ރޯދަ މަހަކީ ދިވެހީންގެ ކެއުމުގެ އާދައަށް ބޮޑު ބަދަލެއް އާދެއެވެ. ރޯދަ ވީއްލުމަށް ފަހު އާންމުކޮށް ގިނަ ބަޔަކު ކަނީ އާއްމުކޮށް އެއް ފަހަރެވެ. އެއީ ހާރެވެ. ނަމަވެސް މީގެ ކުރީން ތަރާވީހަކީ ވަރަށް މަގުބޫލު ކެއުމުގެ ވަގުތެކެވެ.
ރޯދަ މަހުގައި ރޯދަ ވީއްލުމަށް ކެއުމުގެ އިތުރުން ދެން އާންމުކޮށް ކައި އުޅޭނީ ހާރަށެވެ. މިއީ ކޮންމެ މީހަކު ވެސް ހަމަ ކައި އުޅޭ ގަޑިއެވެ. އެ ދޭތެރޭގައި ކޮންމެ މީހަކަށް ވެސް ކެއުމުގެ ބާރު އޮވެއެވެ. ނަމަވެސް އެންމެންނެއް މި ގަޑިތަކުގައި ކައެއް ނޫޅެއެވެ.
ދޭތެރެއަކުން ދެ ބުއިމެއް ބޮއެދާނެއެވެ. ނަމަވެސް ބޮޑެތި ކެއުންތައް މި ދޭތެރޭގައި ވަރަށް ކައި ނޫޅެއެވެ. ނަމަވެސް އެއް އިރެއްގައި ތަރާވީސް ކެއުމަކީ ވަރަށް މަގުބޫލު ކެއުމެކެވެ.
ތަރާވީސް ނަމާދަށް ފަހު ކެއުމަށް މީގެ ކުރީން ހާއްސަ އެކި އެއްޗެހި ތައްޔާރުކޮށް އުޅެއެވެ. ނަމަވެސް މިއީ މިހާރު ހުރިހާ ގެއަކުން ފެންނަ ކަމެއް ނޫނެވެ.
"މީގެ 15 ވަރަކަށް އަހަރު ކުރީން ރަށުގައި އުޅުނުއިރު ރޯދަ ވީއްލަން އެއްޗެހި ހަދާއިރު އަދި ތަރާވީހަށް ކާން އެއްޗެހި ވެސް ވަކީން ހަދާނެ. މިހާރު އެކަމު ކުރެވޭ ކަމެއް ނޫން މިއީ،" މާލޭގައި މިހާރު ދިރިއުޅެމުން ދާ، އުތުރުގެ އަތޮޅަކަށް ނިސްބަތްވާ އަންހެނަކު ކިޔައިދިނެވެ.
ތަރާވީހަށް ކާން އެއްޗެހި އޭރު ހަދާއިރު އެ ވަގުތަކީ އާއިލާ އެންމެން އެކުގައި ކާން ތިބޭ ވަގުތެއް ކަމުގައި ވެސް ވަނީ އޭނާ ފާހަގަކޮށްފައެވެ.
ނަމަވެސް މިހާރު ޝެޑިއުލްތައް ހުންނަ ގޮތުންނާއި ކުރަންޖެހޭ އެެހެން ކަންތައްތައް ގިނަ ކަމުން ތަރާވީހަށް ހާއްސަކޮށްގެން ކާން ވަގުތު ނުދެވޭ ކަމަށް އޭނާ ފާހަގަކުރިއެވެ.
މިއީ ހުރިހާ ގެއެއްގެ ހާލަތެއް ނޫނެވެ. ބައެއް ގެތަކުގައި އަދިވެސް ތަރާވީހަށް ކާން ހަދައި އެކުގައި ކައި އުޅެއެވެ. ނަމަވެސް ކުރިއާ އަޅާ ބަލާއިރު މިއީ އޭރުހައި މުހިއްމު ކަމަކަށް ގިނަ ބަޔަކަށް ނުފެނެއެވެ. ރޯދަ ވީއްލުމަށް ފަހު ހަމަ ބޭނުންވަގުތު ކާންވީ ކަމުގައި އެއްބައި މީހުން ގަބޫލު ކުރެއެވެ. އެހެންވީމާ ކޮންމެހެން ތަރާވީހަށް ފަހު ކާން ތިބޭނެ ކަމެއް ނޫން ކަމުގައި އެމީހުން ދެކެއެވެ.
ތިޔަ ގޭގައި ތަރާވީހަށް ވަކީން ކައްކާ ކައި އުޅޭ ހެއްޔެވެ؟ އަދި އުޅޭ ނަމަ ތަރާވީހަށް އާންމުކޮށް ހަދަނީ ކޯއްޗެއް ހެއްޔެވެ؟