ޑާކް ރެއިން އެންޓަޓެއިންމެންޓުން ހަދާ ފިލްމެއްގައި، އަލީ ރަމީޒު އުފައްދާފައިވާ އަމިއްލަ ލަވައެއް، އޭނާގެ ހުއްދަ ނެތި ބޭނުން ކުރި މައްސަލައިގައި އެ ސްޓޫޑިއޯއިން މިއަދު މާފަށް އެދިއްޖެއެވެ.
ޑާކް ރެއިނުން ވަނީ ލަވަ ކިޔުންތެރިޔާ މަރިޔަމް އަޝްފާ، ލައްވާ، އަލީ ރަމީޒުގެ އަމިއްލަ އުފެއްދުމެއް ކަމުގައިވާ "ލޮލަކަށް ނިންޖެއް ނާދޭ" ކިޔުއްވުމަށް ފަހު ވީޑިއޯ ލަވައެއް ނެރެފައެވެ. އަދި އެ ސްޓޫޑިއޯއިން އުފައްދަމުން އަންނަ ފިލްމެއްގައި ވެސް އެ ލަވަ ބޭނުން ކުރަން ވަނީ ނިންމާފައެވެ.
ހުއްދަ ނެތި އަލީ ރަމީޒުގެ "ލޮލަކަށް ނިންޖެއް ނާދޭ" ލަވަ ބޭނުން ކުރެވުނީތީ އޭނާގެ ކިބައިން މާފަށް އެދި، ޑާކް ރެއިނުން ބުނެފައިވަނީ އެ ލަވަ ކުރިއަށްއޮތް ތަނުގައި އެމީހުންގެ އެއްވެސް އުފެއްދުމެއްގައި ބޭނުން ނުކުރާނެ ކަމުގެ ޔަގީންކަން އަލީއަށް ދޭ ކަމަށެވެ.
އަލީ ރަމީޒު މިއަދު ބުނީ ރާއްޖޭގެ ފިލްމުތައް ހަދާ ކުންފުންޏަކުން އޭނާގެ އަމިއްލަ އުފެއްދުމެއް އޭނާގެ އިޒުނައަކާ ނުލައި އެހެން މީހަަކަށް ދީގެން ކިޔުއްވާފައިވާ ކަަމަށެވެ. އަދި ބުނެފައިވަނީ އޭނާގެ އުފެއްދުންތައް ބޭނުންކުރާ ފަރާތްތަކާ މެދު ޝަރުއީ އަދި ގާނޫނީ ފިޔަވަޅު އަޅަން ފަސް ނުޖެހޭނެ ކަމަށެވެ.
މީގެ އިތުރުން އަލީ ވަނީ ފިލްމު ކުޅުމުގެ ނަމުގައި ބިންމަތި ފަސާދަ ކުރުން ހުއްޓާލައި މާތްﷲއަށް ބިރުވެރިތިވުމަށް އެންމެނަށް ނަސޭހަތްތެރިވެފައެވެ.
ލަވަކިޔުމުގެ ދާއިރާގައި ރާއްޖޭގެ މެދުއުޑުގައި ފިޔަ ޖަހަމުން އައި އަލީ ރަމީޒް، މިއުޒިކާ ދުރަށް ދިޔުމަށްފަހު، މިހާރު އާއްމުކޮށް ކުރާ މަސައްކަތަކީ އިސްލާމް ދީނުގެ ޝިއާރު ފާޅު ކުރުމާއި ދީނަށް މީހުން ހޭލުންތެރި ކުރުވެމެވެ. އޭގެ އިތުރުން މަގުބޫލު އެތައް މަދަހަ ތަކެއް ވެސް އޭނާ ކިޔާފައިވެއެވެ.