ސްޕޯޓްސް ކޮމިޝަނަރުގެ މަގާމަށް އެތުލެޓިކްސް އެސޯސިއޭޝަންގެ ކުރީގެ ރައީސް މުހައްމަދު ތޮލާލް މިއަދު އައްޔަންކުރައްވައިފިއެވެ.
ސްޕޯޓްސް ކޮމިޝަނަރުގެ މަގާމަށް އޭނާ އައްޔަންކުރައްވައި، ރައީސް ޑރ. މުހައްމަދު މުއިއްޒުވަނީ ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ތޮލާލަށް މަގާމުގެ ފަތްކޮޅު ހަވާލުކުރައްވައިފައެވެ.
"ސަން"އަށް އެނގިފައިވާ ގޮތުގައި ތޮލާލް ވަނީ ސްޕޯޓްސް ކޮމިޝަނަރުގެ މަގާމާ ހަވާލުވެވަޑައިގަތުމަށް މިއަދުގެ ވަގުތެއްގައި އެތުލެޓިކްސް އެސޯސިއޭޝަންގެ ރައީސްކަމުން އިސްތިއުފާދެއްވައިފައެވެ.
މީގެ ކުރިން ތޮލާލް ވަނީ އެތުލެޓިކްސް އެސޯސިއޭޝަނަށް ގިނަ ޚިދުމަތްތަކެއް ކޮށްދެއްވައިފައެވެ.
އެގޮތުން އޭނާވަނީ އެތުލީޓުން އުފެއްދުމާއި ރާއްޖެއިން ބޭރުން ތަމްރީނު ޕްރޮގްރާމުތައް ހޯއްދަވައިދެއްވުމުގައި އިސް ދައުރެއް އަދައިކުރައްވައިފައެވެ. ހަމައެއާއެކު ތޮލާލް ވަނީ 2012 ވަނަ އަހަރުން ފެށިގެން މެދުކެނޑުމެއްނެތި އެ އެސޯސިއޭޝަންގެ ރައީސްކަމުގެ މަގާމު އަދައިކުރައްވައިފައެވެ.
ސިޔާސީ ގޮތުން، ޕީޕީއެމްގެ ސެކްރެޓަރީ ޖެނެރަލްގެ މަގާމުގައި ހުންނެވި ތޮލާލް ވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި ހޯމް މިނިސްޓްރީގެ ޑެޕިއުޓީ މިނިސްޓަރުކަމުގެ މަގާމު އަދައިކުރައްވައިފައެވެ.