އިމާމުން ތާޒާކުރުމުގެ ގައުމީ މަޝްރޫއު، އަންނަ މަހު 10 ގައި ފަށަނީ

ރާއްޖޭގެ އިމާމުން އިތުރަށް ތަމުރީނުކުރަން އިމާމުން ތާޒާކުރުމުގެ ގައުމީ މަޝްރޫއެއް އިސްލާމިކް މިނިސްޓްރީން މިއަދު އިފުތިތާހުކޮށްފިއެވެ.

މިނިސްޓްރީން ބުނީ، މި ޕްރޮގްރާމް ކުރިއަށް ގެންދާނީ 11 ސަރަހައްދަކަށް ބަހައިލައިގެން ކަމަށާއި މި ޕްރޮގްރާމުގައި ނުވަ މާއްދާއެއް ހިމެނޭ ކަމަށެވެ.

އެގޮތުން އަޤީދާއާއި އަޚުލާގާއި ތަޖުވީދާއި ތިއޮރީއާއި މުޖުތަމަޢު ބިނާކުރުމުގައި މިސްކިތުގެ ދައުރާއި އަޅުކަމުގެ ފިޤުހުތަކާއި ޤުރުއާނުގެ ތަފުސީރާއި ޤުރުއާނަށް ތަދައްބުރުކުރުމާއި ހަދީޘާއި އިސްލާމީ ސަގާފަތާއި ޢުލޫމުލް ޤުރުއާނުގެ އިތުރުން ދަޢުވާގެ އުޞޫލުތަކާއި ހިތާބާއި އަރަބި ބަސް ވެސް މި ޕްރޮގްރާމްގައި ކިޔަވައިދޭނެއެވެ.

މި މަޝްރޫއުގެ ފުރަތަމަ ބުރު ގއ. ގެމަނަފުށީގައި ފެށުމަށް ހަމަޖެހިފައިވަނީ އަންނަ މަހުގެ ދިހަވަނަ ދުވަހުއެވެ.

އިމާމުން ތަމްރީނުކުުރުމަށް ހަމަޖެހިފައިވާ މަޝްރޫއު އިފްތިތާހު ކުރުމަށް ބޭއްވި ރަސްމިއްޔާތުގެ ތެރެއިން --- ފޮޓޯ/ މިނިސްޓްރީ

މިއަދު އިސްލާމިކް މިނިސްޓްރީގައި މި މަޝްރޫއު އިފުތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ، ސެޓްފިކެޓު ލެވެލް ކޯސްތަކާއި ޑިޕޮލޮމާ ކޯސްތަކުން އިމާމުންނަށް ލިބޭ މައުލޫމާތަށްވުރެ ގިނަ މައުލޫމާތުތަކެއް މި ކޯހުން ލިބޭނެ ކަމަަށެވެ.

"މީގެ ބޭނުމަކީ މިހާރުގެ މިސްކިތްތަކުގެ އިމާމުންގެ ގޮތުގައި ތިއްބެވި ބޭފުޅުންނަކީ އިލްމީ ގޮތުން ފުދުންތެރި ބަޔަކަށް ހެދުން. ހަމައެކަނި ސެޓްފިކެޓް ލެވެލް ކޯހެއް ހަދާފައި އިމާކަށްވެގެން ތިބޭ ތިބުން ނިމުމަކަށް ގެނައުން،" ޝަހީމް ވިދާޅުވިއެވެ.

މި ޕްރޮގްރާމްގެ ފުރަތަމަ ބުރުގައި 77 އިމާމުން ބައިވެރިވާނެ ކަމަށާއި 6-5 ދުވަހުގެ މުއްދަތަކަށް މި ޕްރޮގްރާމް ދިގުދެމިގެންދާނެ ކަމަށް ޝަހީމް ފާހަކުރެއްވިއެވެ. އަދި، މި އަހަރު ނިމުމުގެ ކުރިން ރާއްޖޭގެ ހުރިހާ އިމާމުންނަށް މި ޕްރޮގްރާމް ފުރިހަމަކުރެވޭނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.

މި ޕްރޮގްރާމުގެ އިތުރުން ވެސް އިމާމުން ތަމުރީނުކުރުމަށް ރާއްޖޭން ބޭރަށް ފޮނުވާނެ ކަމަށް ވެސް މިނިސްޓަރު ވިދާޅުވިއެވެ.