މި އަހަރުގެ ފިތުރު އީދު ދުވަހަށް ވާނެ ކަމަށް ބެލެވެނީ އަންނަ ހޮނިހިރު ދުވަސް ކަމަށް އިންޓަނޭޝަނަލް އެސްޓްރޮނޮމިކަލް ސެންޓާ(އައިއޭސީ)އިން ބުނެފިއެވެ.
އަބޫދާބީގައި ހުންނަ އެސްޓްރޮނޮމިކަލް މުއައްސަސާއެއް ކަމަށްވާ އައިއޭސީއިން ނެރުނު ބަޔާނެއްގައި ބުނެފައި ވަނީ, އެ ސެންޓަރުގެ ލަފާ ބިނާވެފައިވަނީ ފަލަކީ މައުލޫމާތަށް ކަމަށާއި އީދުގެ ސީދާ ތާރީޚު ޔަގީންކުރާނީ ހަނދު ފެނުމުން ކަމާބެހޭ ފަރާތްތަކުން ކަމަށެވެ.
އެ ސެންޓަރުން ބުނީ، އަންނަ ބުރާސްފަތި ދުވަހުގެރޭ ހަނދު ފެނުމަކީ ވަރަށް ނާދިރު ކަމެއް ކަމަށެވެ. އެގޮތުން އެ ދުވަހު ހަނދު ފެންނާނީ ކަމާ ގުޅުން ހުރި މާހިރުން، ފެންވަރު ރަނގަޅު ޓެލެސްކޯޕަކުން ބަލާ ނަމަ ކަމަށާއި މޫސުން ރަނގަޅުވުން ވެސް އެކަމަށް ވަރަށް މުހިންމު ކަމަށް އެ ބަޔާނުގައިވެއެވެ.
"އަންނަ ބުރާސްފަތި ދުވަހު ޢަރަބި އަދި އިސްލާމީ ދުނިޔޭގެ އެއްވެސް ތަނަކަށް ހަމަ ލޮލަށް ހަނދު ފެނުމަކީ ނާދިރު ކަމެއް. ލީބިޔާއިން ފެށިގެން ހުޅަނގު އެފްރިކާގެ ބައެއް ގައުމުތައް ފިޔަވައި، ބުރާސްފަތި ދުވަހު އަރަބި ގިނަ ގައުމުތަކުން ޓެލެސްކޯޕަކުން ބަލައިގެން ވެސް ހަނދު ނުފެންނާނެ. އެހެންކަމުން އެންމެ ބޮޑަށް ބެލެވެނީ އީދުގެ ފުރަތަމަ ދުވަހަށް ވާނީ ހޮނިހިރު ދުވަސް ކަމަށް،" އެ ބަޔާނުގައިވެއެވެ.
ނަމަވެސް އައިއޭސީއިން ވަނީ، އިސްލާމީ ދުނިޔޭގެ ބައެއް ގައުމުތަކަށް ބުރާސްފަތި ދުވަހުގެ ރޭ ޓެލެސްކޯޕުން ހަނދު ފެނުމުގެ ފުރުސަތު އޮތުމުން، ޝައްވާލް މަހުގެ ފުރަތަމަ ދުވަހަކީ ހުކުރު ދުވަސް ކަމަށް އޭގެ ތެރެއިން ގިނަ ގައުމުތަކުން ކަނޑައަޅާނެ ކަމަށް ގަބޫލުކުރެވޭ ކަމަށް ވެސް ބުނެފައެވެ.
މިހާރު ކަލަންޑަރުގައިވާ ގޮތުން މި އަހަރުގެ ފިތުރު އީދު ދުވަހުގެ ފުރަތަމަ ދުވަހަކީ އަންނަ ހުކުރު ދުވަހެވެ.