އެޕަލްގެ ސަޕްލައި ޗެއިންގެ ތެރޭގައި ހިމެނޭ އިތުބާރު ހުރި މަސްދަރަކުން ރިޕޯޓްކޮށްފައިވާ ގޮތުގައި އެ ކުންފުނިން އަންނަ އަހަރު ފަށްޖެހޭ އައިޕެޑެއް ބާޒާރަށް ނެރެން ތައްޔާރުވެއްޖެއެވެ.
ގިނަ ބަޔަކު އުންމީދުކުރާ މި ޑިވައިސްގައި ފޯލްޑަބަލް ޑިޒައިނެއް ހިމަނާފައިވާއިރު، ޓެބްލެޓާއި ސްމާޓްފޯން މޯޑްތަކުގެ މެދުގައި ފަސޭހަކަމާއެކު އިންޓަގްރޭޓް ކުރެވޭނެއެވެ. އާ އައިޕެޑްގައި ވެސް އާ ފީޗާތަކާއި އިމްޕްރޫވްމަންޓްތަކެއް އަންނާނެ ކަމަށް ބެލެވޭ އިރު އޭގެ ތެރޭގައި ބޮޑު ޑިސްޕްލޭއަކާއި ރަނގަޅު ކެމެރާއަކާއި ހަލުވި ޕްރޮސެސަރެއް ހިމެނެއެވެ.
އެޕަލްގެ ސަޕޯޓަރުން އެ ކުންފުނީގެ ފޯލްޑަބަލް ޑިވައިސްއަކަށް އިންތިޒާރު ކުރަމުން އަންނައިރު، އެ މީހުންގެ އިންތިޒާރު ވަރަށް އަވަހަށް ނިމުމަކަށް އަންނާނެ ކަމަށް ބެލެވެއެވެ. އާ އައިޕެޑް ނެރުމަށް އެޕަލް އިން ތައްޔާރުވަމުން އައުމުން ދޭހަވަނީ ސެމްސަންގް އާއި ވާވޭގެ ބާރު ގަދަ ފޯލްޑަބަލް ޑިވައިސްތަކުގެ ކުރިއަރަމުން އަންނަ މާކެޓަށް އެޕަލްއިން ވަނުމަށް މަސައްކަތް ކުރާކަން ކަމަށް އޮންލައިން ރިޕޯޓައް ބުނެއެވެ. އަދި ފާއިތުވި އަހަރުތަކުގައި ވިއްކާ މިންވަރު ދަށަށް ގޮސްފައިވާ އައިޕެޑް ލައިންއަޕް އަލުން އާރާސްތު ކުރެވޭނެ ކަމުގެ އުއްމީދު ވެސް އެ ކުންފުނިން އަންނަނީ ކުރަމުންނެވެ.
އިނގިރޭސި ވިލާތަށް ނިސްބަތްވާ އޮންލައިން ނޫސް "އިންޑިޕެންޑެންޓް"އިން ރިޕޯޓްކޮށްފައިވާ ގޮތުގައި އާ އައިޕެޑްގައި ފޯލްޑަބަލް އޯލެޑް ޑިސްޕްލޭއެއް ހުންނާނެ ކަމަށް ބެލެވޭއިރު، މި ޑިސްޕްލޭގައި އާދައިގެ އައިޕެޑްތަކާ އަޅާބަލާއިރު ސްކްރީން ސައިޒް ބޮޑުވާނެ ކަމަށް ބުނެފައިވެއެވެ. އަދި މި ޑިވައިސްގައި ރަނގަޅު ކެމެރާތަކެއް ވެސް ހުންނާނެ ކަމަށާއި، މި ޑިވައިސް އަކީ މަގުމަތީގައި ފޮޓޯއާއި ވީޑިއޯ ނެގުމަށް ވަރަށް ކަމުދާ ޑިވައިސްއަކަށް ވާނެ ކަމަށް ބުނެފައިވެއެވެ.
އާ އައިޕެޑްގައި އެއްފަހަރާ ގިނަ އެޕްލިކޭޝަންތައް ހިންގާއިރުވެސް، ހަލުވި ޕްރޮސެސަރަކާއެކު، ފަސޭހަކަމާއި ހަލުވި ޕާފޯމަންސް ކަށަވަރު ވެގެންދާނެ ކަމަށް ވެސް ބުނެފައިވެއެވެ.
އަދި އާ އައިޕެޑް ޑިޒައިންގައި ބޮޑަށް ވިސްނާފައިވާނީ ދެމެހެއްޓެނިވި ގޮތެއްގައި ގިނަދުވަހަށް ރައްކާތެރި ކަމާއެކު ގެންގުޅެވޭނެ ފަދަ ޑިޒައިނަކަށް ކަމަށާއި، މި ފަދަ ޑިޒައިނެއްގެ ސަބަބުން ހާއްސަކޮށް ޑިވައިސްތަކާއެކު ގިނައިން ދަތުރުކުރާ މީހުން، މި އުފެއްދުމަށް މަރުޚަބާ ކިޔާނެ ކަމަށް ވެސް ރިޕޯޓުގައި ބުނެފައިވެއެވެ.
އެޕަލްގެ އާ އައިޕެޑާއެކު ފޯލްޑަބަލް ޑިވައިސް މާކެޓަށް ބޮޑު އިންގިލާބެއް ގެނައުމަށް އެޕަލް އިން ތައްޔާރުވަމުން އަންނަ ކަމަށް ބެލެވެއެވެ.
ފޯލްޑަބަލް ޑިޒައިނާއި، ރަނގަޅު ކެމެރާތަކާއި، ހަލުވި ޕްރޮސެސަރާއެކު، އާ އައިޕެޑް ވެގެންދާނީ އަންނަ އަހަރުގެ އެންމެ ފާހަގަކޮށްލެވޭ ޓެކް ޕްރޮޑަކްޓަކަށެވެ. އެޕަލްގެ ފޭނުންނާއި ޓެކްނޮލޮޖީއަށް ޝައުގުވެރިވާ ފަރާތްތަކުން ވެސް ތިބީ މި ޑިވައިސް ރިލީޒްކުރާނެ ކަމުގެ އިންތިޒާރުގައެވެ.