އޭޝިޔާ ސަރަޙައްދުގައި ފުރަތަމަ ފަހަރަށް ބާއްވާ އައިބީސީ ވޯލްޑް ޓޫއާ މުބާރާތް، ވިޒިޓް މޯލްޑިވްސް ޕްރޯ 2022 ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އިފްތިތާހުކޮށްދެއްވައިފިއެވެ.
މިއަދު ހަވީރު ވަރުނުލާ ރާޅުގަނޑު ސަރަޙައްދުގައި ބޭއްވި ރާޅާއެޅުމުގެ އެ މުބާރާތް އިފްތިތާހުކޮށްދެއްވުމަށް ބޭއްވި ޚާއްސަ ރަސްމިއްޔާތު ޝަރަފްވެރިކޮށްދެއްވާފައި ވަނީ ވެސް ރައީސް ޞާލިޙެވެ.
ވިޒިޓް މޯލްޑިވްސް ޕްރޯ 2022 އިފުތިތާހުކޮށްދެއްވުމުގެ ރަސްމިއްޔާތުގައި ބޯޑީބޯޑީންގ އެސޯސިއޭޝަންގެ ޖެނެރަލް ސެކްރެޓަރީ ހަސަން ރަޝީދު ވިދާޅުވީ ރާއްޖޭގައި އައިބީސީ ވޯލްޑް ޓޫއާ މުބާރާތެެއް މުޅިން އަލަށް ބޭއްވުމަށް މަގުފަހިކޮށްދެއްވީ ރައީސް ޞާލިޙުކަމަށެވެ.
އެ މުބާރާތުގެ ސަބަބުން ބޯޑީ ބޯޑިން ޓުއަރިޒަމަށް ރާއްޖެ ހުޅުވޭނެކަމަށް ވެސް ރަޝީދު ވިދާޅުވިއެވެ. އަދި މުބާރާތުގެ ސަބަބުން ރާއްޖޭގެ ރާޅާ އެޅުންތެރިން ވޯލްޑް ޓޫއާ މުބާރާތެއްގައި ބައިވެރިވެ ރަނގަޅު ވަނައެއް ހޯދުމަށް ކުރާ މަސައްކަތަށް އެހީތެރިކަމެއް ލިބޭނެކަމަށް ވެސް އޭނާ ވިދާޅުވިއެވެ.
ވިޒިޓް މޯލްޑިވްސް ޕްރޯ 2022 އިފުތިތާހުކޮށްދެއްވުމުގެ ރަސްމިއްޔާތުގައި ބޯޑީބޯޑީންގ އެސޯސިއޭޝަންގެ ޖެނެރަލް ސެކެޓްރީ ހަސަން ރަޝީދު ވާހަކަދައްކަވަނީ --- ސަން ފޮޓޯ/ މުޙައްމަދު ނާއިލް ހުސައިން
"މިއަދު މި ހުޅުވާލެވޭ ދޮރަކީ ރާއްޖޭހެ ބޮޑީ ބޯޑަރުންނަށް ވޯލްޑު ޓުއާއެއްގައި ވާދަކޮށް ދުނިޔޭގެ ރޭންކިންގައި ދިވެހި ރާއްޖޭގެ ނަން ފަވާލަން ލިބޭ އަގުހުރި ފުރުސަތެއް،" ހަސަން ރަޝީދު ވިދާޅުވިއެވެ.
ވިޒިޓް މޯލްޑިވްސް ޕްރޯ 2022ގެ ނަމުގައި ރާއްޖޭގައި ބާއްވާ ރާޅާއެޅުމުގެ މުބާރާތް އަންނަ މަހުގެ ހަތް ވަނަ ދުވަހާ ހަމައަށް ކުރިއަށް ގެންދިއުމަށް ވަނީ ހަމަޖެހިފައެވެ.
އެ މުބާރާތުގައި ރާއްޖޭގެ އިތުރުން އިތުރު 12 ޤައުމަކުން ވާދަކުރާއިރު، އެ މުބާރާތުގައި ދުނިޔޭގެ އަންހެން އަދި ފިރިހެން ރާޅާ އެޅުންތެރިން ބައިވެރިވާނެކަމަށް މޯލްޑިވްސް ބޮޑީ ބޯޑިން އެސޯސިއޭޝަނުން ބުނެއެވެ.