ރ. މީދޫން ޢާލިމް އަބްދުއްލަތީފް
ރ. މީދޫގައި އީދު ހަރަކާތްތައް ފެށުމަށް ހުއްދަ ހޯދުމަށް އިއްޔެ ވެދުމާ ދިއުމުގެ ހަރަކާތް ބާއްވައި މިރޭ ވެސް ގިނަ ކުޅިވަރުތަކެއް ބާއްވަން ޕްލޭން ކޮށްފިއެވެ.
މި ރަށުގައި އީދު ހަރަކާތްތައް ފެށުމުގެ ކުރިން މިދިޔަ އާދީއްތަ ދުވަހުގެ ރޭ ބޮޑު ބާބަކިއުއެއް ވަނީ ބާއްވައިފައެވެ. ރައްޔިތު އެންމެން ބައިވެރިވި ބާބަކިއު ވަރަށް ފޯރީގައި ވަނީ ކުރިއަށް ގެންގޮސްފައެވެ.
މިއީ އީދު ފެށުމުގެ ކުރިން ރައްޔިތުންގެ މެދުގައި އެއްބައިވަންތަކަން އާލާކުރުމަށް ބޭއްވި ހަރަކާތެކެވެ. މި އިވެންޓު މިރޭ 9:30ގައި އެސްއެސްޓީވީން ފެންނާނެއެވެ.
އިއްޔެ މި ރަށުގައި ވަނީ ވެދުމާ ދިއުމުގެ ހަރަކާތް ވެސް ބާއްވައިފައެވެ. އިއްޔެ ހަވީރު ބޭއްވި އެ ހަރަކާތަކީ ވަރަށް ފޯރިގަދަ ހަރަކާތެކެވެ.
މި ރަށު އިރުމަތީ އަވަށުގައި އީދު ހަރަކާތްތައް ހިންގާ ޖަމިއްޔަތުއް ޞަލާހުގެ އޮފީހުން ބެރާއި ލަވައިގައި ހިނގައިގަތީ 4:30ގައެވެ.
ބެރުޖަހައި ލަވަ ކިޔައި އެއާ އެއްވަރަށް ފައި ހަމަ ކުރަމުން ދަނޑިއާއި މާފަތީގައި ނަށަމުން ބޮޑެތި މަގުތަކުގައި ހިނގައިފައި ދިޔައީ ކައުންސިލް އިދާރާ ކައިރިއަށެވެ.
އެ ތަނަށް ގޮސް، ޖަމިއްޔާގެ އިސް މީހަކު ކައުންސިލުގެ ރައީސްގެ އަރިހުގައި އީދު ކުޅިވަރު ފެށުމުގެ އިޒުނައަށް އެދުނެވެ. ކައުންސިލްގެ ރައީސް ވަނީ އީދު ކުޅިވަރު ކުޅުމުގެ ހުއްދަ ރަސްމީކޮށް ޖަމިއްޔާއަށް އަރުވައިފައެވެ.
އީދު ވެދުމާ ދަނީ --
އީދު ވެދުމާ ދިއުމުގެ ހަރަކާތް، މިރޭ 10:00ގައި އެސްއެސްޓީވީން ގެނެސްދޭނެއެވެ.
މިރޭ ވެސް މި ރަށުގައި ގިނަ ހަރަކާތްތަކެއް ރޭވިފައި އެބައޮތެވެ. އެ ގޮތުން، 8:30ގައި ކަރުދާސްމާލި ކުޅުން، 9:00ގައި ރަދުން ހިއްޗަށްވަޑައިގަތުމާއި 11:00ގައި ފަންމާލި ކުޅުމެވެ.