މި ދުވަސްވަރު އިރުމަތިން ޖެހެމުންދާ ވައިގެ ސަބަބުން އުތުރާއި މެދުރާއްޖެތެރޭގެ ވައި ނުސާފުވެފައިވާތީ، މިއަދު މާލެ ސަރަހައްދުގެ ހަމަ ލޮލަށް ފެންނަ ދުރުމިން، ހަތަރު ކިލޯމީޓަރަށް ދަށްވެއްޖެ ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ބުނެފިއެވެ.
މެޓް އޮފީހުން "ސަން"އަށް ބުނީ ވައި ސާފުވެ، މޫސުން ރަނގަޅު ދުވަސްތަކުގައި 10 މީޓަރު ދުރުމިނަށް ހަމަލޮލަށް ފެންނަ ނަމަވެސް، އިއްޔެއާއި މިއަދު މާލެ ސަރަހައްދުގެ ހަމަ ލޮލަށް ފެންނަ ދުރުމިން ވަރަށް ބޮޑަށް ދަށްވެފައިވާ ކަމަށެވެ.
އެގޮތުން، އިއްޔެ ފަސް ކިލޯމީޓަރުގެ ދުރުމިނަށް ހަމަ ލޮލުން ފެނުނު ނަމަވެސް، މިއަދު ވަނީ އެއަށް ވުރެ ދަށް، ހަތަރު ކިލޯމީޓަރަށް ދަށްވެފައެވެ.
ދުރު ފެންނަ މިންވަރު ކުޑަވުމުގައި ވައިގެ މިސްރާބާއި ބާރުމިން އަދި ވިއްސާރަވުން ވެސް މުހިންމު ދައުރެއް އަދާކުރެއެވެ.
ޖައްވުގެ ވައި ނުސާފުވެފައިވަނީ، އާއްމުކޮށް އިރުވައި މޫސުމުގެ ވައި އިރުމަތިން އަންނައިރު ހުޅުމާލޭ ސަރަހައްދުން އަންނަ ހިރަފުހާއި ވައިގެ ތެރޭގައި ހިމެނޭ ޕާޓިކަލްސްގެ ސަބަބުން ކަމަށް މެޓް އޮފީހުން ވަނީ މީގެ ކުރިން ބުނެފައެވެ.
ސިއްހަތަށް ނުރައްކާވާ މިންވަރަށް ވައިނުސާފުވުމަކީ އިރުވައި މޫސުމުގެ ދުވަސްވަރާ ދިމާކޮށް ރާއްޖެއަށް ދިމާވާ މައްސަލައެކެވެ. އެގޮތުން ވައި ނުސާފުވަނީ ޖައްވުތެރޭގައި ހިމެނޭ ޕްލާސްޓިކާއި ވައިގެ ސަބަބުންނެވެ. އެހެންވެ، ސިއްހަތަށް ނުރައްކާތެރި މިންވަރު ދެނެގަނެ އެކަމުން ރައްކާތެރިވާން ފިޔަވަޅުއެޅުމަކީ ވަރަށް މުހިންމު ކަމެކެވެ.