މުސްލިމުންގެ މެދުގައި ބައިބައިވުން އުފެދޭ ކަންތައްތަކުން ދުރުހެލިވެ، އެއްބައިވަންތަ ބައެއްގެ ގޮތުގައި ދިރިއުޅުމަށް މިއަދުގެ ޙައްޖު ޚުތުބާގައި ގޮވާލައިފިއެވެ.
ޙައްޖު ޚުތުބާ އިއްވަވަމުން، މަސްޖިދުއްނަމިރާގެ އިމާމް ޝައިޚް ޑރ. ޔޫސުފް ބިން މުޙައްމަދު ބިން ސަޢީދު ވިދާޅުވީ މީހެއްގެ ހަމުގެ ކުލައިގެ ސަބަބުން ނުވަތަ ނަސްލުގެ ސަބަބުން އެކަކު އަނެކަކަށް ވުރެ މާތްނުވާ ކަމަށެވެ. އެއާ ޚިލާފަށް، އެއް ބަޔަކު އަނެއް ބަޔެއްގެ މައްޗަށް މަތިވެރިވެގެން ދަނީ އެ މީހެއްގެ ތަގުވާވެރި ކަމުގެ ސަބަބުން ކަމަށް އޭނާ ވިދާޅުވިއެވެ.
"މީސްތަކުންގެ މެދުގައިވާ ތަފާތަކީ ﷲ ސުބްޙާނަހޫ ވަތަޢާލާ ލައްވަވާފައިވާ ތަފާތެކެއް. އެއީ އެއް ބަޔަކު އަނެއް ބަޔަކު އެކަމާ މެދު ތަޅާފޮޅާ އަރާރުންވާން ޖެހޭނެ ކަންތައްތަކެއް ނޫން. އެކި މީހުންގެ ބަސް، ކުލަ، ގައުމުތައް ތަފާތު ވުމަކީ އެއީ ﷲ ސުބްޙާނަހޫ ވަތަޢާލާ ލައްވާފައިވާ ކަންތައްތަކެއް. އެއީކީ އަޅުގަނޑުމެން އެ ކަންތައްތަކާ މެދު ތަޅާފޮޅާ ހަނގުރާމަ ކުރަން ޖެހޭނެ ކަންތައްތަކެއް ނޫން،" ޝައިޚް ޑރ. ޔޫސުފް ވިދާޅުވިއެވެ.
އިސްލާމް ދީނުގައި އެއްބައިވަންތަ ކަމަށް އިސްކަންދީފައިވާ މިންވަރު ފާހަގަކޮށް ޚުތުބާގައި ވަނީ، މުސްލިމުންގެ މެދުގައި ބައިބައިވުން އުފައްދަން ޝައިތާނާ އާއި ބައެއް މީހުން ވެސް މަސައްކަތް ކުރާނެ ކަމަށެވެ. ނަމަވެސް އެފަދަ ވަސްވާސްތަކުން ރައްކާތެރިވެ ތިބުމަށް ޚުތުބާގައި ގޮވާލިއެވެ. އަދި، އެހެން ނޫންނަމަ މުޅި އުއްމަތަށް ނުރައްކާވާނެކަން ޚުތުބާގައި ހަނދާންކޮށްދިނެވެ.
"މުޖުތަމައު ހަލާކުވެ، ބައިބައިވާ އެންމެހާ ކަންތައްތަކުން ރައްކާތެރިވާން އެބަޖެހޭ. އެއްބައިކުރުވަނިވި ހުރިހާ ކަމެއް ކުރަން ޖެހޭ. އެގޮތުން އާއިލާ އާއި މުޅި މުޖުތަމައު ބައިވެރިވާން ޖެހޭ. އަޅުގަނޑުމެންގެ ތެރޭގައި ޚިލާފެއް އުފެދިއްޖެ ނަމަ ދާން ޖެހެނީ ގުރުއާނުގައިއާއި ކީރިތި ނަބިއްޔާ ދެއްވާފައިވާ އިރުޝާދަކީ ކޮބައިތޯ ބެލުމަށް،" ޚުތުބާގައިވެއެވެ.
އެއާ އެކު ޚުތުބާގައި ވަނީ ކީރިތި ރަސޫލާއަކީ ވެސް އޯގާތެރި، ހިތްޕުޅު ހެޔޮ ބޭކަލެއްކަން ހަނދާންކޮށްދީފައެވެ. އަދި، އިސްލާމްދީނުގައި ކުރަން އަންގަވާފައިވާ އަޅުކަންތަކުން ވެސް މުސްލިމުންގެ އެކުވެރިކަމަށް ދީފައިވާ އަހަންމިއްޔަތުކަން ފާހަގަކުރެވޭ ކަމަށް ޝައިޚް ވިދާޅުވިއެވެ.
އެގޮތުން މައިބަފައިންނަށް ހެޔޮކޮށް ހިތުމަށާއި ނިކަމެތި ފަގީރުންނަށާއި ގާތް އަދި ދުރު އަވަށްޓެރިންނަށް ވެސް އަޅާލުމަށް ދީނުގައި އަންގަވާފައިވާކަން ޚުތުބާގައި ފާހަގަކުރިއެވެ.
"ހައްޖަށް ބަލާލި ނަމަ ވެސް އެކަން ފެނޭ. އެއް ކުލައެއްގެ ހެދުމެއް ލައިގެން، އެއް ވަގުތެއްގައި، އެއް ތަނަކަށް އައިސް، އެއް އިލާހަކަށް ދަންނަވާ ދެންނެވުންތައް ވެސް، މީގެއިން ވެސް ރަމްޒުކޮށްދެނީ އެއްބައިވަންތަކަން،" ޝައިޚް ޑރ. ޔޫސުފް ވިދާޅުވިއެވެ.
މީގެ އިތުރުން ވެރިންނަށް ކިޔަމަންވުމަކީ ވެސް އެއްބައިވަންތަކަމުގެ ތެރޭގައި ހިމެނޭ ކަމެއް ކަމަށް ޚުތުބާއި ބުންޏެވެ. އެގޮތުން އެ މީހާ އެދޭ ކަންތައްތަކުގައާއި ނޭދޭ ކަންތަކުގައި ވެސް، އެއީ ފާފައެއް ކަމުގައި ނުވާނަމަ ވެރިންނަށް ކިޔަމަންގަތުމަކީ އިސްލާމް ދީނުގައި ލައްވާފައިވާ މުހިންމު އުސޫލެއް ކަމަށް ޚުތުބާގައި ކިޔައިދިނެވެ.
ހަމައެއާ އެކު، ޙައްޖުވެރިން ވެސް އެކަކު އަނެކަކަށް ލުއިވާ ގޮތަށް އަމަލުތައް ބެހެއްޓުމަށް ޚުތުބާގައި ގޮވާލިއެވެ.