އަމީނީ މަގުގައި ތާރުއެޅުމުގެ މަސައްކަތް ކުރަމުންދާއިރު، އެ މަގުގައި ހުންނަ ގަސްތައް ނަގަނީ މަޖުބޫރުވެގެން ކަމަށް މަގު ހަދާ ކުންފުނި ރޯޑް ޑިވޮލޮޕްމެންޓް ކޯޕަރޭޝަން (އާރްޑީސީ)އިން ބުނެފިއެވެ.
އަމީނީ މަގުގައި ތާރުއެޅުމުގެ މަސައްކަތް ކުރާއިރު އެ މަސައްކަތުގެ ތެރެއިން އެ ހިސާބުގައި ހުރި ގަސްތައް ވަނީ އެއްކޮށް ކޮށާލައިފައެވެ. އެކަމުގެ ކަންބޮޑުވުމާއި ޝަކުވާ އާންމުން ވެސް ސޯޝަލް މީޑިއާގައި ދަނީ ކުރަމުންނެވެ.
އެންމެ ފުރަތަމަ އަމީނީ މަގު ތަރައްގީކުރަން ފެށުމުގެ ކުރިން އާރުޑީސީން ވަނީ އެ މަގު ތަރައްގީކުރާނީ އެއްވެސް ގަހަކަށް ގެއްލުން ނުވާނެހެން ތިމާވެއްޓާ ރައްޓެހި ގޮތަކަށް ކަމަށް ބުނެފައެވެ.
އާރުޑީސީން ބުނި ގޮތާ ޚިލާފަށް އެކަން ކުރަމުން ދާތީ އާންމުންގެ ކަންބޮޑުވުންތަކެއް ހުރިއިރު، އެ ކުންފުނީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) މިއަދު "ސަން"އަށް ވިދާޅުވީ ގަސްތައް ކޮށައި ނެގުމަކީ އެ ކުންފުނިން އެއްގޮތަކަށް ވެސް ބޭނުންވާ ކަމެއް ނޫން ކަމަށެވެ.
"އަޅުގަނޑުމެން އެއްގޮތަކަށްވެސް ބޭނުމެއް ނުވޭ އެގޮތަކަށް ކަންތައް ކުރާކަށް. އިތުރު ގޮތެއް ނެތިގެން ގަސްތައް ނަގަނީ. އެކަމު މަގު ހަދާ ނިމޭއިރު ރަނގަޅުވާނެ. މިހާރު ނަގާ ވަރަށް ވުރެ އިތުރަށް ވެސް ގަސް އިންދާނަން. މަގު ފެންނާނީ ފެހިކޮށް،" މޫކޭ ވިދާޅުވިއެވެ.
އަމީނީ މަގު ތަރައްގީ ކުރުމުގެ މަސައްކަތް އާރުޑީސީއާ ހަވާލުކުރީ މިދިޔަ ޖުލައި މަހުގެ ތިން ވަނަ ދުވަހު، 210 ދުވަހުގެ ތެރޭގައި ނިންމާ ގޮތަށެވެ. އެ މަޝްރޫއުގެ އަމަލީ މަސައްކަތް ފެށީ މިދިޔަ މަހުގެ 30ވަނަ ދުވަހުއެވެ.
އެއީ 84 މިލިއަން ރުފިޔާގެ މަޝްރޫއެކެވެ.