނާއި އަންހެން ކުދިންނަށް ކުރާ އަނިޔާތަކުގެ ޒިންމާ ނެގުމަށް ކަމާބެހޭ ފަރާތްތަކުން ތާލިބާނުން ޖަވާބުދާރީ ނުކުރަނީ ކީއްވެތޯ އެމެރިކާއިން ވަނީ އެ ބައްދަލުވުމުގައި ސުވާލުކޮށްފައެވެ.
އިނގިރޭސިވިލާތާއި ބެލްޖިއަމުން ވެސް ވަނީ ތާލިބާނުން އަންހެނުންނާ މެދު އަމަލުކުރާ ގޮތާ މެދު ސުވާލު އުފައްދައިފައެވެ. ޖުމްލަ 76 ގައުމަކުން ވަނީ އެ ބައްދަލުވުމުގައި ވާހަކަ ދެއްކުމަށް އެދިފައެވެ.
އަފްޣާނިސްތާނުގެ ވެރިކަމަށް ތާލިބާނުން އައި ފަހުން ގިނަ އަންހެން ކުދިންނަށް ސްކޫލަށް ދިއުން އަދި އަންހެނުން ޔުނިވާސިޓީތަކަށް ދިއުން ވަނީ މަނާކޮށްފައެވެ. އަދި، އަފްޣާނިސްތާނުގެ ގިނަ އަންހެން މުވައްޒަފުންނަށް އެހީދޭ އިދާރާތަކުގައި މަސައްކަތް ކުރުން ހުއްޓުވައި، ބިއުޓީ ސެލޫންތައް ބަންދުކޮށް، އަންހެނުން ޕާކްތަކަށް ވަނުން ވަނީ މަނާކޮށްފައެވެ.
ނަމަވެސް ތާލިބާނުން މީގެ ކުރިން ވަނީ ބައިނަލްއަގުވާމީ މުޖުތަމައުން ކުރާ ތުހުމަތުތައް ދޮގުކޮށްފައެވެ.
ތާލިބާނުންގެ ވެރިކަމެއްގައި އަންހެނުންގެ ހައްގުތައް ރައްކާތެރިކޮށް ކަށަވަރުކުރާނެ ކަމަށާއި އެ މީހުންނަށް ވަޒީފާއަށް ދިއުމަށާއި މަދަރުސާތަކަށް ދިއުމަށް ވެސް ހުރަސްނާޅާނެ ކަމަށް އެ ޖަމާއަތުން ބުނެފައިވެއެވެ. އަދި، ތާލިބާނުން އެނބުރި ވެރިކަމަށް އައުމަށް ފަހު އަންހެނުން ކިޔަވައި އެއްވެސް މަދަރުސާއެއް ބަންދުކޮށްފައިނުވާނެ ކަމަށާއި އިސްލާމީ ހުދޫދުގެ ތެރެއިން އެ މީހުންނަށް މިނިވަންކަމާ އެކު ދިރިއުޅެވޭނެކަމުގެ ޔަގީންކަން އެ ޖަމާއަތުން ދޭނެ ކަމަށް ވެސް އޭރު ބުނެފައިވެއެވެ.
މީގެ ދެ އަހަރެއްހާ ދުވަސް ކުރިން އަފްޣާނިސްތާނުގައި ތިބި އެމެރިކާ ސިފައިން ފޭބުމުން، ތާލިބާނުން އެ ގައުމުގައި ވެރިކަން ކުރަން ފަށާފައި އޮތް ނަމަވެސް އެއްވެސް ގައުމަކުން އަދި މިހާތަނަށް އެ ސަރުކާރު ބަލައިގެންފައެއްނުވެއެވެ.
އެމެރިކާއިން އަފްޣާނިސްތާނަށް އަރައި އަލްގައިދާއާ ދެކޮޅަށް ހަނގުރާމަ އިއުލާނުކޮށްފައިވަނީ 2001 ވަނަ އަހަރުގެ ސެޕްޓެންބަރު މަހުގެ ނުވަވަނަ ދުވަހު ނިއު ޔޯކްގައި ހުންނަ ވޯލްޑް ޓްރޭޑް ސެންޓަރަށް ދިން ޓެރެރިސްޓު ހަމަލައާ ގުޅިގެންނެވެ. އެ ހަނގުރާމައިގައި އަފްޣާނިސްތާން ސުންނާފަތިކޮށް، އެ ގައުމުގެ އިގުތިސާދު ވަނީ އިނދަޖައްސައިފައެވެ.