މިއަދުގެ ހުކުރު ޚުތުބާގައި ލިޔެފައިވަނީ ތަފްސީރު ފޮތްތަކުގައި ލިޔުއްވާފައިވާ ވާހަކައެއް ކަމަށާއި އެއީ ރަސޫލާގެ ޙަދީޘެއް ކަމަށް ޚުތުބާގައި ނުވާނެ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު ވިދާޅުވެއްޖެއެވެ.
މިއަދުގެ ޚުތުބާގައި ސާބިތު ނުހިފޭ ވާހަކަތަކެއް ލިޔުއްވާފައިވާ ކަމަށް ބުނެ ސޯޝަލް މީޑިއާގައި ގިނަ ބަޔަކު ވަނީ ކޮންބޮޑުވުން ފާޅުކޮށްފައެވެ. އޭގެ ތެރޭގައި ބައެއް ޢިލްމުވެރިން ވެސް ހިމެނިވަޑައިގެނެވެ.
އެގޮތުން ޚުތުބާގައި ލިޔެފައި ވަނީ، "ނޫހުގެފާނާއި އެކަލޭގެ ފާނަށް އީމާންވީ މީހުން ތޫފާނުން ސަލާމަތް ކުރެއްވީ އާޝޫރާ ދުވަހުގައެވެ. އިބްރާހީމްގެފާނު އަންދާލުމަށް ލަޢުނަތް ލެއްވި ނަމްރޫދު ރީކުރި އަލިފާންގަނޑުން އިބްރާހީމްގެފާނު ސަލާމަތް ކުރެއްވީ އާޝޫރާ ދުވަހުއެވެ. ޔޫސުފްގެފާނުގެ އަޚުންގެ ނުބައި ރޭވުންތަކުން ޔޫސުފްގެފާނު ސަލާމަޔްކުރެއްވުމަށް ފަހު އެކަލޭގެފާނު ބަފައިކަލުން ޔަޢުގޫބުގެފާނާ އަލުން ބައްދަލުވަޑައިގަތީ އާޝޫރާ ދުވަހުއެވެ. ޔޫނުސްގެފާނު މަހުގެ ބަނޑުތެރެއިން ސަލާމަތްވެ ވަޑައިގަތީ އާޝޫރާ ދުވަހުއެވެ. އައްޔޫބުގެފާނު އިމްތިހާނު ކުރެއްވުމުގެ ގޮތުން އެކަލޭގެފާނަށް ޖެއްސެވި ދިގު މުއްދަތުގެ ބޮޑު އާލާސްކަންފުޅުން، އެކަލޭގެފާނު ސަލާމަތްކުރެއްވީ އާޝޫރާ ދުވަހުއެވެ،" މިހެންނެވެ.
މި ކަމުގެ ކަންބޮޑުވުން ފާޅުކުރައްވާ މަޝްހޫރު ދީނީ އިލްމުވެރިޔާ އަދި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެފައިވަނީ ޢާޝޫރާ ދުވަހާ ގުޅިގެން ސާބިތު ވަނީ އެއީ މޫސާގެފާނު ފިރުޢައުނު ކިބައިން ސަލާމަތްވި ދުވަސްކަމުގައި ކަމަށެވެ.
އަދި، އެ ނޫން ނަބީބޭކަަލުންނާ އެ ދުވަހާ ގުޅުވައިގެން ބައެއް ފޮތްތަކުގައި އައިސްފައިވާ ކަމަށް ޚުޠުބާގައި ބަޔާންކޮށްފައިވާ ވާހަކަތަކަކީ ޞައްޙަ ވާހަކަ ތަކެއް ނޫން ކަމަށް އޭނާ ވިދާޅުވެފައި ވެއެވެ.
މި ވާހަކަތަކަށް ރައްދު ދެއްވައި މިރޭ "ސަން"އާ ވާހަކަ ދައްކަވަމުން މިނިސްޓަރު ވިދާޅުވީ، ޚުތުބާއަކީ އެންމެ މީހަކު ލިޔުއްވާ އެއްޗެއް ނޫންކަމަށެވެ.
މިނިސްޓަރު ވިދާޅުވީ، ޚުތުބާ ލިޔުއްވަނީ ޢިލްމުވެރިން ކަމަށެވެ. އަދި ޚުތުބާ ލިޔުމަށް ފަހު ކުށެއް ވޭތޯ ޚުތުބާ ކޮމިޓީން ބައްލަވާ ކަމަށާއި އެއްއަށްފަހު މިނިސްޓަރު ވެސް ޚުތުބާ ބައްލަވާކަމަށް އޭނާ ވިދާޅުވިއެވެ.
"ދެން އަޅުގަނޑުމެންގެ ސަމާލުކަމަށް އައިސްގެން ވެސް ބަލާލިން. ރަސޫލާއަށް ނިސްބަތް ކުރައްވާ ހަދީޘްއެއް ކަމަކަށް ނޫން ޚުތުބާގައި ލިޔުއްވާފައި އޮތީ،" މިނިސްޓަރު ވިދާޅުވިއެވެ.
"ތަފްސީރު ފޮތްފޮތުގަ ތަފްސީރު އިލްމުވެރިން މިގޮތައް ވެސް އެބަހުއްޓޭ ވާހަކަ ދައްކަވާފަ ކިޔާފަ ގެނެސްފަ އިންނާނީ،" އޭނާ ވިދާޅުވިއެވެ.
މިނިސްޓަރު ޒާހިރު، ވިދާޅުވީ ކުރިއަށް އޮތް ތަނުގައި ވެސް ޚުތުބާގެ ކަންކަން މިއަށްވުރެ ހަރުދަނާކޮށް ކުރިއަށް ގެންދަވާނެ ކަމަށެވެ. އަދި، މިހާރު ވެސް ޚުތުބާ ކިޔަނީ ކޮމިޓީތަކުން ފާސްކޮށްގެން ކަމަށް އޭނާ ވިދާޅުވިއެވެ.
ޚުތުބާގައި ސާބިތު ނުހިފޭ ވާހަކަތަކެއް ލިޔެފައިވާ ކަމަށް ބުނެ، ބައެއް އިލްމުވެރިން ވަނީ އެ ކަމުގެ ކަންބޮޑުވުން ފާޅުކޮށްފައެވެ.