ސަރުކާރުން ހިންގާ މަޝްރޫއުތައް ކުރިއަށް ނުގެންދާ ކުންފުނިތައް ބްލެކްލިސްޓު ކުރާނެ އުސޫލެއް ހަދައިފިއެވެ.
ސަރުކާރުން ހިންގާ މަޝްރޫއުތަކުގައި ބައިވެރިވާ ކުންފުނިތައް ބްލެކްލިސްޓު ކުރެވޭނެ އުސޫލެއް ފިނޭންސް މިނިސްޓްރީން ހަދައިފައިވާކަން ހާމަކުރެއްވީ ރައްޔިތުންގެ މަޖިލީހުގެ މިއަދުގެ ޖަލްސާގައި ހައުސިން އެންޑް ޕްލޭނިން މިނިސްޓަރު މުޙައްމަދު އަސްލަމެވެ.
މިނިސްޓަރާ ސުވާލު ކުރައްވަން ލިބިވަޑައިގެންނެވި ފުރުސަތުގައި އިނގުރައިދޫ ދާއިރާގެ މެންބަރު ޙަސަން އަޙުމަދު ވަނީ އިންނަމާދޫގައި ނަރުދަމާ އެޅުމުގެ މަސައްކަތް ކުރާތާ ހަތަރު އަހަރު ވެފައިވާ ކަމަށާއި އެ މަސައްކަތް އަދިވެސް ނުނިމޭ ކަމަށް ވިދާޅުވެފައެވެ.
"އިންނަމާދޫ ނަރުދަމާ އަޅާތާ ހަތަރު އަހަރު، އެސްޖޭ ކޮންސްޓްރަކްޝަނުން، މިއަދު އެ ތަނުގައި ދެ މީހުން ނުވަތަ ތިން މީހުން،" ހަސަންޓޭ ވިދާޅުވިއެވެ.
ހަސަންޓޭ ވަނީ މިފަދަ ކުންފުނިތައް ބްލެކްލިސްޓު ކުރުމުގެ ވިސްނުން މިނިސްޓްރީގައި ހުރިތޯ ސުވާލުކުރައްވައިފައެވެ.
މެންބަރުގެ ސުވާލަށް ޖަވާބު ދެއްވަމުން، މިނިސްޓަރު އަސްލަމް ވިދާޅުވީ ކޮންޓްރެކްޓަރުންގެ އިހުމާލުން މަސައްކަތް ނުހިނގާ މަޝްރޫއުތަކުގައި، އެ ކޮންޓްރެކްޓަރުން ބްލެކްލިސްޓު ކުރުމަށް އުސޫލެއް މިހާރު އެކުލަވައިލެވިފައިވާ ކަމަށެވެ.
މިނިސްޓަރު އަސްލަމް މިފަދައިން ވިދާޅުވިނަމަވެސް، ކުންފުނިތައް ބްލެކްލިސްޓުކުރުމުގެ އުސޫލު މިހާތަނަށް ފިނޭންސް މިނިސްޓްރީން ހާމަކޮށްފައިނުވެއެވެ.