ބާސެލޯނާ ދޫކޮށް ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވި އެ ޓީމުގެ ކުރީގެ ކެޕްޓަން ލިއޮނަލް މެސީ އަނބުރައި ބާސާއަށް ގެނައުމާ އެ ޓީމުގެ ބައެއް ކުޅުންތެރިން ދެކޮޅުކަމަށް ސްޕެއިންގެ މީޑިއާ ރިޕޯޓުތައް ބުނެފިއެވެ.
މީޑިއާ ރިޕޯޓުތައް މިހެން ބުނެފައިވަނީ ޕީއެސްޖީ ދޫކޮށް މެސީ ބާސާއަށް ބަދަލުވާން އުޅޭކަމަށް އަޑުތައް ފެތުރިފައި ވަނިކޮށެެވެ.
މީޑިއާ ރިޕޯޓުތައް ބުނާ ގޮތުން ބާސާގެ ކުޅުންތެރިންގެ ތެރެއިން އެކަމާ ދެކޮޅު ހަދަނީ އަންސު ފަޓީ، ޖެރާޑް ޕީކޭ އަދި ގޯލް ކީޕަރު ޓާ ސްޓެޖަންއެވެ.
މެސީ ބާސާއަށް ކުޅުނުއިރު، އުމުރުން 19 އަހަރުގެ ފަޓީއާ މެސީއާ ދެމެދު ރަނގަޅު ގުޅުމެއް ނޯންނަކަމަށް ވެސް މީޑިއާ ރިޕޯޓްތައް ބުނެއެވެ. އަދި ފަޓީ ވަނީ އޭނާގެ އެޖެންޓެއްގެ ގޮތުގައި ހުރި މެސީގެ ބޭބޭގެ ބަދަލުގައި ޖޯޖު މެންޑެސް އެޖެންޓުކަމަށް ހަމަޖައްސާފައިކަމަށް ވެސް ރިޕޯޓުގައި ވެއެވެ. އަދި ހަމަ އެހެންނެ، މެސީ ބާސާއަށް އަނބުރައި އައި ނަމަވެސް 10 ނަންބަރު ޖާޒީ އޭނާއަށް ދޭން ފަޓީ ބޭނުމެެއްނުވެއެވެ. މެސީ ބާސާ ދޫކޮށްލި ފަހުން އެ ޓީމުގެ 10 ނަންބަރަށް މިހާރު ކުޅެނީ ފަޓީއެވެ.
ރިޕޯޓްތައް ބުނާގޮތުން މެސީ ބާސާ ދޫކޮށްލުމަކީ ބާސާއަށް ކުރިމަތިވި އެންމެ ރަނގަޅު ގޮތް ކަމަށް މެސީއާ ގާތް ގުޅުމެއް އޮންނަ ޕީކޭ ބުނެފައިވާކަމަށް ވެސް އެ ރިޕޯޓުގައިވެއެވެ. އަދި މެސީ ބާސާ ދޫކޮށްލުމާއި ގުޅިގެން ބޭއްވި ފެއާވެލް ޑިނާއަށް ޕީކޭއަށް ދައުވަތުވެސް ނުދޭކަމަށްވެއެވެ.
ބާސާގެ އެއް ނަންބަރު ކީޕަރު ސްޓެޖަން ވެސް މެސީ ބާސާއަށް ގެނައުމާ ދެކޮޅު ހަދާކަމަށާއި، މެސީ ބާސާއަށް ކުޅުނު ދުވަސްވަރު އޭނާއާ ވެސް ރަނގަޅު ގުޅުމެއް ނެތްކަމަށް ރިޕޯޓުތައް ބުނެއެވެ.
މެސީ މި ވަގުތު ހުރީ އާޖެންޓީނާގެ ގައުމީ ޓީމާއެކުއެވެ. އަދި އޭނާ ވަނީ އާޖެންޓީނާއާއެކު މިއަހަރު ޤަތަރުގައި އޮންނަ ވޯލްޑް ކަޕަށް ކޮލިފައިވެސް ވެފައެވެ. އާޖެންޓީނާ ވޯލްޑް ކަޕަށް ކޮލިފައިވުުގައި މެސީވަނީ އިސް ދައުރެއް އަދާކޮށްފައެވެ.