ކުޑަ އިންޖީނު ދޯންޏެއްގައި ހޮނިހިރު ދުވަހު މަހަށް ނިކުމެ އުޅެނިކޮށް ގެއްލުނު އދ. ދަނގެތި، ޔޫސުފް އިބްރާހީމް ހޯދުމަށް ޑައިވްކޮށްގެން 78،850 މީޓަރުގެ ސަރަހައްދެއް ބެލުނު އިރުވެސް އޭނާ ނުފެންނަ ކަމަށް އެމްއެންޑީއެފުން މިއަދު ބުނެފިއެވެ.
އެމްއެންޑީއެފުން މިއަދު ނެރުނު ބަޔާނުގައި ބުނީ، ޔޫސުފް އިބްރާހިމް ހޯދުމަށް ވައިގެ މަގުން އެމްއެންޑީއެފްގެ މަތިންދާ ބޯޓު ޑޯނިއާ ބޭނުންކޮށްގެން 156.87 ނޯޓިކަލް މޭލު ބަލާފައިވާކަމަށެވެ. އަދި ކަނޑު މަގުން ކޯސްޓްގާޑުގެ ފާސްޓު އިންޓަ ސެޕްޓާ ކްރާފްޓު "ހަކުރާ" ވަނީ 4.11 ނޯޓިކަލް ކިލޯ މީޓަރު ބަލާފައިވާ ކަމަށް ބުންޏެވެ.
އެމްއެންޑީއެފުން ބުނީ މި މަސައްކަތުގައި ދަނގެތީގެ ރައްޔިތުންގެ އެއްބާރުލުން ވަރަށް ބޮޑަަށް ލިބިގެންދާ ކަމަށެވެ. އެގޮތުން އިއްޔެގެ ޑައިވްގައި ދަނގެތީގެ ޑައިވަރުންތަކެއް ބައިވެރިވެފައިވާ ކަން ފާހަގަކުރިއެވެ.
އުމުރުން 65 އަހަރަށް ވުރެ މަތިވެފައިވާ ޔޫސުފް އިބްރާހީމް ގެއްލުނުކަން ކައުންސިލާއި އާއިލާ އަދި އެރަށު މީހުންގެ ސަމާލުކަމަށް އައީ އޭނާ މަަހަށް ދިޔަ ދޯނި ހުސްކޮށް ރަށު ކައިރިން ފެނުމުންނެވެ.
އޭނާ ގެއްލުނުކަން ސިފައިންނަށް ރިޕޯޓުކޮށްފައި ވަނީ ހޮނިހިރު ދުވަހުގެ މެންދުރު 11:42 ހާއިރެވެ. އަދި ވަގުތުން ވަނީ އޭނާ ހޯދުމުގެ މަަސައްކަތް ފަށާފައެވެ.