ބ. ތުޅާދޫގައި ސަރުކާރުން އިމާރާތްކުރާ ހޮސްޕިޓަލްގެ ބިންގާ މިއަދު އަޅައިފިއެވެ.
މިއަދު ބޭއްވި ރަސްމިއްޔާތެއްގައި އެ ހޮސްޕިޓަލްގެ ބިންގާ އަޅުއްވައިދެއްވީ ހެލްތު މިނިސްޓަރު އަހްމަދު ނަސީމާއި އެމްޓީސީސީގެ ސީއީއޯ އާދަމް އާޒިމާއި ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިނާއި ތުޅާދޫ ކައުންސިލްގެ ރައީސް އިބްރާހީމް އާދިލެވެ.
ތުޅާދޫއަކީ 3000އަށްވުރެ ގިނަ މީހުންގެ އާބާދީއެއް އޮންނަ ރަށެކެވެ. 18 އަހަރު ކުރިން އެރަށުގައި ސިއްހީ ޚިދުމަތް ފެށިއިރު މިއަދާ ހަމައަށްވެސް ދެމުން އައި އެންމެ އަސާސި ފެންވަރުގެ ސިއްހީ ޚިދުމަތްތަކެވެ.
ބޮޑެތި ބަލިތަކަށް ފަރުވާ ނުދެވި މިދިޔަ ހުރިހާ އަހަރުތަކެއްގައި ތުޅާދޫގެ ރައްޔިތުން ތިބީ މާޔޫސްވެފައެވެ.
ސަރުކާރުގެ ސިޔާސަތާ އެއްގޮތަށް ސިއްހީ ފަރުވާއަށް މާލެއަށް ބަރޯސާވުން ނިމުމަކަށް އަންނާނެކަމަށް ތުޅާދޫގެ ރައްޔިތުން ގަބޫލުކުރެއެވެ. މި މަޝްރޫއުގެ ސަބަބުން އަތޮޅުގެ ހުރިހާ ރަށަކަށްވެސް ރަނގަޅު ފެންވަރުގައި ސއިްހީ ޚިދުމަތް ފޯރުކޮށްދެވޭނެއެވެ. އަދި މި އެޅޭ އައު ހޮސްޕިޓަލާއެކު ތުޅާދޫގެ ޒުވާނުންނަށް ވަޒީފާގެ ފުރުސަތުތައް ފަހިވާނެއެވެ.
މި މަޝްރޫއަކީ ސަރުކާރުގެ ބަޖެޓުން 124 މިލިއަން ރުފިޔާ ޚަރަދުކޮށްގެން ހިންގާ މަޝްރޫއެކެވެ. މި މަޝްރޫއު ހަވާލުކޮށްފައިވަނީ 18 މަސް ދުވަހުގެ ތެރޭގައި ނިންމާގޮތަށެވެ.
މި ރަސްމިއްޔާތުގައި ވާހަކަދައްކަވަމުން ތުޅާދޫ ދާއިރާގެ މެމްބަރު ހިސާން ހުސައިން ވިދާޅުވީ މިއަދަކީ ތުޅާދޫ ރައްޔިތުން ޒަމާނުއްސުރެ ކުރަމުން އައި ދިގު އިންތިޒާރެއްގައި ކުލަ ޖެހެން ފެށުނު ދުވަސް ކަމަށެވެ.
"ޒަމާނީ ފެންވަރަކަށް އެހެން ރަށްރަށަށް ބަރޯސާނުވެ ރަށުގައި ތިބިގެން ރަނގަޅު ފެންވަރުގެ ސިއްހީ ޚިދުމަތްތައް ލިބުން. އެއީ މި ރަށުގެ ރައްޔިތުން ކޮށްފައިވާ ދިގު އިންތިޒާރެއް. ތުޅާދުއަށް މި އަންނަ ތަރައްގީން ރައްޔިތުންނަށް ލިބޭނެ ފަސޭހައާ ހިތްހަމަޖެހުން އެއްވެސް ބަޔަަކަށް އޮޅުވައެއް ނުލެވޭނެ،" ހިސާން ވިދާޅުވިއެވެ.
އެ ރަސްމިއްޔާތުގައި ވާހަކަދައްކަވަމުން ހެލްތު މިނިސްޓަރު އަހްމަދު ނަސީމް ވިދާޅުވީ ސިއްހީ ޚިދުމަތުގެ ފެންވަރު ރަނގަޅުވާނީ މީހުން ހޭލުންތެރިވެގެން ކަމަށެވެ.
"އުމްރާނީ މަސައްކަތަކުން ނޫން ސިއްހީ ޚިދުމަތުގެ ފެންވަރު ރަނގަޅު ވަނީ. އެއީ ޤައުމީ ކަމެއް. އެންމެން ސިއްހީ ކަންކަމަށް ހޭލުންތެރިވެެގެން މިކަން ވާނީ. ސިއްހީ ވުޒާރައިން އެކަނި ނޫން ހޭލުންތެރިކުރުމުގެ ކަންކަން ކުރިއަށް ގެންދަވާނީ،" މިނިސްޓަރު ވިދާޅުވިއެވެ.
ތުޅާދޫގައި ގާއިމްކުރާ ހޮސްޕިޓަލުގެ މަަސައްކަތް ހަވާލުކޮށްފައިވަނީ އެމްޓީސީސީއާއެވެ. ހޮސްޕިޓަލުގެ އަމަލީ މަސައްކަތް ފެށުމުގެ ރަސްމިއްޔާތުގައި ވާހަކަދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މި މަސައްކަތް އެ ކުންފުނިން ފަށަނީ ކަނޑައެޅިފައިވާ 18 މަސްދުވަހުގެ ތެރޭގައި ނިންމުމުގެ އަޒުމުގައި ކަމަށެވެ.