ކުޑަކުދިން ނިންދަވާއިރު ބިރުގަންނަ ޒާތުގެ ވާހަކަތައް ކިޔައިދިނުމަކީ އެކުދިންގެ ތަރުބިއްޔަތަށް އޭގެ ނޭދެވޭ އަސަރު ކުރާނެކަމެއް ކަމަށް އިސްލާމިކް މިނިސްޓްރީގެ ސްޓޭޓް މިނިސްޓަރު ޝައިޚް މުޙައްމަދު އަނިލް ވިދާޅުވެއްޖެއެވެ.
ޝައިޚް މިހެން ވިދާޅުވީ ރޭގެ އިޙްޔާ ފޯރަމްގައި "އެންމެ ރިވެތި ވާހަކަ" މި މައުޟޫއަށް ވާހަކަދައްވަމުންނެވެ.
ޝައިޚްގެ ވާހަކައިގައި ކުޑަކުދިން ނިންދަވާއިރު ބިރުވެރި ވާހަކަތައް ކިޔައިދިނުމުގެ ބަދަލުގައި އެ ކުދިންނަށް ޤުރުއާނުގައިވާ ރިވެތި ވާހަކަތަކާއި ޞަޙާބީންގެ ވާހަކަތައް ކިޔައިދިނުމަށް ވިދާޅުވިއެވެ. މީގެ އިތުރުން އެފަދަ ވާހަކަތައް ކިޔައިދިނުމަކީ ދަރިންގެ ތަރުބިއްޔަތުގެ ވަރަށް ބޮޑު ބައެއް ކަމަށް ވެސް އަނިލް ވިދާޅުވިއެވެ.
ރޭ ބޭއްވި އިޙްޔާ ފޯރަމްގެ ތެރެއިން -- ފޮޓޯ/ މިނިސްޓްރީ
މި ފޯރަމްގައި އަނިލްގެ އިތުރުން ޝައިޚް ނިމާލް މުޙައްމަދު ވެސް ވާހަކަ ދެއްކެވިއެވެ. ޝައިޚްގެ ވާހަކާގައި ވިދާޅުވީ އެންމެ ރިވެތި ވާހަކަތައް ބަޔާންވެގެންވަނީ ކީރިތި ޤުރުއާނުގައި ކަމަށާއި ޤުރުއާނުގައި ޙަކީމުންނާއި، ރަސްރަސްކަލުންގެ ވާހަކައާއި އަންހެން ބޭފުޅުންގެ ތެރެއިން މަރްޔަމްގެފާނާއި އާސިޔަތުގެފާނުގެ ވާހަކައާއި އަނިޔާވެރިވި މީހުންނާއި، ނަބީބޭކަލުންގެ ވާހަކަތައް ހިމެނޭ ކަމަށެވެ.
އޭގެ ތެރެއިން ހަ ނަބީބޭކަލެއްގެ ނަންފުޅުން ނަން ދެވިފައިވާ ސޫރަތްތައްވާއިރު، މީގެ ތެރެއިން ވެސް އެންމެ ރިވެތި ވާހަކަ ހިމެނެނީ ޔޫސުފް ސޫރަތުގައިކަން ފާހަގަކުރެއްވިއެވެ. އަދި ސަމާވީ އެއްވެސް ފޮތެއްގައި ވެސް އައިސްފައިނުވާފަދަ ފުރިހަމައަށް، ތަފްސީލުކޮށް ޔޫސުފްގެފާނުގެ ވާހަކަ ޔޫސުފް ސޫރަތުގައިވާ ކަމަށް ނިމާލް ވިދާޅުވިއެވެ.
މި ސޫރަތުގައި ޔޫސުފްގެފާނާއި އެކަލޭގެފާނުގެ އަޚުންގެ ވާހަކައިގައި ސުވާލުކުރާ މީހުންނަށް ހެކިތަކެއްވާކަމަށާއި މި ސޫރަތުގައި އެއްހާހަށްވުރެ ގިނަ އިބްރަތާއި ފައިދާ އެކުލެވިގެންވާ ކަމަށް ޝައިޚު ވިދާޅުވިއެވެ. އަދި މިއީ އިހުޒަމާނާއި މިޒަމާނުގައި ވެސް ޢިލްމުގެ އަހުލުވެރިން އެ ސޫރަތަކަށް ޚާއްޞަ އިނާޔަތެއް ދެއްވާފައިވާ ސޫރަތެއްކަމަށް ވެސް އަނިލް ވިދާޅުވިއެވެ.
ޔޫސުފް ސޫރަތަކީ އެއިން އެތައް އިބުރަތްތަކެއް ލިބޭ، ދިރިއުޅުމުގެ މައިދާނުގައްޔާއި ދަރިން ތަރުބިއްޔަތު ކުރުމުގައި މުހިންމު މެސެޖުތަކެއް ލިބިގެންދާ ސޫރަތެއްކަން ދެ ބޭފުޅުން ވެސް ވަނީ ފާހަގަކުރައްވާފައެވެ.
ފޯރަމްގައި މިވާހަކައިގެ އިތުރު ބައިތަކަށް ބައްލަވާލައްވަމުން ޝައިޚް ނިމާލްގެ ވާހަކަފުޅު ޚާއްޞަ ކުރެއްވީ ޔޫސުފްގެފާނުގެ ޙަޔާތްޕުޅުގެ އެންމެ ފަހު ދުވަސްތަކަށެވެ.
އެގޮތުން އެކަލޭގެފާނު ޖަލުގައި ހުންނެވި ދުވަސްތަކަށް ބައްލަވައިލައްވަމުން މުޖުތަމައުން ފެންނަ ކަންތައްތަކަށް ބަލާއިރު މީހަކަށް ދެރަކަމެއް ދިމާވެއްޖެ ނަމަ އެމީހެއްގެ ގާތުގައި ތިބޭ ނޫނީ ވަށައިގެންވާ މީހުންނަށް އޭގެ އަސަރުކުރުވާ ކަމަށާއި އެހެންނަމަވެސް ޔޫސުފްގެފާނު ޖަލުގައި ހުންނެވިއިރު ވެސް މަސައްކަތްޕުޅުކުރެއްވީ އެހެންމީހުންނަށް މަންފާކުރާނެ ފަދައަކުންކަމަށް ނިމާލް ވިދާޅުވިއެވެ.
މީގެ އިތުރުން ޔޫސުފް ސޫރަތުގައި ދަރިން ޒިންމާދާރުކުރުމަށް މާތްﷲއަށް ބަރޯސާވާން ވެސް އަންގަވާފައިވާ ކަމަށާއި ގަދަކަމާއި ސާބިތުކަމަކީ އިމްތިހާނާއި ކެތްތެރިކަމަށްފަހު ލިބޭކަމެއްކަން މި ސޫރަތުން އެނގިގެންދާކަމަށް ވިދާޅުވިއެވެ.
ޔޫސުފްގެފާނުގެ ވާހަކައިން ލިބޭ މެސެޖްތަކުން، މާތްﷲގެ ރަޙްމަތުން އުންމީދު ކަނޑައިގެން ނުވާނެކަން މިއީވެސް ލިބިގެންދާ ވަރަށް މުހިންމު މެސެޖެއްކަން ޝައިޚް ފާހަގަކުރެއްވިއެވެ.
ކިތަންމެ ހިތާމަވެރި ނުވަތަ ކިތަންމެ އުފާވެރި ދިރިއުޅުމެއްގައި އުޅުނަސް އަބަދުވެސް ހެޔޮ ނިމުމަށް އެދުމުގެ މުހިންމުކަން މި ސޫރަތުން ފާހަގަވެގެންދާ ކަމަށް ވެސް ޝައިޚް ނިމާލް ވިދާޅުވިއެވެ.