ފަލަސްތީނުގައި ހާލުގައި ޖެހިފައިވާ މުސްލިމުންނަށް އެހީތެރިކަން ފޯރުކޮށްދިނުމުގެ ގޮތުން ކުޑަކުޑަ އާބާދީއެއް އޮންނަ ރ. ވާދޫން 41،000އަށް ވުރެ ގިނަ ރުފިޔާ ހަދިޔާކުރަން ނިންމައިފިއެވެ.
މި ފައިސާ ހޯދީ އެންމެ 415 އެއްހާ މަދު މީސްކޮޅެއް ދިރިއުޅެމުން އަންނަ އެ ރަށުގެ ޒުވާނުންތަކެއް އިސްވެ ބޭއްވި ފަންޑް ހޯދުމުގެ ހަރަކާތެއްގައެވެ.
އެރަށުގައި ހުކުރު ދުވަހު، ފަލަސްތީނުގެ ރައްޔިތުންނަށް އެހީވުމަށް ފަންޑު ހޯދުމުގެ ހަރަކާތާ އެކު އެއްވުމެއްގެ އިތުރުން ހިނގާލުމެއް ވެސް ވަނީ ބާއްވާފައެވެ.
ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީތެރިވުމަށް ހުކުރު ދުވަހުގެ ހެނދުނުން ފެށިގެން ހަވީރުގެ ނިއަލަށް ވާދޫގައި ވަނީ ފަންޑުފޮށްޓެއް ބަހައްޓާފައެވެ. އެ ފަންޑުފޮށްޓަށް 41،453 ރުފިޔާ ވަނީ ޖަމާކޮށްފައެވެ.
މީގެ އިތުރުން، ރަށުގެ ކުދިބޮޑު ރައްޔިތުން ބައިވެރިވި އެއްވުމަކާއި ހިނގާލުމެއް އެ ރަށުގައި ކުރިއަށް ގެންދިޔައެވެ. މި އެއްވުމާއި ހިނގާލުމުގެ ބައިވެރިން ވަނީ ފަލަސްތީނު މިނިވަންކުރުމަށް ގޮވާލާ އަޑުއުފުލާފައެވެ. އަދި "ޓެރަރިސްޓު އިސްރާއީލު" ނެތިކުރައްވައި އެ މީހުންނަށް ލައުނަތްލެއްވުމަށާއި ފަލަސްތީނަށް ނަސްރު ދެއްވުމަށް އެދި ހާއްސަ ދުޢާއެއް ކޮށްފައެވެ.
ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީތެރިވުމަށް ހުކުރު ދުވަހު ރ. ވާދޫގައި ބޭއްވި އެއްވުމުގެ ތެރެއިން--
އެއްވުމާއި ހިނގާލުމުގެ ބައިވެރިން ތިބީ އެކިއެކި ޝުއޫރުތައް ލިޔެފައިވާ ބޯޑުތަކާއި ފަލަސްތީނުގެ ދިދަ ފަދަ ތަކެތި ހިފައިގެންނެވެ.
މި ހަރަކާތަކީ ރ. ވާދޫ ކައުންސިލް ނުވަތަ އެއްވެސް މަދަނީ ޖަމިއްޔާއަކާ ގުޅިގެން ކުރިއަށްގެންދިޔަ ހަރަކާތެއް ނޫން ކަމަށާއި އެހެން ނަމަވެސް އާންމު ފަރުދުންނާއި ބައެއް ވިޔަފާރިތަކުގެ އެހީ މިކަމުގައި ލިބިފައިވާ ކަމަށް ހަރަކާތް އިންތިޒާމް ކުރި ޒުވާނުން މައުލޫމާތު ދީފައިވެއެވެ.
މި މަހުގެ ހަތްވަނަ ދުވަހު ފަލަސްތީނުގެ ހަމާސް ޖަމާއަތުން އިޒްރޭލަށް ދިން ކުއްލި ހަމަލާއަށް ފަހު އިޒްރޭލުން ވަނީ ފަލަސްތީނާ ދެކޮޅަށް ހަނގުރާމަ އިއުލާނުކޮށްފައެވެ. އެއަށް ފަހު، ބަދަލު ކުރަމުންދާ ހަމަލާތަކުގައި ފަލަސްތީނަށް ބޮޑެތި ގެއްލުންތަކެއް ލިބި، އެތައް ބަޔަކު ވަނީ ޝަހީދު ކޮށްލައިފައެވެ.
މި ހަމަލާގައި ހާލުގައި ޖެހިފައިވާ ފަލަސްތީނުގެ މުސްލިމުންނަށް އެހީތެރިކަން ފޯރުކޮށްދިނުމަށް ރާއްޖޭގައި ވެސް އަންނަނީ ވަރަށް ބައިވަރު ކަންކަން ކުރަމުންނެވެ. އެގޮތުން މަދަނީ ޖަމިއްޔާތަކުން އިސްނަގައިގެން ފަންޑް ރެއިޒިންގެ ހަރަކާތްތައް ބާއްވަމުން އަންނަ އިރު އަމިއްލަ ފަރާތްތަކުން ވެސް އަންނަނީ ވެދެވުނު އެހީތެރިކަން ފޯރުކޮށްދެމުންނެވެ.
ހުއްޓުމެއް ނެތި ޔަހޫދީން ދެމުންދާ ހަމަލާތަކުގެ ސަބަބުން މިހާތަނަށް ފަލަސްތީނުގެ 4،000 އަށްވުރެ ގިނަ މީހުން ޝަހީދުވެފައިވާއިރު 15،000 އަށްވުރެ ގިނަ މީހުން ވަނީ ޒަޚަމްވެފައެވެ.