ޕަބްލިކް ސާވިސް މީޑިއާ، (ޕީއެސްއެމް)ގެ ޑެޕިއުޓީ މެނޭޖިން ޑިރެކްޓަރުކަމުގެ މަގާމަށް ކުރިން މީޑިއާގައި ހަރަކާތްތެރިވެ، މީޑިއާގެ ހިންގުމުގައި ވެސް އުޅުއްވައި އަބްދުﷲ ޔާމީން އައްޔަންކޮށްފިއެވެ.
އޭނާ މި މަގާމަށް އައްޔަންކޮށްފައިވާކަން ހާމަކޮށް ޕީއެސްއެމުންވަނީ އޭނާއަށް މަރުހަބާ ކިޔައިފައެވެ.
ޔާމީނަކީ ނ. ވެލިދޫ ދާއިރާގެ މެމްބަރުކަން ނިމިދިޔަ 18ވަނަ ރައްޔިތުންގެ މަޖިލީހުގައި ކުރެއްވި ބޭފުޅެކެވެ. ސިޔާސީ ދާއިރާއަށް އޭނާ ނިކުމެވަޑައިގަތީ ނޫސްވެރިކަމުގައި އުޅުއްވުމަށްފަހުގައެވެ.
އެގޮތުން ރާއްޖެ ޓީވީގައި އޭނާ ވަނީ މަސައްކަތްކުރައްވައިފައެވެ. އަދި ފަހުން ދިވެހި ޗެނަލްގެ ހިންގުމުގައި އިސްކޮށް އުޅުއްވިއެވެ.
އާ ސަރުކާރާއެކު، ދައުލަތުގެ މީޑިއާގެ ވެރިން ވެސް ބަދަލުކުރަމުން އަންނައިރު، މިހާރު އެ ކުންފުނީގެ މެނޭޖިން ޑިރެކްޓަރު ކަމުގައި ހުންނެވީ، ކުރިން ބްރޯޑްކާސްޓިން ކޮމިޝަންގެ މެމްބަރުކަން ކުރެއްވި ޒީނާ ޒާހިރެވެ.
އޭނާ ވެސް ފަހުން އުޅުއްވީ، ޒީ ޓައިމްސްގެ ނަމުގައި އަމިއްލަ މެގަޒިނެއްގައެވެ.