ބިއޯންޑު އެއާލައިނުން އަންނަ ޖުލައި މަހުން ފެށިގެން ފަސިންޖަރުންނަށް އެޕަލް ވިޝަން ޕްރޯ ހެޑްސެޓު ތަޖުރިބާ ކުރުމުގެ ފުރުސަތު ލިބޭނެ ކަމަށް އެ އެއާލައިނުން ބުނެފިއެވެ.
ބިއޯންޑްގެ ސީއީއޯ ޓެރޯ ޓާސްކިލާ ނެރުއްވި ބަޔާނެއްގައި ވިދާޅުވީ، ހެޑްސެޓްތައް ޓެސްޓް ކުރުމުގެ ފުރުސަތު ލިބޭ ފަސިންޖަރުންނަށް ފިލްމު ބަލައި، ގޭމްތައް ކުޅެވޭނެ ކަމަށެވެ. އަދި ރާއްޖޭގެ ރީތި މަންޒިލްތަކާއި ކުރެވޭނެ ކަންތައްތައް ވެސް ފަސިންޖަރުންނަށް ދައްކުވައިދޭނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ މިއީ އެ އެއާލައިނުން ދަތުރު ކުރާ ފަސިންޖަރުންނަށް ފޯރުކޮށްދޭ އިތުރު 'ލަގްޒަރީ' ޚިދުމަތެއް ކަމަށެވެ.
އެ ފުރުސަތު ލިބޭނީ ބައެއް ފަސިންޖަރުންނަށް ކަމަށް ސީއީއޯގެ ބަޔާނުގައި ފާހަގަކޮށްފައިވީ ނަމަވެސް އެ ފަސިންޖަރުން ޚިޔާރު ކުރާނެ ގޮތުގެ ތަފުސީލެއް ދީފައިނުވެއެވެ.
ރާއްޖޭގެ ސިމްޑީ ގުރޫޕް އަދި، ޔޫއޭއީގެ އެރަބިސްކް ކުންފުނިން އުފެއްދި "ބިއޯންޑް" އެއާލައިން ލޯންޗުކޮށް ފުރަތަމަ ފްލައިޓް ރާއްޖެ ގެނެސްފައިވަނީ މިދިޔަ އަހަރުގެ އޮކްޓޫބަރު މަހުގެ ތެރޭގައެވެ.
އެ އެއާއިލައިންގެ ދަތުރުތައް ތައިލެންޑާއި ޔޫއޭއީ އާއި ޖަރުމަނާއި ސައުދީ އަރަބިއާ އާއި ސުވިޒަލޭންޑާއި އިޓަލީއިން ވެސް ރާއްޖެއަށް ކުރެއެވެ.
އެޕަލްގެ މިކްސްޑް ރިއާލިޓީ ހެޑްސެޓް ވިޝަން ޕްރޯ އެ ކުންފުނިން ތައާރަފު ކުރީ މިދިޔަ އަހަރުގެ ޖޫން މަހުގެ ތެރޭގައެވެ. އެއަށްފަހު އެ ޑިވައިސް ޕްރީ އޯޑަރަށް ހުޅުވާލީ މިދިޔަ މަހުގެ 19ގައެވެ.