ދެ ޕައުންޑުގެ (ގާތްގަޑަކަށް އެއް ކިލޯ)ގެ ކެނެބިސް ޓްރެފިކް ކުރި ކަމަށް ސާބިތުވި މީހަކު ސިންގަޕޫރުގައި ދަން ޖައްސައިފިއެވެ.
ބޭރުގެ ނޫސްތަކުން ރިޕޯޓުކުރާ ގޮތުގައި ސިންގަޕޫރުގައި ދަން ޖައްސައިފައިވަނީ އުމުރުން 46 އަހަރުގެ ތަރަންގޫ ސުޕިއާ ނަމަކަށް ކިޔާ ސިންގަޕޫރުގެ ފިރިހެނެކެވެ. އޭނާ ދަން ޖައްސައިފައިވަނީ ރޭގެ ވަގުތެއްގައިއެވެ.
ތަރަންގޫގެ މަރުގެ މައްސަލައާ ގުޅިގެން ބައެއް މީހުން ދަނީ ނުރުހުން ފާޅުކުރަމުންނެވެ. އެގޮތުން އެމީހުން ބުނާ ގޮތުގައި އޭނާ ދަންޖައްސައިފައިވަނީ މަދު ހެކިތަކެއްގެ މައްޗަށް ބިނާކޮށް، ގާނޫނީ ގޮތުން ލިބެން ޖެހޭ ހައްގުތަކެއް ނުލިބި ކަމަށެވެ.
އެހެން ނަމަވެސް ސިންގަޕޫރުގެ އިދާރާތަކުން އެކަން ދޮގު ކުރެއެވެ. އަދި އޭނާއަށް ކުރިއަށް ގެންދެވުނީ އިންސާފުވެރި ޝަރީއަތެއް ކަމުގައި އެ ގައުމުގެ އިދާރާތަކުން ބުނެއެވެ.
މި މައްސަލައާ ގުޅިގެން ޔޫއެންގެ އިންސާނީ ހައްގުތަކާ ބެހޭ އޮފީހުން ވެސް އެ މައްސަލަ އަލުން ބަލައި، ޙުކުމް އަލުން އިއްވުމަށް ސިންގަޕޫރަށް އެންގިއެވެ. ނަމަވެސް ސިންގަޕޫރުން އެކަމަށް ދިނީ ބީރު ކަންފަތެކެވެ.
މި މައްސަލައިގައި އޭނާ ހައްޔަރުކޮށްފައިވަނީ 2013 ވަނަ އަހަރުއެވެ. އެގޮތުން އޭނާ ހައްޔަރުކޮށްފައިވަނީ މެލޭޝިޔާ އިން ސިންގަޕޫރަށް އެއް ކިލޯގެ ޑްރަގު އެތެރެ ކުރި ކަމުގެ ތުހުމަތުގައެވެ. އޭނާ ހައްޔަރު ކުރި އިރު އޭނާގެ އަތުން ޑްރަގް ފެނިފައެއް ނުވެއެވެ.
ނަމަވެސް މި މައްސަލައިގައި ފުލުހުން ވަނީ އޭނާ އެކަމުގައި ބައިވެރިވި ކަމަށް ކަނޑައަޅާފައެވެ. އޭނާ މަރަން ހުކުމް ކުރީ 2018 ވަނަ އަހަރުއެވެ.
ސިންގަޕޫރުގައި މީހަކު މެރިއިރު، މިއީ ނިމިދިޔަ ހަ މަހުގެ ތެރޭގައި މިފަދަ މައްސަލައެއްގައި މީހަކު ދަންޖެއްސި ފުރަތަމަ ފަހަރެވެ. އަދި ނިމިދިޔަ އަހަރު ޑްރަގުގެ އެކި މައްސަލަތަކުގައި ސިންގަޕޫރުން 11 މީހަކު ދަން ޖެއްސިއެވެ.
ޑްރަގު ޓްރެފިކް ކުރުމާއި ގެންގުޅުމުގެ މައްސަލަތަކުގައި މަރުގެ އަދަބު ދިނުމަކީ ސިންގަޕޫރުގެ ޤާނޫނުން ލާޒިމް ކުރާ ކަމެކެވެ.
ސިންގަޕޫރަކީ ޑްރަގުގެ މައްސަލަތަކުގައި މަރުގެ ޙުކުމް ތަންފީޒުކުރާ 35 ގައުމުގެ ތެރެއިން އެއް ގައުމެވެ. އަދި އެގައުމަކީ އެފަދަ މައްސަލަތަކުގައި ގަވާއިދުން މަރަން ހުކުމް ކުރާ އަށް ގައުމުގެ ތެރެއިން އެއް ގައުމު ވެސް މެއެވެ.