ކުޅިވަރުގެ ރޮނގުން ރަން ވަނަ ހާސިލުކުރާ ސްކޫލްތަކުގެ ދަރިވަރުންނަށް ދޭ އެންމެ ޝަރަފްވެރި "ކަލާސް އެވޯޑްސް"ގެ ޓައިޓަލް ސްޕޮންސަރަކަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ހަމަޖައްސައިފިއެވެ.
ކަލާސް އެވޯޑްސްގެ ޓައިޓައިލް ސްޕޮންސަރަކަށް އެމްޓީސީސީ ހަމަޖައްސައިފައިވަނީ ކުރިއަށް އޮތް ތިން އަހަރުގެ މުއްދަތަށެވެ. އެއާއެކު މި އެވޯޑްސް ބާއްވާނީ "އެމްޓީސީސީ ކަލާސް އެވޯޑްސް"ގެ ނަމުގައެވެ.
މިކަމަށް ޓަކައި އެޑިއުކޭޝަން މިނިސްޓްރީއާއި އެމްޓީސީސީއާއެކު ވެވުނު އެއްބަސްވުމުގައި މިނިސްޓްރީގެ ފަރާތުން އެއްބަސްވުމުގައި ސޮއި ކުރެއްވީ އެ މިނިސްޓްރީގެ ސްޓޭޓް މިނިސްޓަރު އަޙްމަދު ރިޔާޒެވެ. އެމްޓީސީސީގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމްއެވެ.
ކަލާސް އެވޯޑަކީ ކުޅިވަރުގެ ދާއިރާއިން ޒުވާން ހުނަރުވެރިންގެ އަގު ވަޒަންކޮށް ކުޅިވަރުގެ ދާއިރާއިން އިތުރަށް ދަރިވަރުން ކުރިއެރުވުމަށް 2013 ވަނަ އަހަރުން ފެށިގެން މިނިސްޓްރީ އޮފް އެޑިއުކޭޝަނުން ދެމުން އަންނަ އެވޯޑެކެވެ.