ރާއްޖެއަށް ވަރަށް ގަދައަށް ހޫނުވާ މި ދުވަސްވަރުގައި ގައިދީންނަށް އެ ހޫނުން ރައްކާތެރިވެވޭނެ ގޮތްތަކެއް ހަމަޖައްސައިދިނުމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް)އިން އިލްތިމާސްކޮށްފިއެވެ.
އެ ކޮމިޝަނުން މިއަދު ނެރުނު ބަޔާނެއްގައި ބުނީ މި ދުވަސްވަރު ހުޅުލެއާއި ކ. އަތޮޅުގެ ރަށްރަށުގެ ހޫނުމިން އިހުސާސް ކުރެވޭ މިންވަރު 43 ޑިގްރީ ސެލްސިއަސްއާ ހަމައަށް އަރާ ކަމަށް މޯލްޑިވްސް މީޓިއޮރޮލޮޖިކަލް ސެންޓަރު (މެޓް) އިން ލަފާ ކޮށްފައިވާތީ، ބަންދުގައި ތިބި ގައިދީންނަށް ހާއްސަ ސަމާލުކަމެއް ދޭން ޖެހޭ ކަމަށެވެ.
އެ ބަޔާނުގައި ބުނެފައިވަނީ މޯލްޑިވްސް ކަރެެކްޝަނަލް ސާވިސްއިން ހިންގާ ޖަލުތަކުގައި އަދި ފުލުހުންގެ ބެލުމުގެ ދަށުން ހިންގާ މީހުން ބަންދުކުރާ މަރުކަޒުތަކުގައި ތިބޭ ފަރާތްތަކުން އެ ކޮމިޝަނަށް މައްސަލަތައް ހުށަހަޅައިފައިވާ ކަމަށެވެ. އަދި އެ ކޮމިޝަނުގެ ފަރާތުން އެ ފަދަ ތަންތަނަށް ކުރާ ޒިޔާރާތްތަކުގައި ގިނަ ފެސިލިޓީތަކުގައި އާއްމު ދުވަހެއްގައި ވެސް ހޫނުގަދަކަން ފާހަގަކުރެވިފައިވާކަމަށާއި ގިނަ ގޮޅިތަކުގައި ވައި ދައުރުވުމުގެ މައްސަލަތައް ވެސް ފާހަގަކުރެވިފައިވާ ކަމަށެވެ.
ރާއްޖޭގެ ހޫނުމިން މިހާރު މަތިވަމުންދާތީ ކަރެކްޝަނާއި ޖުވެނައިލް ޑިޓެންޝަން ސެންޓަރުތަކާއި އިމިގްރޭޝަން ޑިޓެންޝަން ސެންޓަރުތަކާއި ފުލުހުންގެ ކަސްޓޯޑިއަލް ޖަލުތައް ފަދަ ތަންތަނުގައި، އެ މުއައްސަސާއެއްގެ ކެރިފޯރުންތެރިކަން ހުރި މިންވަރަކުން ހޫނުވިޔަ ނުދިނުމަށް އިންތިޒާމްތައް ހަމަޖައްސައި ދިނުމަށް އެދިފައިވާ ކަމަށް އެޗްއާރްސީއެމް އިން ބުނެފައިވެއެވެ.
މި ކަމާ ގުޅިގެން ކަރެކްޝަންސްގެ އޮފިޝަލަކު "ސަން"އަށް ވިދާޅުވީ އެ މަަަސައްކަތް މިހާރު ކުރަމުންދާ ކަމަށެވެ. އިތުރު ތަފްސީލެއް ހާމަކޮށްފައެއް ނުވެއެވެ.