ދިވެހި އާޓިސްޓުންނަކީ ތަފާތު އެކި މީޑިއަމްތައް ބޭނުންކޮށްގެން އާޓް އުފައްދާ ހުނަރުވެރި ބައެކެވެ. ބައެއް މީހުން ފެންކުލަ ބޭނުންކުރާއިރު އަނެއްބަޔަކު ސްޕްރޭ ޕެއިން ބޭނުން ކުރެއެވެ. ޒުވާން ޝައުފާ ޒާހިރު ބޭނުން ކުރަނީ ރެޒިންއެވެ. އޭނާ ވަނީ މި އާޓް ފޯމް ބޭނުންކޮށް އަމިއްލަ މަސައްކަތުން ވިޔަފާރިއެއް މިހާރު ފަށާފައެވެ.
އުމުރުން 27 އަހަރުގެ ޝައުފާ އަކީ އަބަދުވެސް އާޓަށް ވަރަށް ބޮޑު ޝައުގުވެރިކަން ހުންނަ ޒުވާނެކެވެ. އެގޮތުން އެކި އާޓް ފޯމަށް ޝައުފާގެ ޝައުގުވެރިކަން ކުރިން ވެސް އޮތެވެ. އޭގެތެރެއިން ތަފާތު އެކި ކަހަލަ އާޓް ފޯމުތައް އެކްސްޕެރިމެންޓް ކޮށް އުޅުމުގެ ތެރޭގައި ރެޒިން އާޓަށް ޝައުފާގެ ސަމާލުކަން ދެވެން ފެށުނެވެ.
View this post on Instagram
"އަބަދުވެސް ބޭނުންވި ރެޒިން އާޓް ތައްޔާރު ކުރަން. ރެޒިން އާޓް ތައްޔާރުކުރަން ބޭނުންވާ ތަކެތި ރާއްޖެއިން ލިބުމުގެ ކުރިން ވެސް އެއީ ޝައުގުވެރިކަން އޮތް ކަމެއް،" ޝައުފާ ކިޔައިދިނެވެ.
ރެޒިން އާޓް އަކީ ރެޒިން ބޭނުންކޮށްގެން ތަފާތު އެކި ކަހަލަ ތަކެތި އުފައްދައިގެން ތައްޔާރުކުރާ އާޓް އެކެވެ. މި އާޓަކީ އާންމުކޮށް ފެން ކުލައިގައި ހުންނަ އެއްޗަކަށް އެކި ކުލަ އަޅައިގެން ތަފާތު އެކި ބައްޓަމަށް އެއްޗެހި އުފައްދާ އާޓް ފޯމެކެވެ.
View this post on Instagram
ޝައުފާ އޭނާއަށް ލިބުނު ހުސްވަގުތުގައި ރެޒިން އާޓް އުފައްދަން ފެށީ ވަރަށް ފަހުންނެވެ. އެއާއެކު އެކި ކަހަލަ އެއްޗެހި ހަދައި އެކްސްޕެރިމެންޓް ކުރަން ފެށީ އެކަމަށް އޮތް ލޯތްބެއްގެ ބޮޑު ކަމުންނެވެ. އެއްވެސް ހާލަތެއްގައި އެކަމުގެ ވިޔަފާރިއެއް ފެށުމުގެ ބޭނުމެއްގައެއް ނޫނެވެ.
ނަމަވެސް ފަށު ފުލުން ފެށިގެން ތަށި ބަހައްޓާ ކޯސްޓަރަށް ދާން ދެން މި އާޓް ފޯމް ބޭނުންކޮށްގެން އެއްޗެހި ހަދަން ފެށުމުން މިކަމުގެ ވިޔަފާރިއެއް ފެށިދާނެ ކަމުގެ ހިޔާލު އޭނާއަށް ލިބުނެވެ. "ލެޓްސް ބީ" ނަމުގައި އިންސްޓަގްރާމް ޕޭޖެއް ހުޅުވައި އަމިއްލަ މަސައްކަތެއް ކުރަން ފެށުނީ އެހާ ހިސާބުންނެވެ.
View this post on Instagram
ތަފާތު އެކި ކަހަލަ އެއްޗެހިތައް އުފައްދަން ފެށުމަށްފަހު ޝައުފާ ފުރަތަމަ ރެޒިން އާޓްވޯކް ދައްކާލީ މިދިޔަ މަހުގެ އޭޕްރީލް ފަހުކޮޅުގައެވެ. ރެޒިން ބޭނުންކޮށްގެން ޝައުފާ އުފެއްދީ ރިނދަލިފޮއްޗެކެވެ. މި ރިނދަލިފޮއްޗަކީ ފަށު ފުލަކަށް ބޭނުންކޮށްފައިވާ ރިނދަލިފޮއްޗެކެވެ.
ޝައުފާގެ އާޓުގައި މިއީ އާންމުގޮތެއްގައި ފެންނާނެ ތީމެކެވެ. މޫދާއި ކަނޑައަށް އޮތް ލޯބި އޭނާގެ ޕްރޮޑަކްޓުތަކުން ވަރަށް ރީތިކޮށް ފެންނާނެއެވެ. ގިނަ ޕްރޮޑަކްޓުތަކަކީ ނޫކުލަ ދައްކައިދޭ ޕްރޮޑަކްޓުތަކަށް ވާއިރު އެކި ކަހަލަ ބޮލިތަކާއި މިޔަރު އަދި މަޑި ފަދަ ތަކެތި މި ޕްރޮޑަކްޓުތަކުގައި ހިމެނޭނެއެވެ.
View this post on Instagram
"އަތުން ތައްޔާރުކޮށްފައިވާ ރެޒިން ގަހަނާއާއި ޕެންޑަންޓް އަދި އާޓް ޑެކޯ އާއި ޓްރޭ އަދި ބުކްމާކްގެ އިތުރުން ކޯސްޓާ ފަދަ ތަކެތި ލެޓްސް ބީ އިން ގަންނަން ލިބޭނެ،" ޝައުފާ ކިޔައިދިނެވެ.
މޫދާއި ކަނޑުގެ ދިރުންތަކަށް ލޯބިކުރާ މީހުންނަށް ޝައުފާގެ ޕްރޮޑަކްޓްތައް ވަރަށް ކަމުދާނެއެވެ. މިއީ ޝައުފާ އެތައް ވަގުތެއް ހޭދަކޮށް މި ކަމަށް ހުސްވެ ހުރެ ކުރާ މަސައްކަތެއްގެ ގޮތުގައި އުފައްދާ ތަކެއްޗެއްސެވެ. އެގޮތުން ޝައުފާ އުފައްދާ ޕްރޮޑަކްޓުތަކުގެ ތެރެއިން އެންމެ އެއްޗަކީ ވެސް ފަސް ދުވަހާއި ހަތް ދުވަހު އޭޭނާ ވަރަށް ފަރުވާތެރި ކަމާއެކު ވަގުތު ހުސްކޮށްގެން ކުރާ ބުރަ މަސައްކަތުގެ ނަތީޖާއެވެ. މި ހުރިހާ މަސައްކަތެއްގެ ފެންވަރު އޭނާގެ ޕޭޖުން މިހާރުވެސް ބަލާލެވެން ހުރި އިރު އޭގެތެެރެއިން ގިނަ ޕްރޮޑަކްޓުތަކަކީ ހަމަ ގަންނަން ލިބޭނެ އެއްޗެއްސެވެ.
View this post on Instagram
މިކަންތައް ކުރުމަށް ގިނަ ވަގުތު ނަގާއިރު އެ މަސައްކަތުގެ ތެރޭގައި ކުރާ ހުރިހާ ކަމަކީ ވެސް ވަރަށް ގަޔާވެގެން ޝައުފާ ކުރާ ކަންތައްތަކެކެވެ. ނަމަވެސް އޭގެތެރޭގައި ވެސް އުނދަގޫ ކަންތައްތައް ހުރެއެވެ. އެގޮތުން ޝައުފާއަށް އެންމެ އުނދަގޫ ކަމަކަށް ވަނީ ރެޒިން ބޭނުންކޮށްގެން އުފައްދާ އެއްޗެހި ސޭންޑުކުރުމުގެ މަސައްކަތެވެ. އަދި ކުދި ކީ ޗެއިން ފަދަ ތަކެތީގައި އާޓްވޯކް ކުރެހުމަކީ ވެސް ޝައުފާއަށް ވަރަށް އުނދަގޫ ކަމެކެވެ. ނަމަވެސް އޭނާ މިކަންތައްތައް އިތުރަށް ރަނގަޅު ކުރުމަށް ޝައުފާ އެކަންތައްތަކަށް ހޭދަކުރާ ވަގުތުތައް ވެސް އިތުރުކުރެއެވެ.
View this post on Instagram
ލެޓްސް ބީ އިން ފެންނާނީ ޝައުފާގެ ރެޒިން އާޓް ޕްރޮޑަކްޓުތައް އެކަންޏެއް ނޫނެނެވެ. އޭގެއިތުރުން އޭނާގެ ޓްރެޑިޝަނަލް އާޓް ސްޓައިލްތައް ބޭނުންކޮށްގެން ހަދާފައިވާ އާޓްވޯކްވެސް އެ ޕޭޖުން ލިބޭނެއެވެ. އޭގެތެރޭގައި އެކްރިލިކް ކުލަ އާއި އޮއިލް ޕެއިންޓިން ތައް ވެސް މި ޕޭޖުން ލިބެން ހުންނާނެއެވެ.
ޝައުފާ މިވަގުތު ދެކެމުން އަންނަނީ އެއް ހުވަފެނެކެވެ. އެއީ ލެޓްސް ބީ އިތުރަށް ފުޅާކޮށް ރާއްޖޭގެ އެންމެ ބޮޑު ބްރޭންޑަށް ހެދުމެވެ. އެކަމަށްޓަކައި އިތުރަށް މަސައްކަތްތައް ކުރަމުން އަންނަ ކަމަށް ޝައުފާ ފާހަގަކުރިއެވެ.