މިދިޔަ އަހަރުގެ މާޗު މަހުގެ ތެރޭ ރ. މަޑުއްވަރީގައި ފެންމަތިވި ރޭޕްގެ މައްސަލަ އޮއްބާލުމަށް ސަރުކާރުގެ އިސް ބޭފުޅުންތަކެއް ބައިވެރިވިކަމަށް ބުނެ ބޮޑެތި ތުހުމަތުތަކެއް ކޮށްފިއެވެ.
ރޭ ޗެނަލް 13ގެ "ހަޖަމް" ޕްރޮގްރާމުގައި ވަނީ އެ މައްސަލައިގައި ތުހުމަތުކުރެވޭ ޓީޗަރުގެ ފޯން ކޯލްތަކެއްގެ އޯޑިއޯ ރެކޯޑިން ތަކެއް ލީކު ކޮށްލާފައެވެ. އެ ރެކޯޑިން ތަކުން އަޑު އިވޭ ގޮތުގައި ތުހުމަތު ކުރެވޭ ޓީޗަރު ވާހަކަ ދައްކަނީ "އެޑަމް" ކިޔާ މީހަކާއި، "ސަމަރޭ" ކިޔާ މީހަކާއެވެ.
އޭގެ ތެރެއިން "އެޑަމް" އާ ކުރި ފޯނު ކޯލުގައި ތުހުމަތު ކުރެވޭ ޓީޗަރު ވަނީ އާރްޑީސީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) މެދުވެރިކޮށް ރައީސް އިބްރާހީމް މުހައްމަދު ޞާލިހުއާ އެ މައްސަލައާ ގުޅޭގޮތުން ވާހަކަދެއްކި ކަމަށް ބުނެފައެވެ. އަދި، އަނިޔާ ލިބުނު ކުއްޖާ ޖެންޑާ މިނިސްޓްރީއަށް ދިން ބަޔާނާއި، އާއިލާގެ ކައިރީގައި ދައްކާފައި ހުރި ވާހަކަތަކާ ބެހޭ ގޮތުން އެ ކޯލުގައި ވާހަކަ ދެކެވެއެވެ.
އޭގެ ރައްދުގައި "އެޑަމް" ވަނީ ރައީސް އޮފީހުގެ ޗީފް އޮފް ސްޓާފް އަލީ ޒާހިރާއި ރައީސުލްޖުމްހޫރިއްޔާއާ ގުޅައި މޫކޭ "އެކަން ބަލައިފި" ކަމަށް ބުނެފައެވެ.
މީގެ އިތުރުން "ސަމަރޭ"އާ ދެއްކި ވާހަކައިގައި ތުހުމަތުކުރެވޭ ޓީޗަރު ވަނީ "އެ މައުލޫމާތު" ވެސް މޫކޭ އަށް ލިބިފައި ވަނީ ރައީސުލްޖުމްހޫރިއްޔާގެ ފަރާތުން ކަމަށް ބުނެފައެވެ.
ޖަވާބުގައި "ސަމަރޭ" ބުނާ އަޑު އިވެނީ އޭނާގެ ހާޒިރުގައި މޫކޭ، އިކޮނޮމިކް މިނިސްޓަރު ފައްޔާޒް އިސްމާއީލަށް ގުޅުއްވި ކަމަށެވެ. އަދި ހޯމް މިނިސްޓަރު އައްޝައިޚް އިމްރާން އަބްދުﷲއަށް ގުޅުއްވި ކަމަށް ފައްޔާޒް ވިދާޅުވެފައިވާ ކަމަށް "ސަމަރޭ" ބުނެއެވެ.
މީގެ އިތުރުން "ސަމަރޭ" ދެއްކި ވާހަކައިގެ ތެރެއިން ވަނީ ކުއްޖާއަށް ނަފްސާނީ ގޮތުން އަސަރުތަކެއް ކޮށްފައި ހުރި ކަން ފާހަގަކޮށްފައެވެ. އަދި ތަހުގީގުގައި ދެން އޮންނާނީ އެ ކުއްޖާއަށް އެހެންވީ ކިހިނަކުން ތޯ ބެލުން ކަމަށް އޭނާ ބުނެއެވެ. އެވާހަކަތައް އެ ކުއްޖާ ކިޔައި ނުދީފިނަމަ އެކަން ހޯދޭނެ އިތުރު ގޮތެއް ނޯންނާނެ ކަމަށް އޭނާ ބުނެއެވެ.
ޖަވާބުގައި ތުހުމަތު ކުރެވޭ ޓީޗަރު ވެސް ބުނަނީ "ނުބުނަންޏާ އެކަހަލަ ކަމެއް ނުހިނގަނީ" ކަމަށެވެ.
ޓީޗަރަށް ތުހުމަތު ކުރެވެނީ އުމުރުން 14 އަހަރުގެ އެ ކުއްޖާ ގެސްޓް ހައުސްއަކަށް ގެންގޮސް ވަޅިން ބިރުދައްކައި، މަޖުބޫރުކޮށްގެން އެއްޗެއް ބޯންދިނުމަށްފަހު، އިތުރު ބަޔަކާ ބައިވެރިވެގެން އެ ކުއްޖާއަށް ޖިންސީ ގޯނާ ކުރި ކަމުގެ ތުހުމަތެވެ. ޖިންސީ ގޯނާ ކުރީ އެ ކުއްޖާގެ ފައި އެއްސުމަށްފަހު ކަމަށް ވެސް ތުހުމަތުކުރެއެވެ.
މި މައްސަލައިގައި ތުހުމަތު ކުރެވޭ ޓީޗަރު ބުނަމުން އަންނަނީ މި މައްސަލައަކީ އޭނާ ފްރޭމްކުރުމުގެ ގޮތުން އުފައްދާފައިވާ މައްސަލައެއްކަމަށެވެ.
ޗެނަލް 13ގެ ސްޓޭޝަން މެނޭޖަރު އިބްރާހީމް ސައީދު "ސަން" އަށް ވިދާޅުވީ އެ ރެކޯޑިންތައް އެ ޗެނަލުން ގެނެސްދިނީ އެ ކުއްޖާއަށް އިންސާފު ހޯދައިދިނުމަށް އެހީތެރިވުމުގެ ގޮތުން ކަމަށެވެ.
"މި ފަދަ މައްސަލައެއްގައި ސަރުކާރުގެ ވެރިންތަކެއް މި ގޮތަށް ނުފޫޒު ފޯރުވުމަކީ އާންމުންނަށް އެނގެންޖެހޭ ކަމެއް. މި މައްސަލަ ވަރަށް ރަނގަޅަށް ސްޓަޑީކޮށްފައި އަޅުގަނޑުމެން މިކަން މި ފެންމަތި ކުރީ،" އިބްރާހީމް ސައީދު ވިދާޅުވިއެވެ.
"އަނިޔާ ލިބޭ މިފަދަ ކުދިންނަށް ލިބެންވާ އިންސާފަށް، ނުފޫޒު ބޭނުންކޮށްގެން ހުރަސްއެޅީމަ، އެ އިންސާފު ހޯދައިދިނުމަށް މަސައްކަތް ކޮށްދިނުމަކީ އަޅުގަނޑުމެންގެ ޒިންމާއެއް ކަމަށް އަޅުގަނޑުމެން ގަބޫލުކުރަނީ،"
"ސަން"އާ ވާހަކަ ދައްކަމުން އަނިޔާ ލިބުނު ކުއްޖާގެ ބައްޕަ ބުނީ ސަރުކާރުން އެ މައްސަލައަށް ނުފޫޒު ފޯރުވާފައިވާކަން އެ ކޯލް ރެކޯޑިންތައް އަޑުއެހުމަށްފަހު އާއިލާއިން ޔަގީން ކުރާ ކަމަށެވެ.
އޭނާ ބުނީ އެ މައްސަލަ ފައިލްކޮށްފައި ވަނީ ސަރުކާރުގެ އިސްވެރިންތަކެއް ފޯރުވި ނުފޫޒެއްގެ ސަބަބުން ކަމަށް ބުނުމުގެ ޖާގަ އެބައޮތް ކަމަށެވެ.
"އަޅުގަނޑުގެ ސުވާލަކީ ފުލުހުން ތަހުގީގު ކުރާ ޖިންސީ ގޯނާގެ މައްސަލައަކާ ގުޅޭގޮތުން، މަގު ހެދުމުގެ މަސައްކަތް ކުރާ ކުންފުނީގެ އެމްޑީ އާއި އިގްތިޞާދާ ބެހޭ ވަޒީރު ގުޅުއްވައި ވާހަކަ ދައްކަވަންޖެހެނީ ކީއްވެގެންތޯއޭ. އެއީ އެބޭފުޅުންގެ މެންޑޭޓްގައި އޮތް ކަމެއްތޯއޭ،" އެ ކުއްޖާގެ ބައްޕަ ބުންޏެވެ.
"ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް އަޅުގަނޑު އާދޭސް މި ދަންނަވަނީ، އަޅުގަނޑުގެ ދަރިފުޅަށް ޖިންސީ ގޯނާކުރި މައްސަލަ މިނިވަންކަމާއި އިންސާފުވެރިކަމާއެކު ތަހުގީގުކޮށް ގާނޫނީ ފިޔަވަޅު އެޅޭނެ އިންތިޒާމްތައް ހަމަޖައްސަވައި ދެއްވާށޭ."
އެ މައްސަލައިގެ ތަހުގީގު ފެށުމާއެކު އެ ޓީޗަރު ވަޒީފާއިން ސަސްޕެންޑުކުރިއެވެ. އަދި އޭގެ ފަހުން ސިވިލް ސާވިސް ކޮމިޝަނުން ވަނީ އޭނާ ވަޒީފާއިން ވަކިކޮށްފައެވެ.
ޖިންސީ ގޯނާގެ ޝިކާރައަކަށްވި އެ ކުއްޖާއަށް އިންސާފު ހޯދުމަށް ގޮވާލައި މަޑުއްވަރީގައި މީގެ ކުރިން ސިލްސިލާ މުޒާހަރާތަކެއް ވެސް ކޮށްފައިވެއެވެ. އެ މުޒާހަރާތައް ހޫނުވެ ހަމަނުޖެހުންތައް ވެސް އޭރު ހިނގިއެވެ.
އިކޮނޮމިކް މިނިސްޓަރު ފައްޔާޒް އިސްމާއީލް "ސަން"އަށް ވިދާޅުވީ މިކަމާ ގުޅިގެން ކުރެވޭ ތުހުމަތު ތަކަކީ އެއްވެސް ހަގީގަތެއް ނެތް، ދޮގެއް ކަމަށެވެ. އަދި، ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވީ އޭނާގެ ނަން އޭނާއަށް ނޭނގި ވަރަށް ގިނައިން ބޭނުންކުރާ ކަމަށާއި، ގާނޫނާ ހިލާފު އެއްވެސް ކަމަކަށް އެއްބާރުލުން ނުދޭ ކަމަށެވެ. ސީދާ އެ މައްސަލައާ ގުޅޭ އެއްވެސް މައުލޫމާތެއް ލިބިފައި ނުވާކަމަށް ވެސް އޭނާ ވިދާޅުވިއެވެ.
މިކަމާ ގުޅިގެން ހޯމް މިނިސްޓަރު އިމްރާން އަބްދުﷲ އާއި އާރްޑީސީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) އާއި، ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒުގެ ބަހެއް ހޯދުމަށް "ސަން"އިން ކުރި މަސައްކަތް ކާމިޔާބުވާގޮތް ވަނީ ނުވެފައެވެ.