ރާއްޖޭގައި އެންމެ ފުރަތަމަ އުފެއްދި އިންލައިން ސްކޭޓިން އެސޯސިއޭޝަން، އިންލައިން ސްކޭޓިން އެސޯސިއޭޝަން އޮފް މޯލްޑިވްސްގެ ހިންގާ ކޮމިޓީ އިފުތިތާހްކޮށްފިއެވެ.
އިންލައިން ސްކޭޓިން އެސޯސިއޭޝަން އޮފް މޯލްޑިވްސްގެ ހިންގާ ކޮމިޓީ އިފުތިތާހްކޮށްފައިވަނީ، މިދިޔަ ބުދަ ދުވަހު ބޭއްވި އެ އެސޯސިއޭޝަނުގެ ފުރަތަމަ އަހަރީ އާންމު ޖަލްސާގައެވެ.
އިންލައިން ސްކޭޓިން އެސޯސިއޭޝަނުގެ ހިންގާ ކޮމިޓީ:
- ރައީސް: ޢަބްދުﷲ ރިފްއަތު
- ނައިބްރައީސް: ޙަސަން ސައީދު
- ޖެނެރަލް ސެކްރެޓަރީ: ޙުސައިން ފިރާޟް
- ހަޒާންދާރު: މުޙައްމަދު ހަމްދާން ފަހްމީ
- އާންމު މެމްބަރުން ތަމްސީލްކުރާ އެގްޒެކްޓިވް ކޮމިޓީގެ މެމްބަރު: ޙަސަން މައުރޫފް
"ސަން"އާ ވާހަކަދައްކަވަމުން އިންލައިން ސްކޭޓިން އެސޯސިއޭޝަން އޮފް މޯލްޑިވްސްގެ އެއް މުއައްސިސް މުޙައްމަދު ރިޟްވާން ވިދާޅުވީ، އެ އެސޯސިއޭޝަނުގެ ފުރަތަމަ ހިންގާ ކޮމިޓީގެ ވަނަވަރު މިހާރު ކޮމިޝަނާ އޮފް ސްޕޯޓްސް ހީނާ އަހުމަދު ސަލީމާ ހިއްސާކޮށްފައިވާކަމަށެވެ.
އިންލައިން ސްކޭޓިން އެސޯސިއޭޝަން އޮފް މޯލްޑިވްސް ރަޖިސްޓްރީކޮށްފައި ވަނީ މިދިޔަ އަހަރުގެ ނޮވެމްބަރު މަހުގެ 29 ވަނަ ދުވަހުއެވެ. އެ އެސޯސިއޭޝަން އުފެއްދީ ރާއްޖޭގައި އިންލައިން ސްކޭޓިން ކުރިއަރުވައި، މި ކުޅިވަރަށް އަހުލުވެރި ޖީލެއް ބިނާކުރުމުގެ މަގުސަދުގައެވެ.
ކުދިންތަކެއް ސްކޭޓް ކުރުމުގައި-- ސަން ފޮޓޯ
އެގޮތުން އިންލައިން ސްކޭޓިންގެ ދަށުން އަންނަ ހުރިހާ ކުޅިވަރެއް ކުރިއަރުވައި، މި ކުޅިވަރުގެ ދާއިރާއިން މޮޅު އެތުލީޓުންތަކެއް ކުރިއެރުވުމަށްޓަކައި ގިނަ ހަރަކާތްތަކެއް އެ ސޯސިއޭޝަނުން ކުރާނެ ކަމަށް ވަނީ ބުނެފައެވެ. އޭގެތެރޭގައި، އެ އެސޯސިއޭޝަނުން އިންތިޒާމްކުރާ ޚާއްސަ މުބާރާތްތައް ހިމެނެއެވެ.
ބައިނަލްއަގްވާމީ މައިދާނުގައި ގިނަ ބައެއްގެ މަގުބޫލުކަން ހޯދާފައިވާ އިންލައިން ސްކޭޓިންގައި މައިގަނޑު ގޮތެއްގައި 10 ވައްތަރެއް ވެއެވެ. އެއީ، އެގްރެސިވް އިންލައިން، އަލްޕައިން ސްކޭޓިން، ފިގާ ސްކޭޓިން، ފިޓްނަސް ސްކޭޓިން، ރޯލާ އިންލައިން ސްކޭޓިން، އޮފްރޯޑް ސްކޭޓިން، ރޯލާ ސޮކާ، ސްޕީޑް ސްކޭޓިން އަދި ވާޓް ސްކޭޓިން ހިމެނެއެވެ.
ރާއްޖޭގައި އަދި މި ކުޅިވަރަށް މާބޮޑު ތަރުޙީބެއް ލިބިފައި ނުވި ނަމަވެސް، ގިނަ އަދަދެއްގެ ކުޑަކުދިންގެ މެދުގައި މި ކުޅިވަރަށް އޮތް މަގުބޫލުކަން ބޮޑެވެ. މާލެ އާއި ހުޅުމާލޭގައި ހިންގާ އިންލައިން ސްކޭޓިން ކްލާސްތަކުގައި ގިނަ އަދަދެއްގެ ސްކޫލް ކުދިން ވެސް ބައިވެރިވެއެވެ.