ޑާކްރެއިން އެންޓަޓެއިންމެންޓް"ގެ އެންތޯލޮޖީ ސީރީޒް "ޑާކްރެއިން ކްރޮނިކަލްސް"ގެ އާ ސީޒަން މުޅީން އާ ތީމަކާ އެކު ފަށައިފިއެވެ.
ޑާކްރެއިންއިން މިދިޔަ އަހަރުގެ ތެރޭގައި ވަނީ ޑާކްރެއިން ކްރޮނިކަލްސްގެ ނަމުގައި އެންތޮލޮޖީ ޝޯއެއް ރިލީޒްކޮށްފައެވެ. ޝޯގެ މައިގަނޑު ތީމަކަށް ބަދަލު ހިފުން ކަނޑައަޅައި ތަފާތު ހަ ވާހަކައެއް ކިޔައިދޭ ޝޯއެއް ވަނީ މިދިޔަ އަހަރު އާންމުކޮށްފައެވެ.
މި ޝޯގެ ހަ އެޕިސޯޑުގައި ވެސް ބަދަލު ހިފުމާ ގުޅޭ މުޅީން ތަފާތު ވާހަކައެއް ކިޔައިދެއެވެ. އަދި ކޮންމެ އެޕިސޯޑަކުން ވެސް ތަފާތު ކާސްޓެއް ފެނިގެން ދިޔައެވެ.
އެ ފޯމެޓާ އެކު މި ފަހަރު ވެސް ޑާކްރެއިން ކްރޮނިކަލްސްގެ ދެވަނަ ސީޒަން ޕްރިމިއާ ކުރީ ރޭގައެވެ. މި ފަހަރުގެ ސީޒަން އަލި އަޅުވާލާނީ ލޯބީގެ އެކި ވާހަކަތަކަށެވެ.
ދެވަނަ ސީޒަން ފަށާފައިވަނީ ވަރަށް ވަރުގަދަ ކޮށެވެ. އެއީ އިންޑަސްޓްރީގެ ފާހަގަކޮށްލެވޭ ވަރުގަދަ އެކްޓަރުން ކަމަށްވާ ޝީލާ ނަޖީބާއި އަހުމަދު ސައީދެވެ. މި އެޕިސޯޑުގައި ފެނިގެން ގޮސްފައިވަނީ ކުރީގެ ލޯބީގެ ހަނދާންތައް އާކޮށް ލޯބި ދިރުވުމަށް މަސައްކަތް ކުރާ ވާހަކަ ކިޔައިދޭ ތަނެވެ. މި އެޕިސޯޑަށް ކިޔާނީ "ބައިސިކަލް" އެވެ.
ޑާކް ކްރޮނިކަލްސްގެ އާ ސީޒަންގައި އަލިއަޅުވާލާނީ ލޯބީގެ އެކި ހަރުފަތާއި ލޯބީގެ އެކި ވާހަކަ ކިޔައިދޭ އެކި ކަހަލަ ކަންތައްތަކަށެވެ. އޭގެ ތެރޭގައި ކުރީގެ ލޯބީގެ ހަނދާންތަކާއި ލޯތްބާ އެކު އުޅޭއިރު ވެސް ދިމާވާ މައްސަލަތަކުގައި އަމަލު ކުރާ ގޮތްތައް ހިމެނެނޭއެވެ.
ކޮންމެ ހަފުތާއެއްގެ ހޯމަ ދުވަހުގެ ރޭގައި އާ އެޕިސޯޑު ރިލީޒް ކުރާ މި ޝޯގެ ކޮންމެ އެޕިސޯޑަކުން ފެންނާނީ ތަފާތު ކާސްޓެކެވެ. ޖުމްލަ އަށް އެޕިސޯޑްގެ މި ސީޒަންގެ ކާސްޓުންގެ ތެރޭގައި ދެން ހިމެނެނީ، މަރިޔަމް މަޖުދާ (މަޖޫ)، ރަވީ ފާރޫގު ޝަރަފު އަބްދުﷲ، ނުޒުހަތު ޝުއައިބް، މުހައްމަދު ފައިސަލް، އަހުމަދު އީސަ (އާނަންދު)، އަބްދުﷲ ޝާފިއު (ފުބޫ) އެވެ.
View this post on Instagram