އެމެރިކާގެ އެފްބީއައިވެސް ހިމެނޭގޮތަށް އެތައްބައެއްގެ ޕާސަނަލް އައިޑީ ހެކްކްރިކަމުގެ ތުހުމަތުގައި ހަތަރު މީހަކު އިންޑިއާއިން ހައްޔަރުކޮށްފިއެވެ.
އިންޑިއާގެ ދިއްލީގެ ފުލުހުން ބުނީ ހައްޔަރުކުރި ތިން މީހުންނަކީ އިންޑިއާގެ މެޑިކަލް ރިސާޗް (އައިސީއެމްއާރު)ގެ ޑޭޓާބޭސްއަކުން އިންޑިއާގެ 81 މިލިއަން މީހުންގެ ޕާސަނަލް ރެކޯޑް ވަގަށް ނެގި ކަމުގެ ތުހުމަތުގައި ހައްޔަރު މީހުން ކަމަށެވެ.
ދިއްލީ ފުލުހުން ބުނީ އެ މީހުންވަނީ އެފްބީއައި އާއި ޕާކިސްތާނުގެ އައިޑީތަކެއް ވެސް ހެކްކޮށްފައި ކަމަށެވެ.
މި މީހުން އެންމެ ފުރަތަމަ ހައްޔަރުކުރީ މިދިޔަ އޮކްޓޫބަރު މަހު އައިސީއެމްއާރްއިން ޑޭޓާ ލީކުވި މައްސަލައާ ގުޅިގެން ދިއްލީގެ އިސް އޮފިސަރަކު ޖިނާއީ ތަހުގީގެއް ފެށުމުންނެވެ. މި މީހުންނަކީ އޮންލައިންކޮށް ގޭމު ކުޅުމުގެ ތެރެއިން ރައްޓެހިވި ބަޔެއް ކަމަށް ފުލުހުން ބުންޏެވެ.
ފުލުހުން ބުނީ އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަނާއި ޕާކިސްތާނުގެ ފެޑެރަލް އައިޑީ ޑޭޓާބޭސްގެ އައިޑެންޓިފިކޭޝަން ރެކޯޑްތަކަށް ހެކަރުން ވަދެފައި ވަނީ ސައިބާ ކްރައިމްގެ ތެރެއިން ގަވައިދާ ހިލާފަށް ކަމަށެވެ. ގިނަ ގައުމުތަކުގެ އަގު ބޮޑު ޓާގެޓްތަކަށް ވަނުމުގެ ގާބިލުކަން އެފަދަ ބަޔަކަށް ލިބިފައި ވުމުން އިންޑިއާގެ ކަމާބެހޭ ފަރާތްތަކުން ވަނީ ކަންބޮޑުވުން ފާޅުކޮށްފައެވެ. ތަހުގީގަށް އެނގިފައިވާ ގޮތުގައި ޑޭޓާ ވަގަށް ނެގި މީހުން އަތުލައިގަތްއިރު ވަގަށް ނަގާފައިވާ މައުލޫމާތު ޝެޑޯ ޑާކް ވެބް މާކެޓްޕްލޭސްތަކުގައި ވަނީ ވިއްކައިފައެވެ.
ހައްޔަރު ކުރި ހަތަރު މީހުންނާ އަދިވެސް ދަނީ، އައިސީއެމްއާރުގެ ސާވާއަށް ވަނުމަށް ބޭނުންކުރި ޓެކްނޮލޮޖީތަކާ ގުޅޭ ގޮތުން ސުވާލުކުރަމުންނެވެ.
އެމެރިކާގެ ސައިބާ އިންޓެލިޖެންސް ކުންފުންޏެއް ކަމަށްވާ ރީސެކިއުރިޓީން ހާމަކުރި ގޮތުގައި މި ބްރީޗްގައި އިންޑިއާގެ 80 މިލިއަނަށް ވުރެ ގިނަ މީހުންގެ މައުލޫމާތު ވަގަށް ނަގާފައިވެއެވެ. އެގޮތުން އެމީހުންގެ ނަމާއި މައިންބަފައިންގެ ނަމާއި އުފަން ތާރީޚާއި އެޑްރެސް އަދި މޯބައިލް ނަންބަރުތައްވެސް ނަގާފައިވެއެވެ. މާލީ އެއްވެސް މައުލޫމާތެއް ހާމަ ކޮށްފައި ނުވި ނަމަވެސް، މިއީ އިންޑިއާއިން މިހާތަނަށް ފެނުނު ސައިބާ ހެކިންގެ ވައްކަމުގެ އެންމެ ބޮޑު މައްސަލަ ކަމަށް އޮފިޝަލުން ވަނީ ބުނެފައެވެ.