އެޕަލްއިން އައިއޯއެސްއަށް ތައާރަފު ކުރަން ނިންމާފައިވާ އާ އަޕްޑޭޓްތައް ޓެސްޓު ކުރުމުގެ ފުރުސަތު ޑިވެލޮޕަރުންނަށް ހުޅުވާލައިިފިއެވެ.
އެޕަލްއިން ޓެސްޓު ކުރަން ފުރުސަތު ދެނީ، އައިއޯއެސް 16.4 އާއި އައިޕެޑްއޯއެސް 16.4 އާއި މެކްއޯއެސް ވެންޗޫރާ 13.3 އާއި ވޮޗްއޯއެސް 9.4 އާއި ޓީވީއޯއެސް 16.4 އެވެ.
އާ އަޕްޑޭޓްތަކުގައި ހިމެނޭ އެންމެ ބޮޑު އެއް ބަދަލަކީ ޕްރައިވެސީގެ އާ ފީޗާތައް ތައާރަފު ކުރުމެވެ. އެޕަލްގެ އާ އަޕްޑޭޓްތަކުގައި، އެ ކުންފުނީގެ އުފެއްދުންތައް ބޭނުންކުރާ މީހުންގެ ޒާތީ މައުލޫމާތު ރައްކާތެރިކުރުމަށް އިތުރު ހަރުދަނާ ސެކިއުރިޓީ ފީޗާތަކެއް ވަނީ ހިމަނާފައެވެ. މި އަޕްޑޭޓްތަކުގެ ތެރޭގައި އެޕަލްގެ އުފެއްދުންތައް ހަލުވިކޮށް، ބޭނުންކުރަން ފަސޭހަކޮށްދޭނެ ބަގް ފިކްސްތައް ހިމަނާފައިވެއެވެ.
ޕްރައިވެސީ އާއި ޕާފޯމަންސް ބަދަލުތަކުގެ އިތުރުން، އެޕަލްގެ މަގުބޫލު އެޕްލިކޭޝަންތަކަށް އާ ފީޗާތަކެއް ވެސް އަންނާނެއެވެ. މިސާލަކަށް އެޕަލް މެޕްސްގެ އަޕްޑޭޓެޑް ވާޝަނުގައި ނެވިގޭޝަން އާއި ޓްރާންސިޓް ޑައިރެކްޝަންސް ކުރިއަށް ވުރެ ރަނގަޅުކޮށްފައިވާ އިރު، އެޕަލް މިއުޒިކްގެ އަޕްޑޭޓެޑް ވާޝަންގައި އާ ޕާސަނަލައިޒްޑް ޕްލޭލިސްޓްތައް ހިމަނައި، އިންޓަފޭސްއަށް ވެސް ވަނީ ބަދަލުގެނެސްފައެވެ. އާ އަޕްޑޭޓްތަކުގެ ސަބަބުން ނޯޓްސް، ރިމައިންޑާސް އަދި ސިރީ ފަދަ އެޕަލްގެ މަޝްހޫރު އެހެން އެޕްލިކޭޝަންތަކަށް ވެސް އާ ފީޗާތަކެއް އަންނާނެއެވެ.
އާ އަޕްޑޭޓްތައް ޓެސްޓް ކުރަން ބޭނުންވާ ޑިވެލޮޕަރުންނަށް އެޕަލްގެ ޑިވެލޮޕަރު ޕޯޓަލް އިން އަޕްޑޭޓްތައް ޑައުންލޯޑް ކުރެވޭނެއެވެ. މި އަޕްޑޭޓްތައް މިވަގުތު ލިބެނީ ހަމައެކަނި ޑިވެލޮޕަރުންނަށް ނަމަވެސް ކައިރި މުސްތަގުބަލެއްގައި އާންމުންނަށް އެ އަޕްޑޭޓްތައް ދޫކުރާނެއެވެ. އެޕަލްއިން މި އަޕްޑޭޓްތައް ރަސްމީކޮށް ނެރޭނެ ތާރީޚެއް އަދި އިއުލާން ނުކުރި ނަމަވެސް ކުރިއަށް އޮތް ހަފުތާތަކުގެ ތެރޭގައި އެ އަޕްޑޭޓްތައް އާންމުންނަށް ލިބޭނެ ކަމަށް ބެލެވެއެވެ.
އެޕަލްގެ އުފެއްދުންތައް ބޭނުންކުރާ މީހުން އެންމެ ފަހުގެ ސޮފްޓްވެއާ އަޕްޑޭޓްތަކާއެކު ޑިވައިސްތައް ބޭނުންކުރުމަށް އެ ކުންފުނިން އަބަދުވެސް ބާރު އަޅައެވެ. އެއީ އަޕްޑޭޓްތަކުގެ ސަބަބުން އާ ފީޗާތައް ބޭނުންކުރެވި، ފޯނުގައި ހުންނަ މައުލޫމާތު ރައްކާކުރެވޭނެ އިތުުރު ގޮތްތައް އެ ކުންފުނިން އަބަދުވެސް ތައާރަފު ކުރަމުންދާތީ ކަމަށް އެޕަލްއިން ބުނެއެވެ.