14:30
ހަޔާތުގެ ބޮޑު ބައެއް ވޭތުވެގެން ދިޔައީ ދީނީ އިލްމު ހާސިލްކުރުމަށް ނޫޅެވި ކަމަށްވާތީ، ކުރިއަށް އޮތްތަނުގައި ބޭނުންވަނީ ދީނީ ރޮނގުން ކުރިއަށްގޮސް، އާއްމުންނަށް ޚިދުމަތްކޮށްދިނުމަށް ކަމަށް އިމާމްކަމުގެ ސެޓްފިކެޓް މިހާރު ހޯދާފައިވާ ކުރީގެ މަޝްހޫރު ލަވަކިޔުންތެރިޔާ އަލީ ރަމީޒު ބުނެފި އެވެ.
ގިނަ ބަޔެއްގެ މަގްބޫލުކަން ހޯދާފައިވާ ކުޅަދާނަ ލަވަކިޔުންތެރިޔާ އަލީ ރަމީޒު 2003 ވަނަ އަހަރު ލަވަކިޔުން ހުއްޓާލުމަށްފަހު މަސައްކަތްކުރަމުން ގޮސްފައި ވަނީ އަމިއްލަ ވިޔަފާރި އާއި ދީނީ ކަންތައްތަކުގައި ތެރޭގަ އެވެ. ފެށުނީއްސުރެ ވެސް އިމާމަކަށްވެ، ބަންގި ގޮވާލުމުގެ ހުވަފެން ދެކެމުން އައި އަލީގެ އެ ހުވަފެންތައް މިއަދު ވަނީ ހަގީގަތަކަށް ވެފަ އެވެ. ކުއްލިއްޔަތުއްދިރާސަތުލް އިސްލާމިއްޔާއިން ހިންގި އެއް އަހަރު ދުވަހުގެ އިމާމްކަމުގެ ކޯހުގައި ބައިވެރިވެ، އަލީ ވަނީ މުޅި ކޯހުން ދެވަނަ ހޯދައިފައި. ނަމަވެސް، އަލީ ދެކޭ ގޮތުގައި މިއީ ހަމައެކަނި ފެށުމެކެވެ.
ސަލަފް ޖަމިއްޔާގެ ހިންގާ ކޮމިޓީގެ މެމްބަރު އަލީ ރަމީޒު ބުނީ ސަލަފުން ރޯދަ މަހަށް ނެރޭ ނަމާދުކުރުމާ ބެހޭ ވީޑިއޯގެ މަސައްކަތް ނިމުނުހާ އަވަހަކަށް މިސްކިތެއްގެ އިމާމުކަމާ ހަވާލުވާނެ ކަމަށެވެ.
އަލީ ބުނީ، މި ދުވަސްކޮޅު މަދަހަ ސީޑީއެއްވެސް ނެރުމުގެ މަސައްކަތް ކުރަމުން އަންނަ ކަމަށެވެ. އެ މަދަހަ ސީޑީގެ 60 ޕަސަންޓު މަސައްކަތް މިހާރު ނިމިފައިވާ ނަމަވެސް، ނަމާދު ވީޑިއޯ ސީޑީ ނެރެމުގެ މަސައްކަތްކަތް ކުރަމުންދާތީ، މަދަހަ ސީޑީގެ މަސައްކަތްވަނީ ފަހަށް ޖައްސާފައި ކަމަށާއި ސީޑީ ނެރޭނެ ދުވަހެއް އަދި ބުނަން ނޭނގޭ ކަމަށް ވެސް އަލީ ބުނެ އެވެ.