ޣައްޒާގެ ހަނގުރާމަ ނިމުމަކަށް ގެނައުމަށް ހައްލެއް ހޯދުމުގެ މަގުސަދުގައި އަރަބި ލީގުން ޗައިނާގައި ބޭއްވި ބައްދަލުވުމަށް ފަހު، ރަޝިއާއަށް ވަޑައިގެންފިއެވެ.
ވަފާ ނޫހުން ރިޕޯޓުކޮށްފައިވާ ގޮތުގައި އަރަބި ލީގުގެ ވަޒީރުން ވަނީ ރަޝިއާގެ ޚާރިޖީ ވަޒީރު ސާގޭ ލަވްރޯވްއާ ރަޝިއާގެ ވެރި ރަށް މޮސްކޯގައި ވަނީ ބައްދަލުކުރައްވައިފައެވެ. އެ ބައްދަލުކުރެއްވުމުގައި ޣައްޒާގެ ހާލަތާ ބެހޭ ގޮތުން ވަނީ މަޝްވަރާކޮށްފައެވެ.
އަރަބި ލީގުން މަސައްކަތް ކުރަނީ ހަނގުރާމަ ހުއްޓާލުމަށް ބާރުއަޅައި، ޣައްޒާގައި އާންމުން ހިމާޔަތްކޮށް، އިންސާނީ އެހީތެރިކަން ޣައްޒާއަށް ފޮރުކޮށްދިނުމާ، ފަލަސްތީނު މައްސަލައަށް އިންސާފުވެރި އަދި ފުރިހަމަ ހައްލެއް ހޯދުމަށެވެ.
ފަލަސްތީނުގެ އަމިއްލަ ދައުލަތެއް ގާއިމްކުރުމާ ގުޅޭ މަޝްވަރާގެ މަރުހަލާ އަލުން ފެށުމަށް ތައްޔާރީތައް ވުމަށް އެ ބައްދަލުވުމުގައި ލަވްރޯވް ވަނީ ގޮވައިލައްވައިފައެވެ. އަދި، ޣައްޒާއަށް މިހާރު ލިބެމުންދާ އިންސާނީ އެހީ އަކީ ޣައްޒާގެ އާބާދީއަށް ފުދޭވަރަށްވުރެ މާ މަދު އެހީއެއް ކަމަށް ވެސް ލަވްރޯވް ވަނީ ފާހަގަކުރައްވާފައެވެ. މެދުއިރުމަތީގެ ސުލްހައިގެ މަރުހަލާގެ މަސައްކަތްތައް ކުރިއަށް ނުގެންދެވުނު ސަބަބަކީ އަރަބި ދުނިޔޭގެ މަންދޫބުން ނެތުމުން ކަމަށް ލަވްރޯވް ވިދާޅުވިއެވެ.
އަރަބި ލީގުގެ ކޮމިޓީގެ މެންބަރުން ވަނީ ޣައްޒާގައި ހިނގަމުންދާ އަނިޔާވެރިކަން ވަގުތުން ހުއްޓުވުމަށް ސަލާމަތީ މަޖިލީހާއި ބައިނަލްއަޤުވާމީ މުޖުތަމައުގެ މެންބަރުން ފައިދާހުރި އަވަސް ފިޔަވަޅުތައް އެޅުމުގެ މުހިންމުކަން ފާހަގަކުރައްވައި، މިއީ ހުރިހާ އަރަބި އަދި އިސްލާމީ ގައުމުތަކުން އިސްކަންދޭ ކަމެއް ކަމަށް ފާހަގަކޮށްފައެވެ.
ޣައްޒާ ބަންދުކޮށްފައި އޮތް އޮތުން އުވާލައި، ގައިދީންނާއި ރަހީނުން ދޫކޮށްލައި، ދުނިޔެ ގަބޫލުކުރާ ފަދަ ސީރިއަސް އަދި އިންސާފުވެރި ސުލްހައިގެ މަރުހަލާއެއް އަލުން ފެށުމުގެ މުހިންމުކަން ވެސް ކޮމިޓީން ފާހަގަކުރިއެވެ.
އަދި، އިސްރާއީލުގެ އިސްތިއުމާރުން އަންނަނީ ބައިނަލްއަޤުވާމީ ގާނޫނުތަކާއި ގަވާއިދުތަކާއި ހިލާފުވަމުން ކަމަށާއި، މިއީ ބައިނަލްއަޤުވާމީ ގާނޫނުތަކުގެ ބަލިކަށިކަން ދޭހަވާ ކަމެއް ކަމަށް ވެސް ކޮމިޓީން ބުނެއެވެ. ކުރިއަށް އޮތްތަނުގައި ސުލްހައާއި ސަލާމަތާއި ސަރަހައްދީ ހަމަޖެހުން ދެމެހެއްޓުމުގެ ޤާބިލުކަން އެ ގާނޫނުތަކަށް ލިބިފައި ނެތް ކަމަށް ވެސް ކޮމިޓީން ވަނީ ފާހަގަކޮށްފައެވެ.
ޣައްޒާއަށް ބޭނުންވާ މިންވަރަށް އިންސާނި އެހީ ފޯރުކޮށްދިނުމާއި، ޣައްޒާގެ އާންމުންގެ އަސާސީ ހައްގުތައް އިސްރާއީލުން ނިގުޅައިގެންފައިވާއިރު، އެއީ ކަނޑައެޅިގެން ބައިނަލްއަޤުވާމީ އިންސާނީ ގާނޫނުތަކާ ހިލާފުވުން ކަމުގައި ވެސް އަރަބި ލީގުގެ ކޮމިޓީން ބުނެއެވެ.
އަރަބި ލީގުގެ ވަޒީރުންގެ ކޮމިޓީގެ އިސްވެރިޔަކީ ސައުދީގެ ހާރިޖީ ވަޒީރު ފައިސަލް ބިން ފަރުހާނެވެ. އެ ކޮމިޓީގައި ސައުދީގެ މިނިސްޓަރު އޮފް ފޮރިން އެފެއާޒް އެންޑް އެކްސްޕެޓްރިއޭޓްސް، ރިޔާދު މަލްކީ، އުރުދުންގެ ޚާރިޖީ ވަޒީރު އައިމަން ސަފާދީ، މިސްރުގެ ޚާރިޖީ ވަޒީރު ސަމެހް ޝުކްރީ، އިންޑޮނޭޝިއާގެ ޚާރިޖީ ވަޒީރު ރެޓްނޯ މާސޫދީ، އަދި އޮގަނައިޒޭޝަން އޮފް އިސްލާމިކް ކޯޕަރޭޝަންގެ ސެކްރެޓަރީ ޖެނެރަލް ހުސެއިން އިބްރާހިމް ޠާހާ ހިމެނެއެވެ.