ރާއްޖޭގައި ފެހުރިހި ހިމާޔަތްކޮށް ރައްކާތެރިކުރުމަކީ ތިމާވެށި ހިމާޔަތްކޮށް ދެމެހެއްޓުމާ ބެހޭ ގާނޫނުގެ ދަށުން ކުރާ ކަމެއްގެ ގޮތުގައި ބަދަލު ކުރެއްވުމަށް ރައީސް އިބްރާހީމް މުހައްމަދު ޞާލިހް މިއަދު ނިންމަވައިފިއެވެ.
އެ މަނިކުފާނު މިގޮތަށް ނިންމެވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ވަޒީރުންގެ މަޖިލީހުގެ ޖަލްސާގައެވެ.
ފެހުރިހި ހިމާޔަތްކޮށް ރައްކާތެރިކުރުން ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނު (ޤާނޫނު ނަންބަރު: 04/93)ގެ ދަށަށް ބަދަލުކުރުމަށް ނިންމަވާފައިވަނީ ފެހުރިއްސަކީ މަސްވެރިކަމާއި ގުޅުންހުރި ދިރުމެއް ނޫން ކަމަށް ވާތީއެވެ.
އަދި، ފެހުރިހި އެންމެ ރަނގަޅަށް ދެމެހެއްޓޭނީ ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގެ ދަށުން ކަމަށްވާތީ ކަމަށް މަޖިލީހަށް ހުށައެޅި ކަރުދާހުގައި ފާހަގަ ކުރައްވާފައިވެއެވެ.
ފެހުރިއްސަކީ 2016 ވަނަ އަހަރު ނެތިދިޔުމުގެ ބިރުހީވެފައިވާ ދިރުމެއް ގޮތުގައި ކަނޑައަޅާފައިވާ ދިރުމެކެވެ. ހަމައެހެންމެ ރާއްޖޭގައި ފެހުރިއްސަށް ބޮޑެތި ގެއްލުންތަކެއް ލިބެމުންދެއެވެ.
ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގެ ދަށުން މި ދިރުން ހިމާޔަތް ކުރުމުން، މި ދިރުމަށް ލިބޭ ގެއްލުންތައް މަދުވެ، ތިމާވެށީގެ ގޮތުންނާއި އިޤްތިޞާދީގޮތުން އަދި އިޖުތިމާޢީ ގޮތުން ވެސް ގިނަގުނަ ފައިދާތައް ލިބިގެންދާނެ ކަމެއްކަން ވަޒީރުންގެ މަޖިލީހަށް މިއަދު ހުށަހެޅި ކަރުދާހުގައި ފާހަގަކޮށްފައިވެއެވެ.