އިނގިރޭސި ޕްރިމިއާ ލީގްގައި ރޭ ކުޅުނު މެޗްތަކުން އާސެނަލް އާއި މެންޗެސްޓާ ސިޓީ މޮޅުވެ، ލީގް ހޯދުމުގައި ދެޓީމުގެ ވާދަވެރިކަން ގަދަވެއްޖެއެވެ.
ޕްރިމިއާ ލީގްގައި ރޭ އާސެނަލާއި ލެސްޓާސިޓީ ބައްދަލުކުރިމެޗް 1-0 ގެ ނަތީޖާއިން ކާމިޔާބުކުރީ އާސެނަލެވެ. މެޗްގައި ފެނިގެންދިޔަ ހަމައެކަނި ލަނޑު އާސެނަލަށް ޖަހައިދިނީ 46 ވަނަ މިނެޓް ތެރޭގައި ޓްރޮސާޑް ތަނަވަސްކޮށްދިން ފުރުސަތެއްގައި މާޓީނޭލީއެވެ. މި ލަނޑުގެ ކުރިންވެސް ޓްރޮސާޑް ވަނީ، ގޯލެއް ޖަހާފައެވެ. ނަމަވެސް ވީއާރު ބެލުމަށްފަހު ޕެނަލްޓީ އޭރިއާ ބޭރުން ގޯލްތެރެއަށް ފޮނުވާލި އެ ގޯލް ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.
ރޭގެ މެޗްގައި މާޓީނޭލީ ޖެހި ގޯލަކީ މި ސީޒަނުގައި އޭނާގެ 9 ވަނަ ގޯލެވެ. އޭނާ އަންނަނީ މި ސީޒަނުގައި ވަރަށް ރަނގަޅު ކުޅުމެއް ދައްކަމުންނެވެ.
ޕްރިމިއާ ލީގްގައި ރޭ އާސެނަލް އާއި ލެސްޓާ ބައްދަލުކުރިމެޗްގައި މާޓީނޭލީ ގޯލް ޖަހަނީ --- ފޮޓޯ/ އާސެނަލް
މެޗަށްފަހު އާސެނަލްގެ ކޯޗު މިކޭލް އަޓޭޓާ ބުނީ، މެޗުގައި މޮޅަށް ކުޅެ، ގިނަ ހަމަލާތައް އުފައްދާފައިވަނީވެސް އޭނާގެ ކުޅުންތެރިން ކަމަށާއި، މިއީ ވަރަށް ހިތްހަމަ ޖެހޭ ނަތީޖާއެއް ކަމަށެވެ. މި ރޫހުގައި ކުރިއަށްދަންޏާމު ލީގާމެދު ކުރެވޭ އުއްމީދު ބޮޑުކަމަށް އަޓޭޓާ ބުންޏެވެ. މީގެ އިތުރުން މެޗުގައި ޓްރޮސާޑް ދެއްކި ކުޅުމާމެދުވެސް ވަރަށްބޮޑަށް ހިތްހަމަ ޖެހޭ ކަމަށް އަޓޭޓާ ފާހަގަކުރިއެވެ.
"އެންމެފަހުން އެސްޓަން ވިލާ އަދި ރޭ ލެސްޓާސިޓީ އަތުން އަހަރުމެން މޮޅު މިވީ ރަށުން ބޭރުގައި ކުޅެގެން. މިއީ ލިބިގެންދިޔަ ވަރަށްބޮޑު އިތުބާރެއް،"
މެންޗެސްޓާ ސިޓީއާ، ބޯންމައުތް ބައްދަލުކުރިމެޗު 4-1 ގެ ނަތީޖާއިން ކާމިޔާބުކުރީ ސިޓީއެވެ. ބޯންމައުތުގެ ދަނޑުގައި ކުޅުނު މިމެޗްގައި ސިޓީއަށް ގޯލް ހުޅުވާލަދިނީ 15 ވަނަ މިނެޓް ތެރޭގައި އަލްވަރޭޒްއެވެ. ސިޓީގެ ދެވަނަ ގޯލް ކާމިޔާބުކޮށްދިނީ، 29 ވަނަ މިނެޓް ތެރޭގައި ހާލާންޑެވެ. މިއީ މި ސީޒަނުގައި ހާލާންޑް ގެ 27 ވަނަ ގޯލެވެ. ރޭ ބޯންމައުތު ކޮޅަށް ޖެހި ގޯލާއެކު ހާލާންޑް ވަނީ ސިޓީގެ ކުރީގެ ފޯވަޑް އަގުއޭރޯ އެއް ސީޒަނެއްގައި އެންމެގިނައިން ގޯލްޖެހި ރެކޯޑް މުގުރާލާފައެވެ.
ޕްރިމިއާ ލީގްގައި ރޭ މެންޗެސްޓަރ ސިޓީއާ ބޯންމައުތް ބައްދަލުކުރިމެޗުގެ ތެރެއިން --- ފޮޓޯ/ގެޓީ
ރޭގެ މެޗުގައި ސިޓީން ޖެހި ތިންވަނަ ގޯލް 45 ވަނަ މިނެޓް ތެރޭގައި ފޯޑެން ކާމިޔާބުކޮށްދިން އިރު، ސިޓީގެ ފަހު ލަނޑަކީ 51 ވަނަ މިނެޓް ތެރޭގައި ބޯންމައުތުގެ މެޕަމް އަތުން ބައިކޮޅަށްވަން ލަނޑެކެވެ.
މެޗުގައި ބޯންމައުތަށް ސުންކަނޑުވާލަދިނީ 83 ވަނަ މިނެޓް ތެރޭގައި ޖެފާސަން ލޭމާއެވެ.
ރޭ ކުޅުނު މެޗްތަކަށްފަހު، ޕްރިމިއާ ލީގް ތާވަލް މިހާރު އޮތްގޮތް:
ޕްރިމިއާ ލީގްގައި ރޭ ކުޅުނު ފާހަގަކޮށްލެވޭ މެޗްތަކުގެ ނަތީޖާތަކަށް ބަލާއިރު، ލީޑްސް ޔުނައިޓެޑާ އަލަށް ހަވާލުވި ކޯޗް ގްރާސިއާގެ އިރުޝާދުގެ ދަށުން އެޓީމް ކުޅުނު ފުރަތަމަ މެޗު ވަނީ ސަދަމްޓަންއާ ބައްދަލުކޮށް 0-1 ގެ ނަތީޖާއިން މޮޅުވެފައެވެ.
ލިވަޕޫލާއި ކްރިސްޓަލް ޕެލަސް ބައްދަލުކުރި މެޗު އެއްވެސް ޓީމަކަށް ލަނޑެއް ނުޖެހި ނިމިފައިވާއިރު، ވެސްޓްހޭމް ޔުނައިޓެޑާ ނޮޓިންހަމް ބައްދަލުކުރި މެޗު 0-4 ގެ ނަތީޖާއިން ކާމިޔާބުކުރީ ވެސްޓްހޭމްއެވެ. އެވަޓަން އާ އެސްޓަންވިލާ ބައްދަލުކުރި މެޗު 2-0 ގެ ނަތީޖާއިން ކާމިޔާބުކުރީ އެސްޓަންވިލާއެވެ.