މި އަހަރުގެ ފުރަތަމަ ހަނދުކޭތަ، މަޝްހޫރު ނަމުން ނަމަ "ބްލަޑް މޫން" މިރޭ ހިފާނެ ކަމަށް އެމެރިކާގެ ޖައްވީ ކަންތައްތަކާ ބެހޭ އިދާރާ "ނާސާ" އިން ބުނެފިއެވެ.
ނާސާ އިން ބުނެފައިވާ ގޮތުގައި މިރޭ އަދި މާދަމާ ހިފާ މި ހަނދުކޭތަ އާދަޔާ ހިލާފަށް ބޮޑުވާނެ ކަމަށާއި ހަނދު ހުންނާނީ ރަތް ކުލައިގައެވެ.
އަށްޑިހަ ހަތަރު މިނެޓަށް ދެމިގެންދާ މި ހަނދުކޭތަ އެމެރިކާއާއި އެފްރިކާ އަދި ހުޅަނގު ޔޫރަޕްގެ ގިނަ ގައުމުތަކަށް ފެންނާނެ ކަމަށް އެމެރިކާގެ ސްޕޭސް އެޖެންސީން ބުނެފައި ވެއެވެ. ނަމަވެސް އިންޑިޔާ އަދި ރާއްޖެއަށް "ސުޕާ ރެޑް ބްލަޑް މޫން" ފެނުމުގެ ފުރުސަތެއް ނެތެވެ.
އިނގިރޭސި ވިލާތުގައި "ސުޕާ ރެޑް ބްލަޑް މޫން" އެންމެ ފަހުން ހިފާފައިވަނީ 2019 އަހަރުގެ ޖެނުއަރީ މަހުގެ ތެރޭގައެވެ.
ހަނދު ކޭތައެއް ހިފަނީ، ހަނދު ދުނިޔޭގެ ދެކޮޅުގައި ހުރުމުގެ ސަބަބުން އިރުން ފޮނުވައިދޭ އަލި ހަނދަށް އެޅުމުންނެވެ. ބްލަޑް މޫން އެއްގައި ހަނދު ރަތް ކުލައިން ފެންނަ ސަބަބަކީ އިރާއި ހަނދުގެ ދެމެދަށް ދުނިޔެ ވަނުމެވެ.
މިރޭ ހިފާ ހަނދުކޭތަ ވެގެންދާނީ މި އަހަރު ހިފާ ދެ ހަނދުކޭތައިގެ ތެރެއިން ފުރަތަމަ ހަނދުކޭތައަށެވެ. ދެވަނަ ހަނދުކޭތަ ހިފާނީ ނޮވެންބަރު މަހުގެ އަށް ވަނަ ދުވަހުއެވެ.