ދެޖިންސްގެ ގިނަ ޒުވާނުން އެ އެޕްލިކޭޝަނަކަށް ދެވި ހިފާފައިވާ ސޯޝަލް މީޑިއާ ޕްލެޓްފޯމް، ސްނެޕްޗެޓް މެދުވެރިކޮށް ގަވާއިދާ ޚިލާފަށް ފުޅާދާއިރާއެއްގައި މަސްތުވާތަކެތި ވިއްކާ ކަމަށް އެމެރިކާގެ ޑިޕާޓްމަންޓް އޮފް ޖަސްޓިސް (ޑީއޯޖޭ) އާއި ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ތުހުމަތުކޮށް، މައްސަލަ ތަހުގީގުކުރަން ފަށައިފިއެވެ.
އެ ދެ އިދާރާއިން ނެރުނު ބަޔާނެއްގައި ބުނެފައި ވަނީ ސްނެޕްޗެޓްގައި ގަވައިދާ ޚިލާފަށް މަސްތުވާތަކެތި ވިއްކާ ކަމުގެ ގިނަ ޝަކުވާތަކާއި ރިޕޯޓްތައް ލިބިފައިވާ ކަމަށެވެ. އަދި އެ ތަހުގީގު ކުރިއަށް ގެންދާނީ، ގާނޫނާ ޚިލާފަށް ހިންގާ އެފަދަ ކަންކަމަށް މަގުފަހިކޮށްދިނުމުގައި ސްނެޕްޗެޓްއިން އަދާކޮށްފައިވާ ދައުރާ ގުޅޭ ގޮތުން ކަމަށް ވެސް އެ ބަޔާނުގައިވެއެވެ.
މިއީ މަސްތުވާތަކެތި ވިއްކުމުގައި ސޯޝަލް މީޑިއާ ޕްލެޓްފޯމްތަކުގެ ދައުރެއް އޮތް ކަމަށް ބުނެ އެ ފަދަ ޕްލެޓްފޯމްތައް ތަހުގީގުކުރާ ފުރަތަމަ ފަހަރެއް ނޫނެވެ. ފާއިތުވި އަހަރުތަކުގައި ފޭސްބުކާއި އިންސްޓަގްރާމްގެ ވެސް މިފަދަ ތަހުގީގުތައް ހިންގާފައިވެއެވެ. ނަމަވެސް މިއީ ސްނެޕްޗެޓްގެ މިފަދަ މައްސައެއް ބަލާ ފުރަތަމަ ފަހަރެވެ.
މި މައްސަލައިގެ ތަހުގީގު އަދިވެސް އޮތީ އެންމެ ފުރަތަމަ މަރުހަލާގައި ކަމަށްވާއިރު، ޑީއޯޖޭ އާއި އެފްބީއައިއަށް ލިބިފައި ވަނީ ކޮން ހެއްކެއް ކަމެއް ނުވަތަ ކުރިއަށް ގެންދަން ރާވާފައި ވަނީ ކިހިނެއް ކަމެއް އަދި ސާފެއް ނުވެއެވެ. ނަމަވެސް އެ އިދާރާތަކުން މި ތުހުމަތުތައް ސީރިއަސްކޮށް ބަލައި، ސޯޝަލް މީޑިއާޕްލެޓްފޯމްތަކުގައި ގަވާއިދާ ޚިލާފަށް މަސްތުވާތަކެތި ވިއްކުން ހުއްޓުވުމަށް މަސައްކަތް ކުރާކަން އޮންލައިން ރިޕޯޓްތަކުން އެނގެއެވެ.
ސްނެޕްޗެޓްގެ މައްޗަށް ކޮށްފައިވާ މިފަދަ ބޮޑު ތުހުމަތަކުން ސަލާމަތްވުމަށްޓަކައި އާއި ކުންފުނީގެ މަގުބޫލުކަން ދަށަށް ދިޔަ ނުދިނުމުގެ ގޮތުން މައްސަލައިގައި ތަހުގީގުގައި ކަމާ ބެހޭ ފަރާތްތަކަށް އެއްބާރުލުން ދޭނެ ކަމަށް ބެލެވެއެވެ. އެގޮތުން ސްނެޕްޗެޓް ޕްލެޓްފޯމް ބޭނުންކުރާ ފަރާތްތަކުން ސަމާލުވެ، އެ ޕްލެޓްފޯމްގައި ގާނޫނާ ޚިލާފަށް އެއްވެސް ކަމެއް ނުކުރުމަށް އެ ކުންފުނިން ވަނީ އިލްތިމާސްކޮށްފައެވެ.
ސްނެޕްޗެޓަކީ ސްޓެންފޯޑް ޔުނިވާސިޓީގައި ތައުލީމް ހާޞިލް ކުރަމުން ދިޔަ ދުވަސްވަރު، 2011 ވަނަ އަހަރު އީވާން ސްޕީގަލް، ބޮބީ މާފީ އަދި ރެޖީ ބްރައުން އުފެއްދި މަލްޓިމީޑިއާ މެސެޖިން އެޕްލިކޭޝަނެކެވެ. މި އެޕްލިކޭޝަން މެދުވެރިކޮށް ފޮޓޯ ނެގުމާއި ވީޑިއޯ ރެކޯޑް ކުރުމާއި ޓެކްސްޓް އަދި ކުރެހުންތައް ޝެއާ ކުރެވެއެވެ.
މި އެޕްލިކޭޝަނަކީ އެންމެ ފުރަތަމަ ރައްޓެހިންގެ މެދުގައި ބޭނުންކުރުމަށް ބޭނުންކުރި އެޕްލިކޭޝަނެއް ނަމަވެސް، ގިނަ ބައެއްގެ މެދުގައި މި އެޕްލިކޭޝަނަށް ވަރަށް އަވަހަށް މަގުބޫލުކަން ލިބުނެވެ. ސްނެޕްޗެޓުން 2013 ވަނަ އަހަރު ތައާރަފްކުރި "ސްޓޯރީޒް" ފީޗާއަކީ 24 ގަޑިއިރުގެ މުއްދަތަކަށް ހުރިހާ ރައްޓެހިންނާ އެކު ސްނެޕް ޝެއާ ކުރެވޭނެ ފީޗާއެކެވެ. އޭގެ ފަހުން މި އެޕްލިކޭޝަނުން ވަނީ ޖިއޯފިލްޓާ ފަދަ ތަފާތު ފީޗާތައް ހިމަނައިފައެވެ.
ދެހާސްއެކާވީސް ވަނަ އަހަރުގެ ނިޔަލަށް ސްނެޕްޗެޓްގައި ދުވާލެއްގެ މައްޗަށް 355 މިލިއަނަށް ވުރެ ގިނަ އެކްޓިވް ޔޫޒަރުން އުޅޭއިރު، މިއީ ދުނިޔޭގެ އެންމެ މަގުބޫލު އެއް ސޯޝަލް މީޑިއާ ޕްލެޓްފޯމްއެވެ.