މިރޭ ހިޔާ ފްލެޓަކުން ވެއްޓި ޒަޚަމްވި ކުއްޖާ ނިޔާވެއްޖެއެވެ.
ހުޅުމާލެ ހޮސްޕިޓަލުން ވަނީ ކުއްޖާ ނިޔާވެފައިވާކަން "ސަން"އަށް ކަށަވަރުކޮށްދީފައެވެ. އެގޮތުން ކުއްޖާ މަރުވިކަން ކަނޑައަޅާފައި ވަނީ 12:42ހާއިރު ކަމަށް އެ ހޮސްޕިޓަލުން ބުންޏެވެ.
"ސަން"އަށް އެނގިފައިވާ ގޮތުގައި އެ ކުއްޖާ ވެއްޓި، ޓަވަރު ކައިރީގައި އޮތް ކާރެއްގައި ޖެހުނެވެ. އެ ކާރު ކައިރީ، ބިންމަތީގައި ގިނައިން ލޭ ހުރި ކަމަށް ވެސް މައުލޫމާތު ލިބިފައިވެއެވެ.
ފުލުހުން ބުނީ ހިޔާ ފްލެޓަކުން 15 އަހަރުގެ ފިރިހެން ކުއްޖަކު ވެއްޓުނު ކަމުގެ މައުލޫމާތު މިރޭ 11:58ހާއިރު ލިބިފައިވާ ކަމަށެވެ. އެ ކުއްޖާ ވެއްޓިފައި ވަނީ ހަ ވަނަ ޓަވަރުގެ 12 ވަނަ ފަންގިފިލާއިން ކަމަށް ފުލުހުން ބުންޏެވެ.
އެ ކުއްޖާ ހުޅުމާލެ ހޮސްޕިޓަލަށް ގެންގޮސްފައިވާ ކަމަށާއި ކުއްޖާގެ ހާލަތާ ގުޅޭ ގޮތުން ހޮސްޕިޓަލުން މިހާތަނަށް މައުލޫމާތު ހިއްސާކޮށްފައިނުވާ ކަމަށް ވެސް ފުލުހުން ބުންޏެވެ.
ފުލުހުން ވަނީ އެ މައްސަލަ އިތުރަށް ތަހުގީގުކުރަމުންދާ ކަމަށް ބުނެފައެވެ.