ލިޔޯންއިން ޕީއެސްޖީގެ ދަނޑުގައި އެ ޓީމު ބަލިކޮށްފި

ފްރެންޗު ލީގުގައި ލިޔޯންއިން ޕީއެސްޖީގެ މައްޗަށް ކުރިހޯދައިފިއެވެ.

ރޭ ޕީއެސްޖީގެ އަމިއްލަ ދަނޑުގައި ކުޅުނު އެ މެޗު ލިޔޯންއިން ކާމިޔާބުކުރީ 1-0ގެ ނަތީޖާއަކުންނެވެ.

އެ މެޗުގައި ޕީއެސްޖީއަށް ވަނީ ގޯލު ޖަހާނެ ގިނަ ފުރުސަތުތަކެއް ލިބި ބޭކާރުވެފައެވެ.

އެގޮތުން މެޗުގެ ހަތަރު ވަނަ މިނެޓުގައި ކީލިއަން އެމްބާޕޭ ލިޔޯންގެ އޭރިއާ ތެރޭގައި ހުސްކޮށްހުރި ވިޓީނިއާއަށް ދިން ބޯޅަ އޭނާ ފޮނުވާލައިފައިވަނީ ގޯލު ދަނޑިމަތިން ބޭރަށެވެ. އެ ބޯޅަ ލިބުނު އިރު އޭނާއަށް ހުރަސްއަޅަން ހުރީ ލިޔޯންގެ ކީޕަރު ލޮޕޭސް އެކަންޏެވެ.

ޕީއެސްޖީއާއި ލިޔޯން ބައްދަލުކުރި މެޗުގެ ތެރެއިން ---

މެޗުގެ އަށް ވަނަ މިނެޓުގައި ލިއޮނަލް މެސީ ތަނަވަސްކުރި ފުރަސަތަކުން އެމްބާޕޭއަށް ވެސް ވަނީ ގޯލު ޖަހާނެ ފުރުސަތެއް ލިބިފައެވެ. އެމްބާޕޭ އޭރިއާ ތެރޭގައި ހުސްކޮށްހުރެ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ.

މެޗުގެ 38 ވަނަ މިނެޓުގައި ލިޔޯންއަށް ވަނީ ޕެނަލްޓީއެއް ލިބިފައެވެ. އެލެކްސެންޑާ ލަކަޒެޓް ފޮނުވާލި އެ ޕެނަލްޓީ އަމާޒުވީ ގޯލުގެ އަރިމަތީ ދަނޑިއަށެވެ.

ދެ ޓީމުން ކުރެ އެއް ޓީމަކަށް ވެސް ފުރަތަމަ ހާފުގައި ގޯލެއް ޖެހިފައި ނުވި ނަމަވެސް ދެވަނަ ހާފުގެ 56 ވަނަ މިނެޓުގައި ލިޔޯންއިން ވަނީ ގޯލެއް ޖަހައި މެޗުގެ ލީޑު ނަގައިފައެވެ. އެ ގޯލަކީ ބެރެޑްލީ ބާކޯލާ ކާމިޔާބުކުރި ގޯލެކެވެ.

އެ މެޗުން މޮޅުވެ ލިޔޯން ތާވަލުގެ ނުވަ ވަނައިގައި އޮތީ 29 މެޗު ކުޅެ 44 ޕޮއިންޓު ހޯދައިގެންނެވެ. މެޗުން ބަލިވި ނަމަވެސް ޕީއެސްޖީ ތާވަލުގެ އެއްވަނައިގައި އޮތީ 29 މެޗުން ހޯދި 66 ޕޮއިންޓާއެކުއެވެ.