ދިވެހި ރައްޔަތުންނާއި ދިވެހި ރާއްޖޭގެ ކުރިމަގާ ބެހޭ މުހިންމު ނިންމުއްތަކެއް ކުރިއަށް އޮތް ދެތިން މަސްދުވަހުގެ ތެރޭގައި އަޅުގަނޑުމެން ނިންމާނޫއެވެ.
މިކަަމަށް ތައްޔާރުވެ، ދިވެހިރައްޔަތުންނަށް އެންމެ އުފާވެރި، އެންމެ ހިތްހަމަޖެހޭ ތަސައްވުރެއް ފޯރުކޮށްދޭނީ ތިމާންނާއޭ ކިޔައި، އެކި ވަރުގެ ފިހިން ކުރަހާ، ތަފާތު ކުލައިން ކުލަޖައްސަމުން ގެންދާ ހުވަފެނީ މަންޒަރު ތަކެއް ރައްޔަތުންގެ ކުރިމައްޗަށް ދަނީ ހާމަކުރަމުންނެވެ. އަދި މިފެންނަނީ ބައެއް ފިލްމްތަކުގެ ހަމައެކަނި އިޝްތިހާރެވެ. މަ އިންމަގަށް ލައްގަޅޭ ބުނެ އަރުވާ ޖަހާނޭ ކިތަންމެ ކަތުންނެއް އިތުރަށް ފާޅުވާނެއެވެ.
މި ހައްސާސް ދަނޑިވަޅުގައި އަޅުގަނޑު ދަންނަ ބަހުރަވައިން، އާދެ އިޤްތިޞާދީ ބަހުރުވައިން، ޤައުމުގެ ކުރިމަގަށް ހުރި ހުރަސްތަކާ މެދު ވިސްނާ އެކަންކަން ހާމަކުރުމަކީ އެންމެ ރަނގަޅު ކަމެއް ކަމުގައި ދެކި، އެކަމާ ނިޔަތް ގަންފީމުއެވެ.
ފެށުމުގެ ކުރިން 2 ވާހަކައެއް ދަންނަވަން ބޭނުމެވެ.
ހ- ކުޑައިރުއްސުރެ ވިސްނުން ބައްޓަން ވެފައި ހުރި ގޮތުގެ ސަބަބުން، އަމިއްލަ ދިރިއުޅުމާއި، ޤައުމުގެ ޙާލަތް އަޅުގަނޑަށް ފެންނަނީ އިޤްތިޞާދީ ދުރުމިއަކުންނެވެ. މި ނޫން އަދި ތަފާތު ކިތަންމެ ދުރުމިއަކުން ތަފާތު ބޭފުޅުން ރާއްޖޭގެ ޙާލަތަށް ދުރުމި އަޅުއްވައެވެ. ނަމަވެސް އަޅުގަނޑު ބަލަނީ އަޅުގަނޑު ނުދަންނަ ބަހުރުވައިން މުއާމަލާތް ކޮށް ނޫޅުމަށެވެ. އެހެން ކަމުން މިއީ ޖުމްލަކޮށް އިޤްތިޞާދީ ވިސްނުމަކުން އެކުލަވާ ލެވިފައިވާ ލިސްޓެކެވެ.
ށ- ފުރިހަމައަށް ޤަބޫލުކުރާ ގޮތުގައި އަޅުގަނޑުމެންގެ ކުރިމަގު ހުރަސްކޮށް ހުރީ އެންމެ 7 ނުވަތަ 10 ނުވަތަ ބަޔާޅީސް ހުރަހެއް ނޫނެވެ. ގުނަކޮށް ގުނާލެވޭ އެތަކެއް ހުރަހެކެވެ. ނަމަވެސް ލިސްޓެއް އެކުލަވާލުމަށް ގަސްދުކުރުމުން، ކޮންމެވެސް އެއް ބައެއް އުނި ނުވެއެއް ނުދާނެއެވެ.
މިގޮތުން، ޤައުމުގެ ކުރިމަގު ހުރަސްކޮށް ހުރި އެންމެ ބޮޑެތި އިޤްތިޞާދީ ގޮންޖެހުން ތައް ކަމުގައި އަޅުގަނޑަށް ފެންނަނީ:
1- ލިބޭ މިންވަރު ދެނެ ނުގަތުމާއި އެމައްޗަށް ޚަރަދު ބައްޓަން ނުކުރުން
2- ދައުލަތުގެ ކިބައިން ރައްޔަތުން ލިބިގަންނަ ޚިދްމަތްތަކަކީ ހިލޭ ލިބޭ ތަކެތި ކަމުގައި ދުށުން
3- ހިނގަމުންދާ ސަރުކާރެއްގެ ނަފާއަށް ޤައުމުގެ މުއްސަނދިކަމާއި، މާދަމާގެ ޖީލުގެ ތަރިކަ ނީލަން ކިޔުން
4- ފުޅާ ވަމުންދާ މުއްސަނދި ކަމުގެ ތަފާތު
5- އިޤްތިޞާދުގައި ބިދޭސީ މަސައްކަތްތެރިންގެ އިތުރު ވަމުންދާ ދައުރު
6- ރަށްފުށުން ރައްޔަތުން ބާލައި މާލޭ ސަރަޙައްދަށް ޖަމަޢު ކުރުން
7- ތަރައްޤީއާއި ތިމާވެއްޓާއި ދެމެދު ‘ހަމަ’ ހިފަހައްޓަން ނުއެނގުން
މަޤްޞަދަކީ ލިސްޓުކުރެވިފައިވާ ހުރަސް ތަކުގެ މުހިންމުވާ ސަބަބާއި މެދު އަޅުގަނޑު އަމިއްލަ ޚިޔާލު ފާޅުކުރުމުގެ. އެއްވެސް ޙާލަތެއްގައި މިފަދަ މައްސަލަތަކަށް ޙައްލުލިބޭނީ ކިހިނަކުން ކަން ބަޔާން ކުރުމަށް މަސައްކަތް ކުރުމަކީ މި ސިލްސިލާގެ މަޤްޞަދެއް ނޫނެވެ.
އެހެނީ، މިއީ އިޤްތިޞާދީ ގޮތުން ބޮޑެތި ޤައުމީ މައްސަލަތައް ކަމުގައި އަޅުގަނޑުގެ އަމިއްލަ ވިސްނުމަށް ފެންނަ އެންމެ ބޮޑެތި މައްސަލަތަކެވެ. އެހެން ބޭފުޅުންގެ ވިސްނުން ތަފާތުވުމީ ނުވެނުދާނޭ ކަމެކެވެ.
ދެވަނައަށް، ޤައުމީ ބޮޑެތި މައްސަލަތަކަށް އޮތް ޙައްލު އެނގޭނީ ތިމާންނާ އަށް އެކަނި ކަމަށް ހީ ކުރުމަކީވެސް ނަފްސާނީ މައްސަލައަކެވެ. މިފަދަ ބޮޑެތި މައްސަލަތަކުގެ ޙައްލު ދެނެގަތުމަށް މަސައްކަތް ކުރުން ރަނގަޅީ ޢިލްމްވެރިންނާއި ތަޖްރިބާކާރުން ހިމެނޭ ގްރޫޕަކުން ކަން އަޅުގަނޑަށް ޤަބޫލު ކުރެވޭތީއެވެ.
އެކުލަވާލެވިފައިވާ ލިސްޓާއި މެދު ކިޔުންތެރިންގެ ޚިޔާލު ދެނެގަތުމަށް އަޅުގަނޑު ނުހަނު ބޭނުމެވެ.
[email protected] އަށް ފޮނުއްވާ މެއިލްތައް އަޅުގަނޑު ކިޔާނަމެވެ. ވިސްނާނަމަވެ. އިރާދަ ކުރެއްވިއްޔާ ޖަވާބު ދޭނަމުއެވެ.
އިރާދަފުޅާއެކު ނިޔަތް ގަނެފައިވަނީ ކުރިއަށް އޮތް ޖުލައިމަސް ނިމުމުގެ ކުރިން، މި ލިސްޓުގައި ހިމެނޭ ކޮންމެ، ހުރަހަކާއި މެދު ވަކި ލިޔުމެއް، ޖުމްލަ 7 ލިޔުން، ލިޔެ ޝާޢިޢު ކުރުމެވެ.
އެޑިޓަރުގެ ނޯޓް:
މި ލިޔުމަކީ، އިޤްތިޞާދީ މާހިރެއްކަމުގައިވާ އިބްރާހީމް ޢާޠިފް ޝަކޫރުގެ އަމިއްލަފުޅު ބްލޮގުގައި ސިލްސިލާކޮށް ލިޔުއްވަން ފައްޓަވާފައިވާ ލިޔުމެކެވެ. މި ލިޔުން މި ނޫހުގައި ޝާޢިއުކުރަނީ އާޠިފްގެ ހުއްދަ ލިބިގެންނެވެ. މީގެ ފަހުން ކޮންމެ އަންގާރަ ދުވަހަކު މި ސިލްސިލާއިން ބައެއް މި ނޫހުގައި ޝާޢިއު ކުރެވޭނެއެވެ. މި ލިޔުމުގެ އަސްލު ތިރީގައިވާ ލިންކުން ފެނިވަޑައިގަންނަވާނެއެވެ.
https://athifshakoor.wordpress.com