ހދ. ނޮޅިވަރަމްގައި ގުރުއާން ހިތުދަސްކުރާ ކޮންމެ ކުއްޖަކަށް 50،000 ރުފިޔާ ދޭން އެ ރަށު ޓިއުޝަން ސެންޓަރަކުން ނިންމައިފިއެވެ.
ނޮޅިވަރަމްގެ އޭއާރުޔޫ ޓިޔުޝަން ސެެންޓަރުން މިހާރު ވަނީ އެ ޕްރޮގްރާމުގައި ބައިވެރިވުމުގެ ފުރުސަތު ހުޅުވައިލައިފައެވެ.
އެ ޓިޔުޝަން ސެންޓަރުގެ މަސްއޫލުވެރިޔާ މަރިޔަމް ރާޝިދާ މިއަދު "ސަން"އަށް ވިދާޅުވީ މި ޕްރޮގްރާމުގެ ބޭނުމަކީ ގުރުއާން ހިފްޒުކޮށްފައި ތިބި ކުދިންތަކެއް ރަށުގައި އުފެއްދުން ކަމަށެވެ. އަދި ހިފްޒުކުރަން ބޭނުންވާ ކުދިންނަށް ހިތްވަރު ދިނުމަކީ ވެސް އެ ޕްރޮގްރާމްގެ މަގްސަދެއް ކަމަށް އޭނާ ވިދާޅުވިއެވެ.
"ރޯދަމަހުގެ ތަރާވީހް ނަމާދު ވެސް ނޮޅިވަރަމްގައި ނޮޅިވަރަމްގެ ދަރިއަކު ހިފްޒުކޮށް ކުރާތަން ދެކެން ބޭނުންވާތީ އެހެން ވިސްނާފަ ހުޅުވާލި ފުރުސަތެއް މިއީ،" މަރިޔަމް ވިދާޅުވިއެވެ.
މަރިޔަމް ވިދާޅުވި ގޮތުގައި މި ޕްރޮގްރާމުގައި ބައިވެރިވެވޭނީ ފަސް އަހަރާ 25 އަހަރާ ދެމެދުގެ އުމުރުގެ ކުދިންނަށެވެ. އަދި ރަށުން ބޭރުގައި އުޅުނަސް ނޮޅިވަރަމަށް ނިސްބަތްވާ ކުއްޖެއްނަމަ މި ޕްރޮގްރާމުގައި ބައިވެރިވެވޭނެކަމަށް އޭނަ ވިދާޅުވިއެވެ.
މި ޕްރޮގްރާމުގައި ބައިވެރިވާން ބޭނުންވާ ދަރިވަރުން މި މަސް ނިމުމުގެ ކުރިން ނަން ނޯޓުކުރަން ޖެހެއެެވެ. މި ޕްރޮގްރާމަކީ ހެޔޮއެދޭ ފަރާތެއްގެ އެހީތެރިކަމާއެކު ކުރިއަށް ގެންދާ ކަމެއްކަމަށް ވެސް މަރިޔަމް ވިދާޅުވިއެވެ.