މ. ދިއްގަރު ބިން ހިއްކުމުގެ މަސައްކަތް އަދިވެސް އެއްކޮށް ނުނިމި އޮތުމުގެ ސަބަބުން އެ ރަށު ކައުންސިލަށާއި އާންމުންނަށް ގިނަ ކަންތައްތަކެއްގައި ދަތިތަކެއް އެބަހުރިކަމަށް އެ ރަށު ކައުންސިލުން ބުނެފިއެެވެ.
އާބާދީގައި ހާހަކަށް ވުރެ ގިނަ މީހުން ހިމެނޭ ދިއްގަރަށް ބިމުގެ ދަތިތަކަން ދިމާވެ ބިން ހިއްކުމުގެ މަސައްކަތް ފެށީ މިހާރުގެ ރައީސް އިބްރާހީމް މުހައްމަދު ޞާލިހުގެ ސަރުކާރުގައެވެ.
މި މަސައްކަތާ ގުޅޭ ގޮތުން "ސަން"އާ ވާހަކަދައްކަވަމުން ދިއްގަރު ކައުންސިލްގެ ރައީސް އަހްމަދު ނިޝާން ވިދާޅުވީ އަލަށް އިތުރުކުރެވޭ ބިން ތަރައްގީކުރުމަށް ކައުންސިލުން ގިނަ ކަންތައްތަކެއް ރާވައިފައިވާކަމަށެވެ. ނަަމަވެސް ބިން ހިއްކާ ނުނިމޭތީ އެ މަސައްކަތް އަދިވެސް ނުފެށޭ ކަމަށް އޭނާ ވިދާޅުވިއެވެ.
"މި ވަގުތު އަޅުގަނޑުމެންނަށް އެންމެ ބޮޑު ދައްޗަކަށް މި އޮތީ އަދިވެސް ބިން ހިއްކާ ނުނިމޭތީ އަޅުގަނޑުމެންގެ ޕްލޭންތަކުގައި ހަމަ ވަރަށް ބައިވަރު މަސައްކަތް އެބަހުރި ނުނިމި. ބޮޑު ފުޓުބޯޅަ ދަނޑު އަޅުގަނޑުމެންނަށް ލިބި އެކަމު މަސައްކަތް ނުފެށި. ހަމަ ކުނި ކޮށީގެ މަސައްކަތް ވެސް އަދި ނުފެށި. އެހެންނަމަވެސް އުންމީދު މި ކުރަނީ މަސައްކަތް ފެށޭނެކަމަށް ވަރަށް އަވަހަށް،" ނިޝާން ވިދާޅުވިއެވެ.
އޭނާ އިތުރަށް ވިދާޅުވީ ރަށުގެ އާބާދީ އިތުރުވަމުން އަންނައިރު ބޯހިޔާވަހިކަމުގެ މަޝްރޫއުތައް ވެސް މުހިންމު ކަމަށެވެ.
"ރަށުގެ އާބާދީއަށް ބަލާއިރު އަޅުގަނޑުމެންނަށް އަދިވެސް އިތުރަށް އެބަ ބޭނުންވޭ. ނަމަވެސް އެ ކަންކަން ކުރުމުގެ ދަތިތަކެއް އަޅުގަނޑުމެންނަށް އެބަ ދިމާވޭ ބިން އަޅުގަނޑުމެންނަށް ނުލިބި ލަސްވާތީ،" އޭނާ ވިދާޅުވިއެވެ.
ނިޝާން އިތުރަށް ވިދާޅުވީ އުންމީދަކީ ވީހާ ވެސް އަވަހަށް ބިން ހިއްކުމުގެ މަސައްކަތް ނިމި ކައުންސިލަށް ހަވާލުކުރުންކަމަށެވެ. ދިއްގަރުގެ ބިން ހިއްކުމަށް ގާތްގަނޑަކަށް 121 މިލިއަން ރުފިޔާ ޚަރަދުކުރެއެވެ.