ހިޔާ މަޝްރޫއުގެ ދަށުން ސްޓެލްކޯގެ މުވައްޒަފުންނަށް ހާއްސަކޮށްގެން އިމާރާތްކުރި ފްލެޓުތައް ގަތް މުވައްޒަފުންނާ އަންނަ މަހުގެ ހަ ވަނަ ދުވަހު އެ ތަންތަން ހަވާލުކުރާނެ ކަމަށް އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވެއްޖެއެވެ.
ސްޓެލްކޯގެ ބޯޑުގެ އާ ޗެއާމަން އަދި ރައްޔިތުންގެ މަޖިލީހުގެ ހިތަދޫ މެދު ދާއިރާގެ ކުރީގެ މެންބަރު ބްރިގޭޑިއާ ޖެނަރަލް އިބްރާހިމް މުހައްމަދު ދީދީ (ޑީޑީ) އެ ކުންފުނީގެ މުވައްޒަފުންނަށް ތައާރަފު ކުރުމަށް ރޭ ބޭއްވި ބައްދަލުވުމެއްގައި ޝަރީފް ވަނީ އެކަން އިއުލާނު ކުރައްވާފައެވެ.
ކުރިން ސްޓެލްކޯގެ ފްލެޓުތައް މުވައްޒަފުންނާ ހަވާލުކުރަން ހަމަޖެހިފައިވާ ދުވަހަކީ މިއަދު ނަމަވެސް ރޭ ބޭއްވި ބައްދަލުވުމައި ޝަރީފް ވިދާޅުވީ ޔަގީންކަމާއެކު ފްލެޓުތަކަށް ވަދެވޭނެ ތާރީހަކީ އަންނަ ހަފުތާގެ ހޮނިހިރު ދުވަސް ކަމަށެވެ.
"އޯގަސްޓު މަހުގެ ހަވަނަ ދުވަހު ޔަގީން ކަމާއެކު ފުލެޓުތައް ލިބުނު މުވައްޒަފުންނަށް އެ ފުލެޓުތަކަށް ވަދެވޭނެ. އަޅުގަނޑުމެންގެ ތެރެއިން ފްލެޓް ލިބިފައިވާ ބޭފުޅުން މެންދުރު ފަރިކުޅުއްވަން ޖެހޭނީ ފްލެޓްގައި،" އޭނާ ވިދާޅުވިއެެވެ.
ޝަރީފް ވިދާޅުވީ ދިގު މުއްދަތަކަށް ފުލެޓުތައް ބޭނުންކުރާނަމަ ފުލެޓުތައް ރަނގަޅަށް ބަލަހައްޓަން ޖެހޭނެ ކަމަށެވެ. އެގޮތުން އެއް ކޮޓަރީގެ އެޕާޓުމެންޓުތަކުން މެއިންޓެއިނެސް ފީގެ ގޮތުގައި މަހަކު 1،000ރުފިޔާގެ ފީއެއް ނަގާއިރު މެއިޑް ރޫމު ހިމެނޭ ގޮތަށް ތިން ކޮޓަރީގެ އެޕާޓްމަންޓްތަކުން މެއިންޓަނެންސް ފީގެ ގޮތުގައި 1،300 ރުފިޔާ ނަގާނެ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ އެ ފްލެޓުތައް ހިމެނޭ 15 ފަންގިފިލާގެ ދެ ޓަވަރުގެ މެދުގައި ސްވިމިން ޕޫލެއް ހެދުމުގެ ވިސްނުން ސްޓެލްކޯއިން ގެންގުޅޭ ކަމަށެވެ. އެއީ ފްލެޓްގެ އަގު މަތިކޮށް ހިދުމަތް ދިނުމަށް ކުރާ ކަމެއް ކަމަށް އޭނާ ވިދާޅުވިއެވެ.
"މީގެ އިތުރުންވެސް އެހެނިހެން ކަންކަންވެސް އެބަހުރި. އެގޮތުން ފްލެޓްތަކުގެ ސެކިއުރިޓީ 24 ގަޑިއިރު ބެލެހެއްޓޭނެ. އެ އިންތިޒާމު ހަމަޖައްސަންދެން ކުންފުނީގެ ސެކިއުރިޓީ އޮފިސަރުން ތިބޭނެ،" އޭނާ ވިދާޅުވިއެވެ.
ފްލެޓްތަކުގެ ހަރަދަށް މިހާތަނަށް 640 މިލިއަން ރުފިޔާ ޚަރަދުވެފައިވާ ކަމަށާއި ފްލެޓް އިމާރާތްކޮށް ނިމިފައި ހުރިނަމަވެސް އިތުރު ވޭރިއޭޝަންތަކެއް ހުރުމުން އެ ހަރަދުތައް ހިމެނޭ ގޮތަށް ކޮށްފައިވާ ހަރަދުގެ ޖުމުލަ އަގު 700 މިލިއަން ރުފިޔާ އަށް އަރާނެ ކަމަށް ޝަރީފް ވިދާޅުވިއެވެ.
ސްޓެލްކޯގެ ފުލެޓުތައް ލިބުނު މުވައްޒަފުން އަންނަ ޑިސެމްބަރާ ހަމައަށް މަހު ކުލި ދައްކަން ނުޖެހޭނެއެވެ. އެގޮތަށް ހެދީ އެ މުއްދަތުގެ ތެރޭގައި މުވައްޒަފުންގެ މުސާރައިންނާއި އެހެން ގޮތްގޮތުން ކުންފުންޏަށް 10 ޕަސެންޓް ދައްކަމުންދާތީ ކުލި ނަގައިފި ނަމަ ދަތިވާނެ ކަމަށް ފެންނާތީ ކަމަށް މީގެ ކުރިން ޝަރީފް ވިދާޅުވިއެވެ.
އެ ފުލެޓުތަކުގެ އެއް ކޮޓަރީގެ އެޕާޓުމެންޓުތަކުގެ އަގު އުޅެނީ 5،622 ރުފިޔާއަށް ކަމަށް ވާއިރު، މެއިޑް ރޫމް ހިމެނޭ ތިން ކޮޓަރީގެ އެޕާޓުމެންޓުތަކުގެ އަގު އުޅެނީ 10،356ރުފިޔާ އާއި 10،652ރުފިޔާ އާ ދެމެދުގެ އަގެއްގައެވެ.
ހުޅުމާލޭ ދެވެނަ ފިޔަވަހީގައި، އެކި ކުންފުނިތަކުގެ ފުލެޓުތައް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި އިމާރާތްކުރަން ވަނީ ފަށާފައެވެ.
އޭގެތެރެއިން ސްޓެލްކޯގެ ދެ ޓަވަރުގައި އެއް ކޮޓަރީގެ 72 އެޕާޓްމަންޓާއި ދެ ކޮޓަރި އާއި މެއިޑް ރޫމް ހިމެނޭ 288 އެޕާޓްމަންޓު ހިމެނެއެވެ. އެއީ ޖުމުލަ 360 ފުލެޓެވެ.