ވިނަވި ގުރުއާން ކުލާހުގެ މުބާރާތުގައި ބައިވެރިވެ އުމުރުން 12 އަހަރުގެ އަލްވާ ހުސައިން، ހިތުން ކިޔެވުމުގެ ބައިން ހޯދި ކާމިޔާބީއަކީ އޭނާގެ އަޑު ނީވޭ ވާހަކަ ނުދެއްކޭ މަންމައާއި ބައްޕައަށް ލިބުނު އެންމެ ބޮޑު ފަޚުރެވެ. އަލްވާގެ މި ކާމިޔާބީއާއެކު އެތައް ބައެއްގެ ތައުރީފު އެ ދެމަފިރިންނަށާއި އަލްވާއަށް ދަނީ އޮހެމުންނެވެ.
އަލްވާގެ މަންމަ އާމިނަތު ފަހުދާ އާއި ބައްޕަ ހުސައިން ސުނިލްއަކީ މަންމަން ދެމަފިރިންނެވެ. ވިނަވި ގުރުއާން ކްލާހުގެ ގުރުއާން މުބާރާތުގައި އަލްވާ ބައިވެރިވީ ބަލައިގެން ކިޔެވުމުގެ ބައިގައި ވާދަ ކުރުމަށެވެ. ނަމަވެސް، އިދާރީ އޮޅުމަކުން އަލްވާއަށް ސުވާލު އައީ ނުބަލާ ކިޔެވުމުގެ ބައިންނެވެ.
އަލްވާއަކީ ގުރުއާން ހިތުދަސް ވެސް ކުރަމުން އަންނަ ކުއްޖަކަށް ވާތީ، ނުބަލާ ކިޔެވުމުގެ ބައިން ސުވާލު އައި ނަމަވެސް، ފަސް ޖެހުމެއް ނެތި އަލްވާ ކިޔެވިއެވެ. އޭނާ ތައްޔާރުވީ ބަލައިގެން ކިޔަވަން ނަމަވެސް، ނުބަލާ ކިޔެވުމުގެ ބައި ވެސް އޭނަ ވަނީ ދަސްކޮށްފައެވެ.
ތައްޔާރު ނުވެ ހުއްޓައި މުބާރާތުގައި ކިޔަވާ، އަލްވާއަށް އެއް ވަނަ ލިބުނެވެ. މިއީ އަލްވާގެ މަންމަން މައިންބަފައިންނަށް ލިބުނު އެންމެ ބޮޑު ފަޚުރެވެ.
އަލްވާ ގުރުއާން ކިޔެވުމުގެ ތެރެއަށް ވަދެވުނު ގޮތް ހިއްސާކޮށް "ސަން"އާ ވާހަކަ ދައްކަމުން ކުއްޖާގެ މާމަ ސަކީނާ އާދަމް ބުނީ، އަލްވާ ކުޑައިރު ދިޔައީ ދޮންދޫނި ޕްރީ ސްކޫލަށް ކަމަށެވެ.
އަލްވާ އޭނާގެ މައިންބަފައިން އަދި މާމައާ އެކު -- ފޮޓޯ/ އިސްލާމިކް މިނިސްޓްރީ
"ދޮންދޫނި ޕްރީ ސްކޫލަކީ ގުރުއާނަށް ވަރަށް ސަމާލުކަން ދޭ ތަނެއް. ދެން ތަބާރަ ފޮތާއި އަންމާ ފޮތާ ކިޔަވާއިދޭނީ. އެކަމަކު ބަލައިގެން ކިޔަން ނޭނގޭތީ އަޑުއިއްވައިގެން ކިޔުއްވީ. ދެން ވަރަށް ފަސޭހައިން ދަސްވާކަން ފާހަގަވީ،" އަލްވާގެ މާމަ ކިޔައިދިނެވެ.
އެގޮތުން, ހިތުގައި ޝައުގުވެރިކަން އުފެދި މިހާރު އަލްވާ ވަނީ ޔާސީން ސޫރަތުން ތިރި އެއްކޮށް ހިތުން ދަސްކޮށްފައެވެ. އޭނާގެ ގުރުއާން ދަސްކުރުމުގެ ދަތުރުގައި އެންމެ ބޮޑު އެހީތެރިކަމެއް ފޯރުކޮށްދިނީ ވެސް މާމަ ސަކީނާއެވެ.
އަލްވާ މިހާރު ތައުލީމު ހާސިލް ކުރަނީ އަރަބިއްޔާ ސްކޫލުގައެވެ. މަންމަ އާއި ބައްޕައަށް އަޑު ނީވި، ވާހަކަ ނުދެއްކުނު ނަމަވެސް އަލްވާގެ ކަންކަމުގައި ފުރިހަމައަށް ޝާމިލްވެ، އެންމެ ފުރިހަމަ ސަޕޯޓާއި ލޯބި ދޭކަން މާމަ ސަކީނާ ފާހަގަ ކުރިއެވެ.
އަލްވާގެ މި ކާމިޔާބީއާ ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ވަނީ އަލްވާއަށް މަރުހަބާ ވިދާޅުވެފައެވެ. އަދި ގުރުއާން އުނގެނުމާއި ހިތުދަސްކުރުމުގައި ކުރިއަށް ދިޔުމަށް އިތުރަށް ހިތްވަރު ދެއްވައި، އަލްވާގެ މައިންބަފައިންގެ ހިތްވަރަށް ވެސް ޝުކުރު އަދާކުރައްވާފައެވެ.