ޢިސްރާއީލުން ޣައްޒާގައި ހިންގަމުންދާ ލާއިންސާނީ ޢަމަލުތައް މިހާރުން މިހާރަށް ހުއްޓާލުމަށް ގޮވައިލައި އދ.ގެ ސަލާމަތީ މަޖިލީހަށް ހުށަހެޅި ޤަރާރަށް އެމެރިކާއިން ހުރަސްއެޅުމުން ޖޮއިންޓް އަރަބް-އިސްލާމިކް އެކްސްޓްރާއޮޑިނަރީ ސަމިޓުގެ ވަޒީރުންގެ ވަފުދުން އެކަން ކުށްވެރިކުރައްވައިފިއެވެ.
މިސްރުގެ ޚާރިޖީ ވުޒާރާއިން އާންމުކޮށްފައިވާ ޖޮއިންޓް ބަޔާނެއްގައި ވާގޮތުން، އެމެރިކާގެ މައްޗަށް އޮތް ޒިންމާތައް އެގައުމުން އަދާކޮށް، މިހާރުން މިހާރަށް ހަމަލާތައް ހުއްޓާލުމަށް ޢިސްރާއީލަށް މަޖުބޫރު ކުރުމަށް އަޅަންޖެހޭ ފިޔަވަޅުތައް އެޅުމަށް ޢަރަބި ޚާރިޖީ ވަޒީރުން ވަނީ އަނެއްކާވެސް ގޮވައިލާފައެވެ.
އދ.ގެ ސަލާމަތީ މަޖިލީހުން ހުކުރު ދުވަހު ނެގި ވޯޓުގައި އެމެރިކާއިން ވީޓޯ ކޮށްފައި ވަނީ އެމެރިކާއަށް އޮންނަ ވީޓޯ ކުރުމުގެ ބާރުގެ ދަށުންނެވެ.
ވަޒީރުން ވަނީ ޣައްޒާގައި ފަލަސްތީނުގެ ރައްޔިތުންނާ ދެކޮޅަށް އިސްރާއީލުން މެދުނުކެނޑި ދެމުންދާ ޙަމަލާތައް ހުއްޓާލުމަށް ގޮވައިލައްވައި ގޮވައިލެއްވުން ކަށްވަރުކޮށްދެއްވައި، ހަނގުރާމަ ހުއްޓައިލުމަށް ގޮވައިލައްވާފައެވެ.
މީގެ އިތުރުން އާންމުން ހިމާޔަތް ކުރުމަށްޓަކައި ބައިނަލްއަޤްވާމީ އަދި އިންސާނީ ޤާނޫނުތަކަށް ތަބާވުން ކޮންމެހެން ލާޒިމުކަމަށް އަލިއަޅުއްވައިލައްވައި، ޣައްޒާގައި ހިންގަމުންދާ އިންސާނީ ކާރިޘާ ނިމުމަކަށް ގެނައުމަށްވެސް ވަޒީރުން ވަނީ ގޮވައިލައްވައިފައެވެ. އަދި ޣައްޒާއަށް އިންސާނީ އެހީ ފޯރުކޮށްދިނުމަށް ޢިސްރާއީލުން ހުރަސް އެޅުންވެސް ނިންމުމަކަށް ގެނައުމަށް ވަޒީރުން ގޮވައިލައްވައިފައިވެއެވެ.
މީގެ އިތުރުން، ބައިނަލްއަޤްވާމީ ޤާނޫނުތަކަށް ތަބާވުމާއި، ހުރިހާ ފެންވަރެއްގައިވެސް މިފަދަ ޢަމަލުތައް ހުއްޓުވުމުގެ މުހިންމުކަން ފާހަގަކުރައްވައި، ޚާރިޖީ ވަޒީރުން ވަނީ ފަލަސްތީނުގެ ރައްޔިތުން މަޖުބޫރުން އެމީހުންގެ ގެދޮރުން ނެރުމާ ދެކޮޅަށް ވަރަށް ވަރުގަދައަށް ވާހަކަދައްކަވައިފައެވެ.
ސަޢުދީ ޢަރަބިއްޔާގެ ޚާރިޖީ ވަޒީރް ފައިސަލް ބިން ފަރުޙާން ޗެއާމަންކަން ކުރައްވާ މި ވަފުދުގައި ހިމެނެނީ ޤަޠަރުގެ ޚާރިޖީ ވަޒީރު އަދި ބޮޑުވަޒީރު މުޙައްމަދު ބިން ޢަބްދުއްރަޙްމާން ބިން ޖާސިމް އަލް ޘާނީ އާއި ޢުރުދުންގެ ޚާރިޖީ ވަޒީރު އަދި ބޮޑުވަޒީރު އައިމަން އަލް ސަފްދީ އާއި މިޞްރުގެ ޚާރިޖީ ވަޒީރު ސަމީހު ޝުކްރީ އާއި ފަލަސްޠީނުގެ ޚާރިޖީ ވަޒީރު ރިޔާދު އެލް މަލްކީ އަދި ތުރުކީވިލާތުގެ ޚާރިޖީ ވަޒީރު ހަކާން ފިދާންއެވެ.
ހަމަލާތައް ހުއްޓާލުމުގެ ބަދަލުގައި އެމެރިކާއިން ތާޢީދުކުރަނީ އިންސާނީ އެހީ ފޯރުކޮށްދިނުމަށާއި ޣައްޒާގައި ވެރިކަންކުރާ ޙަމާސް ޖަމާޢަތުގެ ބެލުމުގެ ދަށުގައިވާ ޔަހޫދީން މިނިވަންކުރުމަށެވެ. އެމެރިކާގެ އިތުރުން ޔަހޫދީ ދަޢުލަތުންވެސް ވަނީ ހަމަލާތައް ހުއްޓާލުމަށް ދެކޮޅު ހަދާފައެވެ. އެމެރިކާއާއި ޔަހޫދީން ޤަބޫލުކުރާ ގޮތުގައި ހަމަލާތައް ހުއްޓާލުމުން ފައިދާ ވާނީ ޙަމާސަށެވެ. އިނގިރޭސިވިލާތުން ވޯޓުގައި ބައިވެރިވި ނަމަވެސް ޤަރާރުގައި ޙަމާސް ކުށްވެރިކޮށްފައި ނުވާ ކަމަށް ބުނެ އެ ޤައުމުން ވަކި ކޮޅަކަށް ވޯޓެއް ނުދެއެވެ.
އެމެރިކާއިން ވާގިވެރިވެގެން އޮކްޓޫބަރު ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ޢުދުވާނީ ޙަމަލާތަކުގައި މިހާތަނަށް 17،500 މީހުން ވަނީ ޝަހީދުކޮށްލައިފައެވެ.