އެމްޓީސީސީން ށ. ފީވަށް ބަނދަރު ތަރައްގީ ކުރުމުގެ މަޝްރޫއުގެ މަސައްކަތް ނިންމާލައިފިއެވެ.
އެ ކުންފުނިން ބުނި ގޮތުގައި، އެ މަސައްކަތް ނިމމިފައި ވަނީ މިދިޔަ މަހުގެ 29 ވަނަ ދުވަހުއެވެ.
މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގެ ފަރާތުން އެ ކުންފުންޏާ ހަވާލުކޮށްގެން ކުރިއަށް ގެންދިޔަ މި މަޝްރޫއުގެ އަގަކީ 67.6 މިލިއަން ރުފިޔާއެވެ.
ށ. ފީވައް ބަނދަރު -- ފޮޓޯ/ އެމްޓީސީސީ
މި މަޝްރޫއުގެ ދަށުން، 40,420 ކިއުބިކް މީޓަރުގެ
ބަނދަރު ފުންކުރުމާއި، 14,743 ކިއުބިކް މީޓަރު ނެރު ފުންކުރުމުގެ މަސައްކަތް ކޮށްފައިވެއެވެ.
މީގެ އިތުރުން ފީވަކުގައި 474 މީޓަރުގެ އެއްގަމު ތޮށި އަދި 356 މީޓަރުގެ ބޭރުތޮށި ލާފައިވެއެވެ.
ފީވަކު ބަނދަރު ތަރައްގީ ކުރުމުގެ މަޝްރޫއުގެ ތެރެއިން 182 މީޓަރުގެ ރިވެޓްމެންޓް ޖަހައި، 27 މީޓަރުގެ ސަރަހައްދެއްގައި ގްރޮއިން ޖެހުމުގެ އިތުރުން، 2,320 އަކަ މީޓަރުގެ ސަރަހައްދެއްގައި ޕޭވްމަންޓް ހަދާފައި ވެއެވެ.
މި މަޝްރޫއުގެ ދަށުން އެރަށުގައި ނެރުބައްތި އާއި މަގުބައްތި ހަރުކުރުމުގެ މަސައްކަތް ވެސް ވަނީ ކޮށްފައެވެ.