އިގްތިސާދީ ގޮތުންނާއި ސިޔާސީގޮތުން އަންހެނުން ބާރުވެރިވާ ނިސްބަތް ދެނެގަތުމަށްޓަކައި އަންހެނުން ބާރުވެރިކުރުވުމާ ގުޅޭ ދިރާސާއެއް ފަށައިފިއެވެ.
މި ދިރާސާއަކީ އަންހެނުންގެ ހައްގުތަކަށް ވަކާލާތުކުރާ އިސް މަދަނީ ޖަމިއްޔާއެއް ކަމުގައިވާ ވިމެން އެންޑް ޑިމޮކްރަސީގެ ހާއްސަ އިސްނެގުމުގެ މަތިން، އަންހެނުންގެ ކުރިއެރުމަށް ވަކާލާތުކުރާ އިތުރު އެހެން ޖަމިއްޔާއެއް ކަމުގައިވާ ވިމެން އޮން ބޯޑްސްއާއެކު ކުރިއަށް ގެންދާ ދިރާސާއެކެވެ. އަދި މި ދިރާސާ ކުރިޔަށް ގެންދަނީ ނޭޝަނަލް ޑިމޮކްރަޓިކް އިންސްޓިޓޫޓް (އެންޑީއައި)ގެ މާލީ އެހީތެރިކަމުގެ ދަށުންނެވެ.
ވިމެން އެންޑް ޑިމޮކްރަސީ އިން ބުނީ ދިވެހި މުޖްތަމައުގައި އަންހެނުންގެ ހައިސިއްޔަތު އެހާރާއި މިހާރަށް ބަލާއިރު އެތައްތަނެއް ވަނީ ކުރިއަރައި، ވަޒީފާގެ މައުހައުލުގަ އާއި އެނޫން ތަންތާގައި އަންހެނުންގެ ދައުރު ދަނީ ފުޅާވަމުން ކަމަށެވެ.
އެގޮތުން 2021 ވަނަ އަހަރުގެ ގްލޯބަލް ޖެންޑާ ގެޕް އިންޑެކްސްއިން ދެއްކި ގޮތުގައި ރާއްޖޭގެ ތައުލީމީ ދާއިރާގައި މިންތީ ތަފާތުކުރުން ވަނީ ނައްތާލެވިފައި ކަމަށާއި ސިއްހީ ދާއިރާގައި މިންތީ ތަފާތުކުރުމުގެ ނިސްބަތް ވަނީ ވަރަށް ބޮޑަށް ކުޑަ ކުރެވިފައި ކަމަށް ވެސް އެ ޖަމިއްޔާއިން ބުންޏެވެ.
ނަމަވެސް ސިޔާސީ އަދި އިގްތިސާދީ ދާއިރާއިން ރާއްޖޭގައި މިންތީ ތަފާތުތައް އަދިވެސް ބޮޑުކަމަށް މި ރިޕޯޓުން ދައްކުވާ ކަމަށާއި މި ފަހަރު އެ ޖަމިއްޔާއިން އިސް ނަގައިގެން ކުރިއަށް ގެންދާ ދިރާސާގެ އެންމެ ބޮޑު ސަބަބަކީ ވެސް އެއީ ކަމަށް އެ ޖަމިއްޔާއިން ބުންޏެވެ.
ވިމެން އެންޑް ޑިމޮކްރަސީ ޖަމިއްޔާއިން މައުލޫމާތު ދިން ގޮތުގައި ދިރާސާގައި މައިގަނޑު ގޮތެއްގައި ބަލާނީ ދައުލަތުގެ ފަސް އަހަރުގެ ސްޓްރެޓީޖިކް އެކްޝަލް ޕްލޭންގެ ދަށުން ހުރި ބައެއް ކަންކަން ތަންފީޒު ކުރެވިފައިވާ މިންވަރު ނިސްބަތުން ދެނެގަތުމުގެ މައްޗަށެވެ.
އެއީ ސަބްސެކްޓަރު 6. ޖެންޑާ އީކުއާލިޓީ އޮފް ގުޑް ގަވަނަންސްގެ
- އިންކްރީސް ދަ ރޯލް އޮފް ވިމެން އިން ޑިސިޝަން މޭކިން ލެވެލްސް (ތަންފީޒީ މަގާމުތަކުގައި ތިބޭ އަންހެނުންގެ އަދަދު އިތުރުކުރުން)
- އެމްޕަވާ ވިމެން ޑިވެލޮޕްމެންޓް ކޮމެޓީސް (އަންހެނުންގެ ތަރައްގީއަށް މަސައްކަތް ކުރާ ޖަމިއްޔާތައް ބާރުވެރި ކުރުން
- އެންޝުއާ ވިމެން އާ އިކޮނޮމިކަލީ އެމްޕަވާޑް (އަންހެނުންގެ އިގްތިސާދީ ބާރުވެރިކަން ކަށަވަރުކުރުން)
- އިމްޕްރޫވް އެކްސެސް ޓު ކްރެޑިޓް އެންޑް ފައިނޭންޝިއަލް މެކަނިޒަމްސް ފޯ ފީމޭލް އެންޓަޕްރަނާސް (އަންހެން ވިޔަފާރިވެރިންނަށް ފައިސާ ލިބޭނެ ފަހި ގޮތްތައް އިންތިޒާމް ކޮށްދިނުން)އެވެ.
އަންހެނުން ބާރުވެރިކުރުވުމާ ގުޅޭ އެ ދިރާސާގައި ސަރުކާރުގެ ޖުމްލަ 14 އިދާރާ އަކުން މައުލޫމާތު ހޯދައި އެ މައުލޫމާތުގެ މަށްޗަށް ތަފާސްހިބުތައް އަންދާޒާ ކުރެވެމުންދާނެ ކަމަށް އެ ޖަމިއްޔާއިން ބުންޏެވެ.
އެގޮތުން މައުލޫމާތު ހޯދާ އިދާރާތަކުގެ ތެރޭގައި ރައީސް އޮފީހާއި ރައްޔިތުންގެ މަޖިލީހާއި ޖެންޑާ މިނިސްޓްރީ އާއި އިކޮނޮމިކް މިނިސްޓްރީ އާއި ލޯކަލް ގަވަރމެންޓް އޮތޯރިޓީ އާއި ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން އާއި މޯލްޑިވްސް މަނަޓެރީ އޮތޯރިޓީ އަދި މޯލްޑިވްސް ބިޔުރޯ އޮފް ސްޓެޓިސްޓިކްސް ފަދަ ކަމާބެހޭ ސަރުކާރުގެ އިދާރާތައް ހިމެނޭ ކަމަށް އެ ޖަމިއްޔާއިން ބުންޏެވެ.
ދިރާސާގެ ނަތީޖާ އަންނަ އެޕްރީލް މަހުގެ ތެރޭގައި ސަރުކާރުގެ ކަމާބެހޭ މުއައްސަސާތަކާއި ޕްރައިވެޓް ސެކްޓާ އަދި މަދަނީ ޖަމިއާޔާތަކާއި ހިއްސާކުރާނެއެވެ. އަދި އެ ޖަމިއްޔާގެ މީސް މީޑިޔާތަކުގައި ޝާއިރުކުރާނެއެވެ.
ވިމެން އެންޑް ޑިމޮކްރަސީ އަކީ މިންތީގެ ތަފާތުތައް ނައްތާލައި، ހުރިހާ މައިދާނެއްގައި އަންހެނުން ބާރުވެރިކޮށް، ހަމަހަމަ ފުރުސަތު ހޯދައިދިނުމަށްޓަކައި 2016 އުފެއްދި ޖަމިއްޔާއެކެވެ.
އެ ޖަމިއްޔާގެ މަސައްކަތްތައް ފާހަގަކޮށް ދުނިޔޭގެ ބޮޑެތި ބައިނަލްއަގުވާމީ ޖަމިއްޔާތައް ކަމުގައިވާ ކޮމަންވެލްތް ފައުންޑޭޝަން، ޔޫ އެސް ޑިޕާޓްމެންޓް އޮފް ސްޓޭޓް އަދި ޔުނައިޓެޑް ނޭޝަންސް ޔޫތް އެންވޯއީސް އޮފީސް ފަދަ މުއައްސަސާތަކުން ވަނީ އެ ޖަމިއްޔާގެ އަގުވަޒަންކޮށްފައެވެ.