މާރާމާރީތަކާއި ހަމަނުޖެހުންތައް ފަދަ އިޖުތިމާއީ މައްސަލަތަކަކީ ރައްޔިތުންގެ ނަފުސާނީ ދުޅަހެޔޮކަމަށް ސީދާގޮތުން ނޭދެވޭ އަސަރު ކުރާ ކަންކަން ކަމަށް ހެލްތު މިނިސްޓަރު އަޙްމަދު ނަސީމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މިއަދު ދަރުބާރުގޭގައި އޮތް ނެޝަނަލް މެންޓަލް ހެލްތް ކެމްޕެއިން ލޯންޗު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތު ޝަރަފުވެރި ކޮށްދެއްވީ ރައީސް އިބްރާހީމް މުޙައްމަދު ޞާލިޙެވެ. މި ރަސްމިއްޔާތުގައި ރައީސްގެ އިތުރުން ނައިބު ރައީސް ފައިސަލް ނަސީމާއި އެޗްޕީއޭގެ ޑިރެކްޓާ ޖެނެރަލް މައިމޫނާ އަބޫބަކުރު ވެސް ބައިވެރިވެވަޑައިގަތެވެ.
މި ރަސްމިއްޔާތުގައި މިނިސްޓަރު ނަސީމް ވިދާޅުވީ ރާއްޖޭގައި ވެސް މަސްތުވާތަކެއްޗާއި ދުންފަތުގެ އިސްތިއުމާލު ކުރުންފަދަ ނޭދެވޭ އާދަތައް ގިނަ ކަމަށެވެ. އެކަމުގެ ސަބަބުން ނަފުސާނީ ދުޅަހެޔޮކަމަށް އަސަރުކޮށްފައިވާ މީހުން ރައްޖޭގައި ގިނަކަމަށް މިނިސްޓަރު ވިދާޅުވިއެވެ.
މީގެ އިތުރުން ގައިންގަޔަށް ނާރާ ބޮޑެތި ބަލިތައް ތަހައްމަލްކުރާ މީހުންގެ އާއިލާތަކުން ވެސް ތަފާތު ނަފުސާނީ މައްސަލަތަކާ ކުރިމަތިލާކަމަށް އޭނާ ވިދާޅުވިއެވެ.
"ރާއްޖޭގެ ކޮންމެ ފަސް މީހަކުން އެކަކު ޑިޕްރެޝަންގެ އުނދަގޫ ކޮންމެވެސް ވަރަކަށް އިހުސާސްކުރަމުން ދާކަމަށް އަޅުގަނޑަށް މައުލޫމާތު ލިބިފައިވޭ،" ނަސީމް ވިދާޅުވިއެވެ.
ނެޝަނަލް މެންޓަލް ހެލްތް ކެމްޕެއިން ލޯންޗު ކުރުމުގެ ރަސްމިއްޔާތުގެ ތެރެއިން -- ފޮޓޯ/ ހެލްތް މިނިސްޓްރީ
ރާއްޖޭގައި ނަފުސާނީ އެހީތެރިކަން ބޭނުންވާ މީހުންނާ އަޅާބަލާއިރު، ނަފުސާނީ ދުޅަހެޔޮކަމުގެ ތަމްރީނު ލިބިފައިތިބި މީހުން މަދުކަމަށް މިނިސްޓަރު ވިދާޅުވިއެވެ.
"ތަމްރީނު ލިބިފައިތިބި މީހުންގެ އަދަދުވެސް އެހާމަދު. އަޅުގަނޑުމެން ޚާއްސަ ސަމާލުކަމެއް އެބަ ދޭންޖެހޭ އަތޮޅުތެރޭގެ ރަށްތަކުގަވެސް މިކަމަށް ތަމްރީނު ލިބިފަ ތިބި މީހުން އިތުރުކުރުމަށް،" އޭނާ ވިދަޅުވިއެވެ.
އަތޮޅުތެރޭގައި ނަފްސާނީ މައްސަލަތަކަށް ފަރުވާ ދިނުމުގެ ނިޒާމް ގާއިމްކުރަން މިނިސްޓްރީން ކުރާ މަސައްކަތް ފާހަގަކުރައްވާ މިނިސްޓަރު ވިދާޅުވީ، ރާއްޖޭގެ ކޮންމެ އަތޮޅެއްގައި ވެސް މިކަމަށް ފަރުވާ ދެވޭނެ އިންތިޒާމު ހަމަޖެހޭނެ ދުވަސް ވަރަށް އަވަހަށް ފެންނާނެކަމަށެވެ.
މިނިސްޓަރު ވިދާޅުވީ، މިއަދު އިފުތިތާހުކުރި ކެމްޕެއިންގެ ސަބަބުން ކުރިއަށް އޮތް ތަނުގައި ނަފުސާނީ ދުޅަހެޔޮކަމުގެ މައުލޫމާތުތައް ރައްޔިތުންނަށް ހާމަކޮށްދީ، ހޭލުންތެރިކަން އިތުރުކުރުމުގެ މަސައްކަތް އިތުރަށް ހަރުދަނާ ވާނެކަމަށް އުއްމީދު ކުރައްވާ ކަމަށެވެ.
"އަޅުގަނޑުގެ އުންމީދަކީ ކުރިއަށްއޮތް ތަނުގައި މި ކަމުގެ މައުލޫމާތުތައް ރާއްޖޭގެ ރައްޔިތުންނަށް ހާމަކޮށްދީ އެކަންތަކާމެދު އަޅަންޖެހޭ ފިޔަވަޅުތައް އަވަސް ފުރުސަތެއްގައި އެޅުމުގެ މަގު ތަނަވަސްކޮށްދިނުން،" ނަސީމް ވިދާޅުވިއެވެ.