މެޓާގެ ބެލެނިވެރިކަމުގެ ދަށުން ކުރިއަށްގެންދާ މަޝްހޫރު މެސެޖިން އެޕް ވަޓްސްއެޕްގެ ވިންޑޯޒް ބީޓާ ވާޝަނަށް އާ ފީޗާއެއް ތައާރަފުކޮށްފިއެވެ.
"މަލްޓި ސެލެކްޝަން"ގެ ނަމުގައި ތައާރަފުކޮށްފައިވާ އާ ފީޗާގެ ސަބަބުން އެއްފަހަރާ އެތައް މެސެޖެއް ސެލެކްޓްކޮށް ޑިލީޓް ނުވަތަ ފޯވާޑް ކުރެވޭނެއެވެ. މި ފީޗާ އެންމެ ފުރަތަމަ ރިޕޯޓްކޮށްފައިވަނީ ވަޓްސްއެޕްގެ އަޕްޑޭޓްތަކަށް ގެނެސްދޭ ވެބްސައިޓެއް ކަމަށްވާ ޑަބްލިޔުއޭބީޓާއިންފޯ އިންނެވެ.
އެ ވެބްސައިޓްގައިވާ ގޮތުން، ބީޓާ ޓެސްޓަރުން "ކޮންޓެކްސްޓް މެނޫ"ގައިވާ "ސެލެކްޓް" އޮޕްޝަންއަށް ފިތާލުމުން ޑައިލޮގް ބޮކްސްއިން އެއްފަހަރާ އެތައް މެސެޖެއް ސެލެކްޓް ކުރެވޭނެއެވެ. ނުވަތަ ވާހަކަ ދެއްކުމުގެ ތެރޭގައި ކޮންމެ ތަނަކަށް ކްލިކް ކުރުމުން ވެސް "ސެލެކްޓް މެސެޖެސް" އޮޕްޝަން ފެންނާނެއެވެ. މި އާ ފީޗާ ފަރުމާކޮށްފައިވަނީ ވަކިވަކިން މެސެޖުތައް ސެލެކްޓްކުރުމުގެ ބަދަލުގައި މީހުންގެ ވަގުތު ސަލާމަތް ކުރެވޭނެ ގޮތަކަށެވެ.
މި އާ ފީޗާ ނެރެފައިވަނީ މައިކްރޮސޮފްޓް ސްޓޯއިން ވިންޑޯޒް 2.2309.2.0 އަށް ވަޓްސްއެޕް ބީޓާ އިންސްޓޯލްކޮށްފައިވާ ބީޓާ ޓެސްޓަރުންނެވެ. ކުރިއަށް އޮތް ދުވަސްތަކުގައި އިތުރު ޔޫޒަރުންނަށް ވެސް މި ފީޗާ ތައާރަފު ކުރާނެ ކަމަށް ބެލެވެއެވެ.
ވަޓްސްއެޕްގެ ޕްލެޓްފޯމަށް އާ ފީޗާތަކެއް އިތުރު ކުރަމުން އަންނައިރު، އޭގެ ތެރޭގައި "ކޯލް ލިންކް" ފީޗާ ވެސް ހިމެނެއެވެ. އާ ފީޗާގެ ސަބަބުން ކޯލެއްގައި ބައިވެރިވުމަށް ލިންކެއް އުފެއްދުމުގެ ފުރުސަތު ލިބެއެވެ. މި ފީޗާ ވަނީ މިދިޔަ މަހު ވިންޑޯޒް ބީޓާ ވާޝަނަށް ވެސް ތައާރަފުކޮށްފައެވެ.
ދުނިޔޭގެ ދެ ބިލިއަނަށް ވުރެ ގިނަ ޔޫޒަރުން ތިބި ވަޓްސްއެޕްއަކީ އެންމެ މަގުބޫލު އެއް މެސެޖިން އެޕްއެވެ. އެ ކުންފުނިން އަންނަނީ ގަވާއިދުން އާ ފީޗާތައް އިތުރުކޮށްގެން ޔޫޒާ އެކްސްޕީރިއަންސް ރަނގަޅު ކުރުމަށް މަސައްކަތް ކުރަމުންނެވެ.
ވަޓްސްއެޕްގެ ޕްލެޓްފޯމަށް އާ ފީޗާތަކެއް ޓެސްޓް ކުރަމުން އަންނައިރު، އޭގެ ތެރޭގައި މެސެޖުތައް ޝެޑިއުލް ކުރުމުގެ ގާބިލްކަމާއި ވަކި ކޮންޓެކްޓްތަކުން އެންމެ ފަހުން ފެނުނު ސްޓޭޓަސް ފޮރުވޭނެ އާ ފީޗާއެއް ހިމެނެއެވެ. މި ފީޗާތައް ހުރިހާ ޔޫޒަރުންނަށް ލިބޭނެ ދުވަހެއް އަދި އެ ކުންފުނިން ހާމަކޮށްފައެއް ނުވެއެވެ.