އިކޮނޮމިކް މިނިސްޓަރުގެ ނައިބުގެ މަގާމުގައި ހުންނެވި އަހްމަދު ޝުހާދު އާރްޑީސީގެ ޖެނެރަލް މެނޭޖަރެއްގެ މަގާމު ވެސް ފުރުއްވާ ކަމަށް ދެކެވޭ ވާހަކަތައް އޭނާ ދޮގު ކުރައްވައިފިއެވެ.
އޭނާ މިއަދު "ސަން"އަށް ވިދާޅުވީ މި މަހުގެ ހަތަރުވަނަ ދުވަހު އޭނާ އިކޮނޮމިކް މިނިސްޓްރީގެ ނައިބުގެ މަގާމަށް އައްޔަނުކުރުމާ ހަމައިން އާރްޑީސީގެ މަގާމުން ވަކިވެފައިވާކަމަށެވެ.
އަދި އެ ދުވަހުން ފެށިގެން އާރްޑީސީގައި ހުންނެވި މަގާމުގެ މުސާރަ ހިނގަމުން ނުދާ ކަމަށް ވެސް އޭނާ ވިދާޅުވިއެވެ.
ޝުހާދުގެ މައްޗަށް އެ ތުހުމަތު ކުރެވެން ފެށީ އާރްޑީސީގެ މުވައްޒަފުން ތިބި ވައިބާ ގުރޫޕެއްގައި އެ ކުންފުނީގެ އެޗްއާރު މެނޭޖަރު ޗުއްޓީއަށް ވަޑައިގަންނަވަމުން ޝުހާދުއަށް އޭނާގެ ޑިޕާޓްމަންޓް ހަވާލުކުރެއްވި ކަމަށް ކުރައްވާފައިވާ މެސެޖެއް މީޑިއާއަށް ތިލަވުމާ ގުޅިގެންނެވެ.
އޭނާ ވިދާޅުވީ އެ މެސެޖަކީ އެ މުވައްޒަފަށް އެރި އޮޅުމަކުން ފޮނުވިފައިވާ މެސެޖެއް ކަމަށެވެ.
އިއްޔެ އެ މައްސަލަ ހޫނުވުމާއެކު، ބައެއް ފަރާތްތަކުން ވަނީ ޝުހާދު އާރްޑީސީގެ ޖެނެރަލް މެނޭޖަރު ކަމުން ވަކި ވުމާއެކު، ކޮންސަލްޓެންސީ އެއްބަސްވުމެއްގެ ދަށުން އެ ކުންފުނީގައި މަސައްކަތް ކުރާކަމަށް ތުހުމަތުކޮށްފައެވެ.
ނަމަވެސް، އޭނާ ވިދާޅުވީ އެފަދަ އެއްވެސް އެއްބަސްވުމެއް މި ވަގުތު ނެތް ކަމަށާއި، އާރްޑީސީއިން އެއްވެސް ގޮތަކުން މުސާރަ ނަންގަވަމުން ނުދާކަމަށެވެ.
ޝުހާދުއަކީ އާރްޑީސީ އުފެދުމާއެކު، އެ ކުންފުންޏަށް ފުރަތަމަ ނެގި މުވައްޒަފުންގެ ތެރެއިން އެކަކެވެ.