ބޮރޫޝިއާ ޑޯޓްމަންޑަށް ކުޅެމުން އަންނަ އިނގިރޭސި ޒުވާން ތަރި ޖޫޑް ބެލިންހަމް ގެނައުމަށް، ފުޓުބޯޅައިގެ ގަދަ ބާރު ރެއާލް މެޑްރިޑުން މަސައްކަތް ފަށައިފިއެވެ.
ރިޕޯޓުތައް ބުނާގޮތުން ރެއާލުން ބެލިންހަމްގެ ސޮއި ހޯދުމަށް މަސައްކަތްކުރަނީ އަންނަ އަހަރުގެ މޫސުމުގެ ޓްރާންސްފާ ވިންޑޯގައެވެ.
މި މަހުގެ 18 ވަނަ ދުވަހު ނިމުނު ވޯލްޑްކަޕްގައި ވެސް މޮޅު ކުޅުމެއް ދައްކާފައިވާ ބެލިންހަމް ގެނައުމަށް ރެއާލުން މަސައްކަތް ފަށާފައިވާއިރު، ޑޯޓްމަންޑުން އޭނާ ހިފަހައްޓަން މަސައްކަތް ނުކުރާނެކަމަށް ވެސް މީޑިއާ ރިޕޯޓުތައް ބުނެއެވެ.
އުމުރުން 19 އަހަރުގެ އިނގިރޭސި މިޑްފީލްޑަރު، ބެލިންހަމް ހޯދުމަށް މިދިޔަ އަހަރު ވެސް ރެއާލުން މަސައްކަތް ކުރިއެވެ. ނަމަވެސް މިދިޔަ އަހަރު އޭނާ ނިންމީ ޑޯޓުމަންޑުގައި މަޑުކުރުމަށެވެ.
ބެލިންހަމްގެ މޮޅު ކުޅުމުގެ ސަބަބުން ބޮޑެތި ގިނަ ކުލަބުތަކަކުން އަންނަނީ އޭނާގެ ސޮއި ހޯދުމަށް މަސައްކަތް ކުރަމުންނެވެ. އެގޮތުން އިނގިރޭސި ކުލަބު ލިވަޕޫލާއި، މެންޗެސްޓާ ސިޓީ އަދި ޗެލްސީން ދަނީ ބެލިންހަމްގެ ސޮއި ހޯދުމަށް މަސައްކަތް ކުރަމުންނެވެ.
ބެލިންހަމް ޑޯޓުމަންޑާ ގުޅުނީ 2020 ވަނަ އަހަރުގެ ތެރޭގައެވެ. ޑޯޓުމަންޑާ ޖާޒީގައި މިހާތަނަށް ކުޅުނު 76 މެޗުން އޭނާ ވަނީ ހަތް ލަނޑު ޖަހައިދީފައެވެ.
ބެލިންހަމް އަކީ 2021 ވަނަ އަހަރުގެ ދެވަނައަށް އެންމެ މޮޅު ޒުވާން ކުޅުންތެރިޔާއެވެ. އެ އަހަރުގެ އެންމެ ކުޅުންތެރިއަކަށް ހޮވިފައިވަނީ ބާސެލޯނާގެ މިޑްފީލްޑަރު ޕެޑްރީ ގޮންޒާލޭޒްއެވެ.